1 Jaratqan İye, Seni panalayman, Shermende bolıwıma hasla jol qoyma!
2 A'dalatlıg'ın' menen qutqarıp, azat qıl meni! Mag'an qulaq sal, qutqar meni!
3 Panalaytug'ın jartasım bol, Ha'mme waqıtta panalawg'a ol jerge bara alayın. Meni qutqarıw ushın buyrıq ber, Shınında da, Sen jartasım ha'm qorg'anımsan'.
4 Qudayım, meni jawızlardın' qolınan, A'dalatsız ha'm zalım adamnın' pa'njesinen qutqar!
5 Sen menin' u'mitimsen', Quday İye, Jaslıg'ımnan Sag'an isenemen.
6 Tuwılg'anımnan baslap, Sag'an su'yendim, Meni anamnın' qarnınan Sen alıp shıqtın', Ha'mme waqıtta Sag'an alg'ıs-maqtaw aytaman.
7 Ko'pler ushın o'rnek boldım, Sen menin' bekkem panamsan'.
8 Awzım tolıp tassın alg'ıs-maqtawg'a, Ku'ni boyı saltanatın'dı ja'riyalayman.
9 Qartayg'an shag'ımda, mennen ju'z burma, Ku'shim qaytqannan keyin, meni ta'rk etpe!
10 Dushpanlarım mag'an qarsı til biriktirer, Meni o'ltiriwdi qa'legenler birbiri menen ken'eser.
11 Olar: «Quday onı ta'rk etti, Quwıp, uslap alın'lar, Onı qutqaratug'ın hesh kim joq!» – deydi.
12 Quday, mennen uzaqlaspa, Qudayım, mag'an ja'rdem beriwge asıq!
13 3Shermende bolıp, joq bolsın, meni ayıplawshılar, Mag'an jawızlıq qılmaqshı bolg'anlar, Uyatqa qalıp, biyabıray bolsın+.
14 Al men ha'mme waqıtta Sennen u'mit qılaman, U'sti-u'stine Sag'an alg'ıs aytaman.
15 Ku'ni boyı Senin' a'dil islerin'di, Qutqarıwın' tuwrısında ja'riyalayman, Olardı sanap, ada bolmaspan.
16 Quday İye, qu'diretin' sebepli kelemen, Senin', jalg'ız Senin' a'dilligin'di bayan qılaman.
17 Quday, jaslıg'ımnan mag'an Sen ta'lim berdin', Elege deyin, Senin' a'jayıp islerin'di aytıp ju'remen.
18 Shashlarım ag'arıp, qartayg'anımda da, Ta'rk etpe meni, Quday! Ku'shin'di keleshek a'wladqa, Qu'diretin'di keyingi urpaqlarg'a jetkereyin.
19 Quday, ko'klerge jeter a'dilligin', Ullı isler qıldın' Sen, Sag'an uqsag'an kim bar, Quday?
20 Sen mag'an ko'p awır apatlar jiberdin', Biraq meni qaytadan janlandırasan', Meni jerdin' tu'binen ja'ne shıg'arıp alasan'+.
21 Abırayımdı joqarılatasan', Mag'an ja'ne jubanısh beresen'.
22 Men de arfa shertip, Sag'an alg'ıs aytaman, Sadıqlıg'ın'dı qosıq etip aytaman, Qudayım.Lira shertip, Sag'an alg'ıs aytaman, İzraildın' Muxaddesi!
23 Saz shertip, Sag'an alg'ıs aytqanımda, Awzımnan shadlıq dawısı shıg'ıp, O'zin' qutqarg'an janım quwanadı.
24 Tilim ku'ni boyı Senin' a'dalatın' haqqında ja'riyalaydı, Mag'an jawızlıq qılıwdı qa'legenler, Uyatqa qalıp, shermende boldı.
