Asaftın' jırı
Zabur 72 bob
1 Quday haqıyqattan da İzrailg'a, Ju'regi pa'k bolg'anlarg'a iygilikli.
2 Ayaqlarım tayıp kete jazladı, Sırg'anap jıg'ılıwdan sa'l qaldım.
3 Jawızlardın' abadanshılıg'ın ko'rip, Sol menmenlerge ishim ku'ydi.
4 Olar o'mirinin' aqırına deyin, qayg'ı ne ekenin bilmes, Deneleri sawsalamat.
5 Adamzatta bolatug'ın qıyınshılıqtı ko'rmes, Basqalar sıyaqlı azap shekpes.
6 Menmenlik olardın' moynındag'ı monshag'ı, Jawızlıq u'stindegi kiyimi sıyaqlı.
7 Olardın' ko'zlerin may basqan, Ju'rekleri ta'kabbirlikke tolıp tasqan.
8 Adamlardın' u'stinen ku'lip, jawız niyette so'yler, Menmenlik etip, zulımlıq qılıwdı jobalastırar.
9 Ko'klerge qarsı awzın ashar, Tilleri menen jer ju'zin iyeler.
10 Sonın' ushın, xalıq solarg'a qaray ju'z burar, So'zlerin bolsa, suwday etip iship alar.
11 Olar bılay deydi: «Quday qalay biledi? Quday Taalanın' xabarı bar ma edi?»
12 Mine, usındaydur jawızlar, Ha'mme waqıtta ta'shiwishsiz jasar, O'z baylıg'ın arttırar.
13 Men biykarg'a ju'regimdi pa'k tutqan ekenmen-da', Ayıpsızban, dep qollarımdı juwg'an ekenmen-da'.
14 Ku'ni boyı azap shegemen, Ha'r ku'ni azanda jazalanaman.
15 «Men de olar sıyaqlı so'yleyin» dep aytsam, Qıyanet etken bolar edim Senin' haqıyqıy xalqın'a.
16 Bulardı tu'siniw ushın oylang'anımda, Men ushın qıyın boldı bul.
17 Senin' muxaddes İbadatxanan'a kiremen degenshe, Tu'sinbegen edim olardın' aqıreti ne bolatug'ının.
18 Shınında da, olardı tayg'aq jerge qoyg'ansan', Jerge qulatıp, wayran qılasan'.
19 Olar sonshelli birden qırılıp qaladı, Qorqınıshlı apat ishinde pu'tkilley joq boladı.
20 Oyang'anda umıtılıp ketetug'ın tu's sıyaqlı, Sen qozg'alg'anda, İye, Olardı eles su'lderdey ko'rip, mensinbeysen'.
21 Ju'regim g'amg'a tolıp, Qa'lbimde da'rt payda bolg'anda,
22 Nadan bolıp bilmegen ekenmen, Sag'an haywanday qatnasta boldım.
23 Sonda da ha'mme waqıtta Senin' menen birgemen, Menin' on' qolımnan uslag'ansan'.
24 Na'siyatların' menen mag'an jol ko'rsetesen', Keyin meni dan'qqa qaray jeteleysen'.
25 Sennen basqa kimim bar aspanda? Sennen basqanı qa'lemeymen jer ju'zinde.
26 Denem ha'm qa'lbim ha'lsirep baratır, Biraq Quday – Sen ju'regimnin' ku'sh-quwatısan', Menin' ma'n'gilik u'lesimsen'.
27 Sennen uzaqlasqanlar o'lip ketedi, Qırıp taslaysan' Sag'an opasızlıq qılg'anlardı.
28 Al men ushın Quday, Sag'an jaqın bolıw jaqsı, Barlıq islerin'di ja'riyalayın dep, Quday İye, Seni pana qılıp aldım o'zime.
