1 Benyamin urıwınan bolg'an Kush sebepli Dawıttın' Jaratqan İyege aytqan jırı
2 Sennen pana tabaman, Qudayım Jaratqan İye! İzime tu'skenlerden azat qılıp, qutqar meni.
3 Bolmasa, olar meni arıslanday tilkimlep taslaydı, Maydalap bo'lekleydi, qutqaratug'ın hesh kim joq.
4 Qudayım Jaratqan İye, Eger ayıplı is qılg'an bolsam, Birewge nahaqlıq qılg'an bolsam,
5 Dostımnın' jaqsılıg'ına jamanlıq qaytarsam, Mag'an sebepsiz hu'jim qılg'an dushpanıma rehim qılsam,
6 Onda jawlarım meni izimnen quwıp, uslap alsın, Janımdı ayaq astı qılıp, tepkilesin, Abırayımdı jerge ursın.
7 Qa'ha'rlenip ko'teril, Jaratqan İye! Qarsı shıq dushpanlarımnın' g'a'zebine! Oyan, hu'kim shıg'arg'an Qudayım!
8 Xalıqlardı a'tirapın'a jıyna, Joqarıdag'ı taxtın'da otırıp, Olardın' u'stinen hu'kimdarlıq qıl.
9 Jaratqan İye, Sen xalıqlardın' u'stinen hu'kim shıg'arasan', Jaratqan İye, a'dilligim ha'm minsizligime go're, Sen meni aqla.
10 Jawızlardın' jawızlıqlarına shek qoy, Haqlardı qollap quwatla, Aqıl-oy ha'm ju'reklerdi Sen sınaysan', Haq Quday!
11 Quday qalqan sıyaqlı meni qorg'ar, Pa'k ju'reklerdi Ol qutqarar.
12 Quday a'dalatlı qazıdur, Jawızg'a Ol ha'r ku'ni g'a'zebin shashar.
13 Eger kim de kim ta'wbe qılmasa, Quday og'an qarsı qılıshın qayrar, Sadag'ın kerip, tayar turar.
14 Qıratug'ın qural-jarag'ın alıp, Otlı oqların tayarlap turar.
15 Jaman adamnan jamanlıq shıg'adı, Jawızlıqqa ju'kli boladı, Na'tiyjede jalg'andı tuwadı.
16 Ol shuqır qazadı, Biraq qazg'an shuqırına o'zi tu'sedi.
17 Onın' jamanlıg'ı o'zine qaytadı, Jawızlıg'ı o'z basına jetedi.
18 A'dalatlıg'ı ushın Jaratqan İyenin' atına alg'ıs aytaman, Saz shertip, Quday Taalanın' atın alg'ıslayman.
