Atqarıwshılardın' jetekshisine. Qosıq, jır
Zabur 65 bob
1 Ha'y, jer ju'zindegi barlıq adamlar, Ba'lent dawıs penen Qudayda shadlanın'!
2 Onın' ullı atın saz shertip, alg'ıslan', Og'an saltanatlı tu'rde alg'ıs aytın'!
3 Qudayg'a aytın': «Senin' islerin' qanday qorqınıshlı! Qu'diretin'nin' ullılıg'ınan, Dushpanların' Sag'an qullıq etedi.
4 Pu'tkil jer ju'zi Sag'an ta'jim qıladı, Olar Sag'an arnap qosıq aytadı, Awa, saz shertip, Senin' atın'dı alg'ıslaydı».
5 Kelin', Qudaydın' ne islegenlerin ko'rin'! Qanday qorqınıshlı isler isledi adamzat ushın:
6 Ol ten'izdi qurg'aq jerge aylandırdı, Ata-babalarımız da'ryadan ju'rip o'tti, Shadlanayıq Onın' sol islerine!
7 Qu'direti menen ma'n'gi hu'kimdarlıq etedi, Ko'zleri milletlerdi baqlap turadı. Qozg'alan'shılar menmenlikke berilmesin.
8 Ha'y, xalıqlar, Qudayımızg'a alg'ıs aytın', Og'an aytqan alg'ıs-maqtawın'ız jan'lasın.
9 Ol o'mirimizdi saqladı, Ayaqlarımızdın' tayıp ketiwine jol qoymadı.
10 Quday, Sen bizlerdi sınadın', Gu'misti otta tazalag'anday etip tazaladın'.
11 Bizlerdi duzaqqa jolıqtırdın', Jelkemizge awır ju'k ju'kledin'.
12 Sawash arbaların basımızdın' u'stinen ju'rgizdin', Ottan ha'm suwdan keship o'ttik, Biraq keyin abadanshılıqqa alıp keldin'.
13 Jandırılatug'ın qurbanlıqlar menen U'yin'e baraman, Bergen wa'delerimdi orınlayman.
14 Apatta qalg'anımda, awzımnan shıqqan edi, Tilim menen bergen edim wa'delerdi.
15 Semirtilgen haywanlardı jandırılatug'ın qurbanlıqqa beremen, Qoshqardı tu'tetip Sag'an usınaman. Mal ha'm tekelerdi qurbanlıq etip beremen.
16 Kelin', tın'lan', ha'y, Qudaydan qorqatug'ınlar, Men ushın Onın' ne islegenin sizlerge aytıp bereyin.
17 Awzım menen Onı shaqırdım, Tilim menen Onı ullıladım.
18 Eger ju'regimde jawız niyet bolsa, Onda İye meni esitpes edi.
19 Biraq Quday tın'ladı meni, Duwa etkenimde, dawısıma qulaq saldı.
20 Alg'ıslar bolsın Qudayg'a, Ol duwamnan bas tartpadı, Su'yispenshiligin mennen ayamadı.
