Sulaymannın' jırı
Zabur 71 bob
1 Quday, hu'kim shıg'arıwdı patshag'a, A'dalatlıg'ın'dı patshanın' ulına sıyla.
2 Ol Senin' xalqın'dı a'dalatlıq penen, G'a'riplerin'di tuwrılıq penen hu'kim qılsın!
3 Tawlar xalıqqa abadanshılıq, To'beshikler haqıyqatlıq alıp kelsin.
4 Patsha jarlılardı qorg'asın, Ka'mbag'allardın' balaların qutqarsın, Zalımlardı ezip taslasın.
5 Quyash ha'm ay turg'anınday, Xalqın' a'wladtan-a'wladqa Sennen qorqıp jasasın.
6 Patshamız jan'a orılg'an atızg'a jawg'an jawınday, Topıraqtı suwg'aratug'ın bereketli jawınday bolsın.
7 Onın' da'wirinde haq adam gu'llep, jasnasın, Ay joq bolıp ketkenshe, abadanshılıq mol bolsın.
8 Ol hu'kimdarlıq etsin bir ten'izden ekinshi ten'izge deyin, Evfrat da'ryasınan jer ju'zinin' shetine deyin!
9 Onın' aldında sho'lde jasaytug'ınlar bas iysin, Dushpanları topıraq jalasın.
10 Tarshish ha'm ataw u'lkelerinin' patshaları, Og'an salıq alıp kelsin. Sheba ha'm Seba patshalıqları sawg'alar usınsın.
11 Barlıq patshalar aldında ta'jim qılsın, Pu'tkil xalıqlar og'an xızmet etsin!
12 Ol nala shekken jarlıg'a ja'rdem berer, Su'yenishi joq biysharanı qutqarar.
13 G'a'rip ha'm jarlıg'a rehimi keler, Jarlılardın' janın qutqarar.
14 Zorlıq ha'm zulımlıqtan olardı azat qılar, Olardın' qanı onın' na'zerinde a'zizdur.
15 Patshanın' o'miri uzaq bolsın! Shebanın' altını og'an berilsin, Tınımsız duwa etilsin ol ushın, Ku'ni boyı onı jarılqasın!
16 U'lkede da'n mol bolsın, Taw baslarında da'n o'nimleri shayqalıp tursın! Masaqları Lebanon tog'ayınday mol bolsın, Qala xalqı jerdegi sho'p yan'lı ko'beysin!
17 Patshanın' atı ma'n'gi jasasın, Quyash so'ngenshe, atı o'shpesin, Ol arqalı adamlar jarılqansın, Pu'tkil xalıqlar: «Ol qanday baxıtlı», dep aytsın!
18 Jaratqan İye Qudayg'a, İzraildın' Qudayına alg'ıslar bolsın. Ka'ramatlar isleytug'ın jalg'ız Oldur.
19 Onın' ullı atına ma'n'gi alg'ıslar bolsın, Pu'tkil jer ju'zi Onın' dan'qına tolsın! Awmiyin! Awmiyin!
20 İshay ulı Dawıttın' duwaları usı jerde tamamlandı.
