1 Atqarıwshılardın' jetekshisine. «Joq etpe» namasına aytıladı. Shaul Dawıttı o'ltiriw ushın, u'yin an'lıwg'a adam jibergende, Dawıttın' aytqan jırı
2 Qudayım, meni dushpanlarımnan qutqar! Mag'an qarsı shıqqanlardan aman saqla+.
3 Jınayatshılardan meni saqla, Qanxorlardan qutqar.
4 Qara, olar janımdı alıw ushın, an'lıp jatır, Jazıg'ım ha'm gu'nam bolmasa da, Jaratqan İye, Ku'shliler mag'an qarsı birlespekte.
5 Ayıbım bolmasa da, Mag'an qarsı hu'jim etiwge asıg'ıp atır. Mag'an ja'rdem beriw ushın tur, awhalıma qara!
6 Sen, A'lemnin' Qudayı Jaratqan İye, İzrail xalqının' Qudayı, Tur, barlıq xalıqlardı jazala, Hesh bir jawız jınayatshılardı ayama.
7 Olar keshte qaytıp keledi, İytlerdey ırıldasıp, qalanın' ishinde ızg'ıp ju'redi.
8 Qara, olardın' tillerinen so'gis to'giledi, Awızlarınan qılısh shıg'adı. Olar: «Kim bizlerdi esiter edi?» – dep oylaydı.
9 Biraq Sen olardın' u'stinen ku'lesen', Jaratqan İye, Barlıq xalıqlardı masqara qılasan'.
10 Ku'sh-quwatım Sensen', Sag'an intizarman, Sen menin' qorg'anımsan', Quday!
11 Qudayım su'yispenshiligi menen qarsı alar meni, Meni an'lıg'an jawlarımnın' qulawın ko'rseter mag'an.
12 Olardı o'ltirme, bolmasa xalqım umıtıp ketedi, Qu'diretin' menen olardı gezende qılıp, tarqat, Keyin olardı jerge ur, İye, qalqanımız.
13 Olardın' awzınan shıqqan gu'naları ushın, Tilleri menen so'ylegen so'zleri ushın, Aytqan na'let ha'm jalg'an so'zleri ushın, O'zlerinin' menmenliginin' duzag'ına tu'ssin.
14 G'a'zebin' menen joq qıl olardı, Birewin de qaldırmay qırıp tasla. Sonda Qudaydın' Yaqıp urpaqlarının' u'stinen hu'kimdar ekenin, Jer ju'zinin' shetine deyin biledi.
15 Dushpanlarım keshte qaytıp keler, İytlerdey ırıldasıp, qalanın' ishinde ızg'ıp ju'rer+.
16 Awqat tabıw ushın gezer, Tu'ndi ash qarnı menen o'tkerer.
17 Al men Senin' ku'sh-qu'diretin'di jırlayman, Tan' azannan su'yispenshiligin'di ja'riyalayman. O'ytkeni Sen mag'an qorg'an, Apatta qalg'anımda, pana boldın'.
18 Ku'sh-quwatım menin', saz shertip, Seni alg'ıslayman, Sen menin' qorg'anımsan', Mag'an su'yispenshilik ko'rsetken Qudayımsan'.
