1 Atqarıwshılardın' jetekshisine. Asaftın' jırı. «Lala gu'llerdin' kelisimi» namasına aytıladı
2 İzraildın' shopanı! Qulaq sal, Yusupti qoy sıyaqlı alıp ju'riwshi, Nurın'dı shash, kerublar arasında taxtta otırg'an.
3 Efrayım, Benyamin ha'm Menashshe aldında, O'z ku'shin'di ko'rset, Kelip, bizlerdi qutqar.
4 Quday! Bizlerdi aldıng'ı halımızg'a qaytar, Bizlerge ju'zin'nin' nurın shash, qutqarılayıq!
5 Jaratqan İye, A'lemnin' Qudayı! Qashang'a deyin, xalqın'nın' duwalarına qa'ha'rlenesen'?
6 Bizlerge nan ornına ko'z jas berdin', Ko'z jasqa a'bden toydırdın'.
7 Qon'sılarımızdı bizlerge qarsı iytermeledin', Dushpanlarımız ku'ler u'stimizden.
8 A'lemnin' Qudayı! Bizlerdi aldıng'ı halımızg'a qaytar, Bizlerge ju'zin'nin' nurın shash, qutqarılayıq!
9 Mısırdan bir ju'zim ag'ashın alıp kelip, Basqa xalıqlardı quwıp, onı otırg'ızdın'.
10 Ol ushın jer tayarlap, tazaladın', Ol tamır jayıp, eldi toltırdı.
11 Ko'len'kesi tawlardı qapladı, Shaqaları na'ha'n kedr ag'ashın qapladı.
12 Shaqaları sozıldı Jer Orta ten'izine deyin, Bo'rtikleri bolsa, Evfrat da'ryasına deyin.
13 Ne ushın qulattın' onın' diywalların? Joldan o'tkenlerdin' ha'mmesi ju'zimin julsın dep pe?
14 Tog'aydag'ı don'ızlar onı qoparıp taslaydı, Jabayı haywanlar jep qoyadı.
15 A'lemnin' Qudayı, bizlerge ju'zin'di bur, Ko'klerden qarap, na'zer sal, G'amxorlıq qıl usı ju'zim ag'ashına.
16 On' qolın' menen otırg'ızg'anın'dı, O'zin' ushın ku'sheytken na'lin'di qorg'a!
17 Dushpanlarımız onı otqa jag'ıp, qırqıp atır, G'a'zebin' menen olardı o'ltir.
18 Ja'rdem qolın' on' ta'repin'degilerdin' u'stinde, O'zin' ushın ta'rbiyalag'an xalqın'nın' u'stinde bolsın.
19 Bizler Sennen hesh qashan bezbeymiz, Bizlerdi qayta tirilt, atın'dı shaqıramız.
20 Jaratqan İye, A'lemnin' Qudayı! Bizlerdi aldıng'ı halımızg'a qaytar, Bizlerge ju'zin'nin' nurın shash, qutqarılayıq!
