1 Atqarıwshılardın' jetekshisine. «Lala gu'l» namasına aytıladı. Dawıttın' jırı
2 Quday, qutqar meni, Suwlar alqımıma keldi.
3 Sho'gip baratırman tu'psiz batpaqqa, Ayag'ımdı basatug'ın qattı jer joq. Teren' suwlarg'a sho'gip kettim, Ku'shli ag'ıs meni tartıp ketpekte.
4 Dad salıwdan din'kem qurıdı, Tamag'ım kewip qaldı, Qudayımdı ku'tip, ko'z nurım so'ndi.
5 Sebepsiz meni jek ko'retug'ınlar, Basımdag'ı shashımnan da ko'pdur. Dushpanlarım mag'an qarsı jalg'an so'yler, Olar ku'shli, meni o'ltirmekshi, Urlamag'an na'rsemdi qaytarıwdı talap qılar.
6 Quday, aqılsızlıg'ımdı O'zin' bilesen', Ayıplarım Sennen jasırın emes.
7 Quday, A'lemnin' İyesi, Men sebepli uyatqa qalmasın Sag'an u'mit qılg'anlar! İzraildın' Qudayı, Seni izlegenler men sebepli shermende bolmasın!
8 Sen ushın shıdayman so'gislerge, Shermendelik qaplaydı ju'zimdi.
9 Ag'a-inilerime jat adamday boldım, Anamnın' ulları ushın kelgindi sıyaqlıman.
10 Senin' u'yin'e bolg'an ıqlasım ishimdi jeydi, Seni masqaralag'anlar meni masqaralag'an boladı.
11 Oraza tutıp, dad salsam, Men masqara bolaman.
12 Aza kiyim kiysem, Olarg'a ku'lki bolaman.
13 Qala da'rwazası janında otırg'anlar, Men tuwralı o'sek toqıydı. Ma'sku'nemler meni mısqıllap, qosıq aytadı.
14 Biraq men Sag'an duwa etemen, Jaratqan İye, Maqul waqıtta, ullı su'yispenshiligin'nin' sayasında, Quday, İsenimli qutqarıwın' menen juwap ber mag'an.
15 Meni qutqar, batpaqqa batıp ketpeyin, Meni jek ko'retug'ınlardan azat qıl, Teren' suwlardan meni saqlap qal.
16 Ku'shli ag'ıs meni tartıp ketpesin, Tu'psiz suwlar meni jutpasın, Qa'bir u'stimnen awzın jappasın.
17 Juwap ber mag'an, Jaratqan İye, İygiliklidur su'yispenshiligin'. Ullı rehimin' sebepli mag'an qaray burıl.
18 O'z qulın'nan ju'zin'di jasırma, Apat ishinde qaldım, tez juwap ber mag'an!
19 Jaqınlap mag'an, qutqar janımdı, Dushpanlarımnan azat et meni.
20 Meni qanday masqara qılg'anın, Shermende bolıp, uyatqa qalg'anımdı bilesen', Dushpanlarımnın' ha'mmesi Senin' qarsın'da.
21 Keyisler kewlimdi jaraqatladı, da'rtke tolg'anman, Da'rtlesetug'ın birewdi izledim, hesh kim joq, Jigerlendiretug'ın birewdi izledim, onı da tappadım.
22 Awqatıma olar za'ha'r saldı, Sho'llegenimde, mag'an sirke suwın berdi.
23 Aldındag'ı dasturxanı o'zlerine qaqpan bolsın, Dosları ushın duzaq bolsın!
24 Ko'zlerin qaran'g'ılıq basıp, ko'rmey qalsın, Belleri ma'n'gige bu'gilip qalsın.
25 G'a'zebin'di to'k olardın' u'stine, Qa'ha'rin'nin' otı olardı jutsın!
26 Olardın' ma'kanı qan'ırap qalsın, Shatırlarında jasaytug'ın hesh kim qalmasın!
27 Olar Sen urg'an adamlardı quwg'ın qılar, Sen jaraqatlag'an adamlardın' jarasın o'sek qılar.
28 Gu'naları u'stine gu'na qosa go'r, Sen olardı aqlama.
29 Atları o'mir kitabınan o'shirilsin, Haq adamlar menen birge jazılmasın!
30 Men biysharaman ha'm azap shegip atırman, Quday, qutqar meni ha'm qa'wipsiz jerde saqla!
31 Qudaydın' atın qosıq aytıp maqtayman, Shu'kirlik penen Onı ullılayman.
32 Bul shaqlı ha'm tuyaqlı bug'a yamasa tanadan go're, Jaratqan İyege ko'birek maqul boladı.
33 Ezilgenler bunı ko'rip, quwansın, Ha'y, Qudaydı izlegenler, ju'regin'iz janlansın!
34 Jaratqan İye mu'ta'jlerdi esitedi, Tutqın bolg'an xalqın jek ko'rmeydi.
35 Og'an alg'ıs-maqtaw aytın', ha'y, aspan ha'm jer, Ten'izler ha'm ondag'ı barlıq janıwarlar.
36 Quday Siondı qutqaradı, Yahuda qalaların qayta tikleydi, Xalıq ornalasıp, ol jerdi iyeleydi.
37 Onın' qullarının' urpag'ı jerdi miyras qıladı, Onın' atın su'ygenler ol jerge ma'kan basadı.
