Zabur 85 bob
1 Jaratqan İye, qulaq salıp, juwap ber mag'an, Men g'a'rip ha'm mu'ta'jben.
2 Janımdı qorg'a, Sag'an sadıqpan, Qudayım, Sag'an u'mit baylag'an qulın'dı qutqar!
3 Mag'an miyrim-sha'pa'a'tin'di tu'sir, İye, Sag'an ku'ni boyı jalbarınaman.
4 Qulın'nın' qa'lbin quwanıshqa toltır, Ju'regimdi ashaman Sag'an, İye.
5 Sen iygilikli ha'm keshirimlisen', İye, Seni shaqırg'anlardın' ha'mmesine su'yispenshiligin' mol+
6 Qulaq sal menin' duwama, Jaratqan İye, Jalbarıng'an dawısıma dıqqat et!
7 Qıyın ku'nlerimde Seni shaqıraman, Sen meni esitesen'.
8 Qudaylar arasında Sag'an ten'lesetug'ını joq, İye, Senin' islerin'dey isler joq.
9 Sen jaratqan barlıq milletler, İye, Senin' aldın'a kelip, ta'jim qıladı, Senin' atın'dı dan'qqa bo'leydi.
10 Sen ullısan', a'jayıp isler isleysen', Sen jalg'ız Qudaysan'.
11 aratqan İye, jolın'dı mag'an u'yret, Sag'an sadıq bolıp ju'reyin, Senin' atın'nan qorqatug'ın etip, ju'regimdi bekkemle.
12 Quday İyem, shın ju'regim menen alg'ıslayman, Senin' atın'dı ma'n'gi dan'qqa bo'leymen.
13 Mag'an degen su'yispenshiligin' ullı, Janımdı o'liler ma'kanının' tun'g'ıyıg'ınan aman saqlaysan'.
14 Quday, arsızlar mag'an qarsı ko'terildi, Qaraqshılar toparı janımdı alıw ushın meni izlep ju'r, Olar Seni pisent etpeydi.
15 Sen, İye, rehimli ha'm miyrimli Qudaysan', Sabır-taqatlı, su'yispenshiligin' sheksiz ha'm sadıqsan'.
16 Awhalıma qara, rehim qıl mag'an, Qulın'a ku'sh-quwat ber, Shorın'nın' ulın qutqar.
17 Qayırqomlıg'ın'nan bir belgi ko'rset mag'an, Meni jek ko'retug'ınlar ko'rip, uyalıp qalsın. Jaratqan İye, ja'rdem ko'rsetip, Mag'an jubanısh bergen O'zin'sen'.
