1 Atqarıwshılardın' jetekshisine. «Joq etpe» namasına aytıladı. Asaftın' jırı. Qosıq
2 Alg'ıslaymız Seni, Quday, alg'ıslaymız, Atın' Senin' bizlerge jaqın, Adamlar a'jayıp islerin'di ja'riyalaydı.
3 Quday bılay deydi: «Belgilengen waqıt kelgende, A'dillik penen qazılıq etemen.
4 Jer ju'zi ha'm onda jasaytug'ınlar shayqaladı, Biraq bekkem qıldım onın' su'tinlerin.
5 „Maqtanban'!“ – dedim maqtanshaqlarg'a, Nahaqlarg'a: „Ko'kirek ko'termen'!
6 Ko'kiregin'izdi joqarı ko'termen'! Menmenlik penen so'ylemen'!“ – dedim».
7 Shıg'ıstan da, batıstan da, Tawlı sho'lden de hu'kim shıqpas.
8 Biraq qazılıq etiwshi Quday, Birin to'menletip, ekinshisin joqarılatar.
9 Jaratqan İye qolında bir kese uslap tur, Ol da'mli aralaspalı ko'pirgen sharapqa tolı. Onnan jer ju'zindegi barlıq nahaqlarg'a quyadı, Olar tu'bine deyin onı ishedi.
10 Al men Onın' islerin ma'n'gi ja'riyalayman, Saz shertip, Yaqıptın' Qudayına alg'ıs aytaman.
11 Ol barlıq nahaqlardın' ko'kiregin basadı, Haq adamlardın' ku'shin joqarılatadı.
