1 Qosıq. Qorax a'wladının' jırı. Atqarıwshılardın' jetekshisi ushın. Mun'lı aytılatug'ın Ezraxlı Hemannın' ayrıqsha jırı
2 Jaratqan İye, meni qutqarıwshı Quday, Ku'ni-tu'ni aldın'a kelip, jalbarınaman.
3 Duwam Senin' aldın'a jetip barsın, Qulaq sal jalbarınıwıma.
4 Janım azapqa tolı, O'mirim o'liler ma'kanına jaqınlastı.
5 Qa'birge kirgenler arasında dep esaplanaman, Hal-da'rmanı qalmag'an adamg'a uqsayman.
6 Men o'liler arasına taslang'anman, Sen endi eske almaytug'ın, Ja'rdem qolın'nan mahrum bolg'an, Qazalanıp qa'birde jatırg'anlarg'a uqsayman.
7 Sen meni qa'birdin' tu'bine, Qaran'g'ılıq ha'm tun'g'ıyıqqa tasladın'.
8 G'a'zebin' u'stimdi zildey basıp, Barlıq tolqınların' menen ezdin' meni.
9 Joldaslarımnan ayırdın', Meni olarg'a jerkenishli qıldın', Qamalıp qaldım, shıg'a almayman.
10 Ko'zlerim qayg'ıdan ha'lsiregen, Ha'r ku'ni Seni shaqırdım, Jaratqan İye, Qollarımdı Sag'an jaydım.
11 Ka'ramatların'dı ko'rseter me edin' o'liler ushın? Ruwxları turıp, Seni ta'riyipler me edi?
12 Senin' su'yispenshiligin' qa'birde, Sadıqlıg'ın' nabıt bolıw ma'kanında aytıla ma?
13 Qaran'g'ılıqta Senin' a'jayıp islerin' haqqında, Umıtılıw ma'kanında a'dalatlıg'ın' haqqında aytıla ma?
14 Al men, Jaratqan İye, Seni ja'rdemge shaqıraman, Qılg'an duwam tan'da jetip barar Sag'an.
15 Ne ushın mennen ju'z burdın', Jaratqan İye, Nege ju'zin'di mennen jasırasan'?
16 Jaslıg'ımnan qıynalaman, o'limim jaqın qalg'an, Qorqınıshın' aldında sharasız qaldım.
17 Qa'ha'rli g'a'zebin' u'stimnen basıp tasladı, Qorqınıshların' meni tamam qıldı.
18 Ku'ni boyı bular suw sıyaqlı orap aldı, Do'geregimdi pu'tkilley qorshap aldı.
19 Doslarımnan ha'm jaqınımnan ayırdın', Tek g'ana qaran'g'ılıq joldasım bolıp qaldı.
