Zabur 77 bob
1 Tın'lan', ha'y xalqım, ko'rsetpelerimdi, Menin' so'zlerime qulaq tu'rin'.
2 Tımsallar aytıw ushın awzımdı ashaman, O'tmishtegi sırlı sabaqlardı bayan etemen,
3 Ne esitip, bilgenimizdi, Ata-babalarımızdın' bizlerge aytıp bergenin.
4 Balalarımızdan bulardı jasırmaymız, Jaratqan İyenin' dan'qın, Onın' ku'shin, Onın' a'jayıp islerin keleshek a'wladqa bayan etemiz.
5 Jaratqan İye Yaqıp urpag'ına qag'ıydalar ornatıp, İzrailg'a nızam tayınladı.Bulardı balalarına u'yretsin dep, Ata-babalarımızg'a buyrıq berdi.
6 Solay etip, keleshek a'wladlar bilsin, Keleshekte tuwılatug'ın balalar da, Bulardı o'z balalarına jetkersin.
7 So'ytip, olar Qudayg'a u'mit baylasın, Qudaydın' islerin umıtpasın, Onın' buyrıqların orınlasın.
8 Ju'rekleri turaqlı bolmag'an, Ruwxları Qudayg'a sadıq bolmag'an, Atababaları sıyaqlı o'jet, qozg'alan'shı a'wlad bolmasın.
9 Sadaq ha'm oqlar menen qurallang'an Efrayım a'wladı, Sawash ku'ni keynine burılıp qashtı.
10 Olar Qudaydın' kelisimin saqlamadı, Onın' nızamı boyınsha ju'riwden bas tarttı.
11 Umıttı Onın' islerin, O'zlerine ko'rsetken ka'ramatların.
12 Mısırda, Soan dalasında, Ol ka'ramat isledi ata-babalarının' ko'z aldında,
13 Ten'izdi ekige bo'lip, olardı alıp o'tti, Suwlardı diywal sıyaqlı etip qoydı.
14 Ku'ndiz bult penen, Tu'nde ottın' jaqtısı menen olardı alıp ju'rdi.
15 Sho'lde jartaslardı qaq ayırıp, Ten'izdey mol etip suw berdi.
16 Jartastan bulaqlar ashıp, Suwlardı da'ryaday ag'ızdı.
17 Biraq olar Onın' aldında gu'na islewdi, Sho'lde Quday Taalag'a qarsı bas ko'teriwdi dawam etti:
18 Olar arnawlı tu'rde Qudaydı sınap, Kewli ku'segen awqattı talap qıldı.
19 Olar Qudayg'a qarsı so'ylep, bılay dedi: «Quday sho'lde dasturxan jaya ala ma?
20 Mine, Ol tastı urıp, suw shıg'ardı, Suwdı da'rya qılıp ag'ızdı. Endi xalqına nan bere ala ma, Go'sh penen de ta'miyinley ala ma?»
21 Jaratqan İye bunı esitip, qattı g'a'zeplendi, Yaqıpqa qarsı otın lawlatıp, İzrailg'a qa'ha'rin shashtı.
22 Olar Qudayg'a isenbedi, Onın' qutqarıwınan u'mit etpedi.
23 Ol joqarıdag'ı bultlarg'a buyrıq berip, Aspan qaqpaqların ashtı.
24 Xalıqqa jeytug'ın manna jawdırdı, Ko'ktegi da'nnen berdi olarg'a.
25 Adamlar perishtelerdin' nanın jedi, Toyg'anınsha awqat jiberdi olarg'a.
26 Shıg'ıs samalın estirdi aspanda, Qu'direti menen qubla samalın alıp keldi.
27 Shan'day qılıp, olarg'a go'sh, Ten'iz qumınday mol etip quslar jawdırdı.
28 Olardı ordasının' ortasına, Ma'kan qılg'an jerdin' do'geregine qondırdı.
29 Solay etip, xalıq toyg'anınsha jedi, Qa'legeninshe olarg'a Quday berdi.
30 Biraq olardın' ku'sewi qaytpay turıp, Awqatları ele awzında eken,
31 Qudaydın' g'a'zebi olarg'a shashıldı, En' ku'shlilerin o'ltirdi, Jerge qulattı İzraildın' jas jigitlerin.
32 Bug'an qaramastan, olar dawam etti gu'na islewin, Onın' a'jayıp islerine isenbedi.
33 Sonın' ushın, Quday olardın' ku'nlerin biyhudalıq penen, Jılların qorqınısh ishinde aqırına jetkerdi.
34 Quday olardı o'ltirip baslag'anda, Olar Onı izlep, qayta bet burdı, Pu'tkil barlıg'ı menen Qudaydı izledi.
35 Quday – o'zlerinin' qorg'awshı jartası ekenin, Quday Taala – a'mengeri ekenin esledi.
36 Biraq awızları menen Og'an jag'ımpazlıq qıldı, Tilleri menen Onın' aldında o'tirik so'yledi.
37 Onın' aldında ju'rekleri sadıq bolmadı, Onın' kelisimine biyopalıq qıldı.
38 Degen menen, Quday rehimli, Gu'nalardı keshiredi, gu'nakarlardı joq etpeydi, Ko'p ma'rte O'z g'a'zebin basadı, Qa'ha'rin tolıq shashpaydı.
39 Quday olardın' ta'nnen ibarat ekenin, Esip o'tip, qaytıp kelmeytug'ın samal ekenin esledi.
40 Sho'lde Og'an qarsı neshshe ret bas ko'terdi, Qula du'zde Onı qapa qıldı.
41 Qayta-qayta sınadı Qudaydı, İzraildın' Muxaddesin irenjitti.
42 Eslemedi Onın' qu'diretli qolın, O'zlerin dushpannan qutqarg'an ku'nin.
43 Mısırda ko'rsetken belgilerin, Soan dalasında islegen ka'ramatların.
44 Sonda Mısırdın' o'zeklerin qang'a aylandırdı, Olar suwlarınan ishe almay qaldı.
45 Olarg'a shaqsın dep, iytshıbın, Wayran qılsın dep, qurbaqalar jiberdi.
46 Olardın' eginlerin ha'm qol miynetlerin, Shegirtkelerge tapsırdı.
47 Burshaq penen ju'zimzarların, Jabayı a'njir ag'ashların joq etti.
48 Olardın' iri malların burshaqtın', Su'riwlerin jıldırımnın' astında qaldırdı.
49 Olardın' u'stine otlı g'a'zebin shashtı, Olarg'a ashıw, qa'ha'r ha'm azap, Apat alıp keletug'ın perishtelerin jiberdi.
50 O'z qa'ha'rine jol qoydı, Olardı o'limnen saqlamadı, Janların illetke duwshar qıldı.
51 Qırıp tasladı Mısırdag'ı barlıq tun'g'ıshlardı, Xamnın' shatırlarındag'ı belindegi ku'shinin', Birinshi jemisi bolg'an balaların.
52 O'z xalqın qoy sıyaqlı jeteklep shıqtı, Sho'lde su'riwdey etip baslap ju'rdi.
53 Olardı aman-esen alıp ju'rdi, olar qorqpadı, Dushpanları bolsa, ten'izge g'arq boldı.
54 Olardı O'zinin' muxaddes jerine, Qu'diretli on' qolı menen erisken tawlı u'lkege alıp keldi.
55 Aldılarınan basqa xalıqlardı quwıp shıg'ardı, Jerlerin olarg'a mu'lik etip, bo'lip berdi, İzrail urıwların olardın' shatırlarına jaylastırdı.
56 Biraq olar ele de Qudaydı sınadı, Quday Taalag'a qarsı bas ko'terdi, Onın' ta'rtiplerine boysınbadı.
57 Ata-babaları sıyaqlı opasızlıq qılıp, qıyanet etti, Jaramsız sadaq yan'lı isenimsiz boldı.
58 Tabınatug'ın orınları menen Onı irenjitti, Mu'sin qudayları menen Onın' qızg'anıshın oyattı.
59 Quday bulardı esitip, g'a'zebi lawladı, İzraildan pu'tkilley ju'z burdı.
60 Adamlar arasındag'ı ma'kan jerin, Shilodag'ı Muxaddes ma'kanın ta'rk etti.
61 O'z qu'diretin tutqınlıqqa, O'z saltanatın dushpan qolına tapsırdı.
62 Xalqın qılısh ju'zine tapsırdı, O'z menshik xalqına g'a'zeplendi.
63 Jas jigitlerin ot jalmadı, Jas qızlarına toy qosıqları aytılmadı.
64 Ruwxaniyleri qılıshtan o'ldi, Jesirleri joqlaw da ayta almadı.
65 Biraq İye uyqıdan oyang'anday, Sharaptın' ta'sirinen qıshqırg'an batırday qozg'aldı.
66 Dushpanların shegindirip, jen'iliske ushırattı, Olardı ma'n'gi shermendelikke duwshar qıldı.
67 Keyin Ol Yusuptin' urpag'ınan bas tarttı, Efrayım urıwın tan'lamadı.
68 Biraq Yahuda urıwın, O'zi su'ygen Sion tawın tan'ladı.
69 O'z muxaddes İbadatxanasın aspan sıyaqlı qurdı, Onı jer ju'zindey etip ma'n'gi bekkemledi.
70 O'z qulı Dawıttı tan'ladı, Qoy qorasınan onı shaqırıp aldı.
71 O'z xalqı Yaqıptı, menshigi İzraildı bag'ıw ushın, Sawlıq qoylardın' arasınan alıp keldi.
72 Solay etip, ol xalqına a'dalatlıq penen shopanlıq qıldı, Sheber qolları menen olardı jetekledi.
