1 Atqarıwshılardın' jetekshisine. Dawıttın' jırı. Qosıq
2 Quday, Sionda alg'ıs-maqtaw Sag'an tiyisli, Sag'an berilgen antlar orınlanadı.
3 Sen duwalarımızdı esitesen', Barlıq adamzat Sag'an keledi.
4 Gu'na awırmanlıg'ınan qıynalıp ju'rgende, Sen qılmıslarımızdı keshiresen'.
5 Qanday baxıtlı, ha'wlilerin'de jasawı ushın, Onı tan'lap, O'zin'e jaqınlatqan adam! U'yin'nin', muxaddes İbadatxanan'nın', Jaqsı jemislerine toyamız.
6 Qutqarıwshımız Quday, haqlıg'ın' menen, Tan' qalarlıq islerin' menen bizlerge juwap ber. Sen jer ju'zinin' to'rt ta'repinin', Uzaq ten'izlerdin' u'mitisen'.
7 Ku'sh-qu'diret penen qurallang'ansan', O'z ku'shin' menen tawlardı jaylastırg'ansan'.
8 Ten'izlerdin' ha'm olardın' tolqınlarının' shawqımın, Ja'ne de, xalıqlardın' qozg'alan'ın tınıshlandırasan'.
9 Du'nyanın' arg'ı shetinde jasaytug'ınlar, Ka'ramatlı belgilerin'di ko'rip qorqıwg'a tu'ser. Shıg'ıstan batısqa deyingi xalıqlardı, Quwanıshlı dawıslarg'a toltırasan'.
10 Jerge g'amxorlıq qılıp, onın' sho'lin qandırasan', Onı moldan bayıtasan'. Quday, Senin' salmaların' suwg'a tolı, Adamlarg'a g'a'lle beresen', Jerdi sog'an tayarlag'ansan'.
11 Qarıqların qandırıp, suwg'arasan', Biyik jerlerin tegisleysen'. Jawının' menen onı jumsartasan', Onın' o'nimin bereketli qılasan'.
12 İygiligin' menen jılg'a taj kiydiresen', Ju'rgen jolların'nan baylıq ag'ıp turar.
13 Sho'l otlaq jerge aylanar, To'beshikler shadlıqqa bo'lener.
14 Jaylawlar su'riwler menen qaplanar, Oypatlıqlar da'nge kiyiner, Olar quwanıshtan baqırısıp, qosıq aytar.
