Zabur 73 bob
1 Quday, ne ushın bizlerden ma'n'gi bas tarttın'? Ne ushın O'zin' bag'ıp atırg'an qoylarg'a g'a'zebin'di shashasan'?
2 Esle o'tmishtegi iyelik qılg'an ja'miyetin'di, O'z xalqın' qılıw ushın azat etken qa'wimin'di, O'zin' ma'kan qurg'an usı Sion tawın.
3 Adımların'dı tiklenbey turg'an qarabaqanag'a qaray bur, Dushpan Muxaddes orındag'ı barlıq na'rseni qıyrattı.
4 İbadatxanan'da dushpanların' qıshqırıstı, Ol jerge o'z bayraqların tikti.
5 Olar tog'ayda terek shabıw ushın, Baltasın ko'tergen adamg'a uqsaydı.
6 Keyin olar ay balta ha'm balg'aları menen, Qıyratıp tasladı barlıq oyma islerdi.
7 Muxaddes ma'kanın'dı o'rtedi, Atın' ornalasqan ma'kanın'dı pu'tkilley haramladı.
8 Olar o'z kewlinde: «Olardı pu'tkilley qurtamız», – dep, Eldegi sıyınıw orınların o'rtep jiberdi.
9 Ka'ramatlı belgilerin'di ko'rmeymiz, Endi payg'ambarlar da qalmadı, Bul qashang'a deyin dawam etetug'ının biletug'ın, Hesh kim qalmadı bizlerdin' aramızda.
10 Quday, qashang'a deyin dushpan xor qıladı? Jaw Senin' atın'a ma'n'gige til tiygize ala ma?
11 Ne ushın qolın'dı, on' qolın'dı artqa tartasan'? Qoynın'nan qolın'dı shıg'arıp, olardı qırıp tasla!
12 Quday, a'zelden menin' patshamsan', Jer ju'zine jen'is alıp kelesen'.
13 Ku'shin' menen ten'izdi ekige bo'ldin', Ten'iz aydarhalarının' basların suw ishinde ezdin'.
14 Liwyatannın'* basların ezdin', Sho'lde jasaytug'ınlarg'a onı azıq qılıp berdin'.
15 Suwdın' ko'zlerin ha'm bulaqlardı ashıp ag'ızg'an Sensen', Ag'ıp turg'an da'ryalardı qurg'atıp taslag'an Sensen.
16 Ku'ndiz Seniki, tu'n de Seniki, Ay ha'm quyashtı Sen ornattın'.
17 Sen jer ju'zinin' barlıq shegaraların ornattın', Jazdı da, qıstı da O'zin' jarattın'.
18 Esin'de tut, Jaratqan İye, dushpan masqaralap atır, Aqmaq xalıqlar atın'a til tiygizip atır.
19 Qumırın'nın' janın jırtqıshlarg'a tapsırma, Biyshara bendelerin'di ma'n'gige umıtpa.
20 Du'zgen kelisimin'e na'zer sal, Eldin' qaran'g'ı jerleri zorlıqqa tolg'an.
21 Ezilgen adam shermende bolıp qaytpasın, Biyshara ha'm jarlılar atın'a alg'ıs-maqtaw aytsın.
22 Tur, Quday, O'z isin'di qorg'a, Aqmaqlardın' ku'ni boyı Seni masqara qılıwın esle.
23 Dushpanların'nın' qıshqırıg'ın, Sag'an qarsı shıqqanlardın' tınbay ko'terilgen shawqımın umıtpa.
