1 Ezraxlı Etannın' ayrıqsha jırı
2 Jaratqan İyenin' su'yispenshiligin ma'n'gi jırlayman, Sadıqlıg'ın a'wladtan-a'wladqa ja'riyalayman.
3 Su'yispenshiligin' ma'n'gi ornalasqan, Sadıqlıg'ın'dı ko'klerde bekkemledin', deymen.
4 Sen bılay dedin': «Tan'lag'anım menen kelisim du'zdim, Qulım Dawıtqa bılay dep ant ishtim:
5 „Urpag'ın'dı ma'n'gi bekkem qılaman, Taxtın'dı a'wladtan-a'wladqa dawam ettiremen“».
6 Jaratqan İye, ko'kler alg'ıslar a'jayıp islerin'di, Maqtalar sadıqlıg'ın' perishteler jıyınında.
7 Ko'klerde Jaratqan İyege kim ten'lese aladı? İla'hiy barlıqlar ishinde Jaratqan İyege uqsaytug'ını bar ma?
8 Perishteler ken'esinde Quday og'ada qorqınıshlı, A'tirapındag'ılardın' ha'mmesinen aybatlı.
9 A'lemnin' Qudayı Jaratqan İye, Sen sıyaqlı ku'shli bar ma, Jaratqan İye? Sadıqlıg'ın' a'tirapın'dı orap alg'an.
10 Qutırg'an ten'izler u'stinen Sen hu'kimdarlıq qılasan', Ko'terilgen tolqınlardı Sen tınıshlandırasan'.
11 Sen Rahabtı* o'liktey etip ezip tasladın', Qu'diretli qolın' menen dushpanlardı tarqatıp jiberdin'.
12 Ko'kler Seniki, jer ju'zi de Seniki, Du'nyanı ha'm onı toltırıp turg'anlardı Sen ornattın'.
13 Arqa ha'm qublanı O'zin' jarattın', Tabor ha'm Xermon tawları atın' sebepli shadlanıp baqıradı.
14 Bilegin' ku'shli, qolın' qu'diretli, On' qolın' ha'mmesinen ba'lentte.
15 A'dillik ha'm a'dalatlıq taxtın'nın' tiykarı, Su'yispenshilik ha'm sadıqlıq aldın'da turadı.
16 Qanday baxıtlı ba'lent dawısta shadlang'an xalıq, Jaratqan İye! Olar Senin' ju'zin'nin' nurında ju'redi.
17 Ku'ni boyı Senin' atın' sebepli shadlanadı, A'dilligin' arqalı joqarı ko'teriledi.
18 Sen dan'qqa bo'leytug'ın ku'shimizsen', Irazılıg'ın' arqalı ku'shimiz artadı.
19 Qalqanımız Jaratqan İyeniki, Patshamız İzraildın' Muxaddesine tiyisli.
20 Burın ayan arqalı so'ylep, O'z sadıq adamların'a bılay dedin': «Bir jawıngerdi qollap quwatladım, Xalıq ishinen bir jigitti joqarı ko'terdim.
21 Qulım Dawıttı taptım, Muxaddes mayım menen onı mayladım.
22 Qolım onı qollap quwatlaydı, Bilegim og'an ku'sh beredi.
23 Dushpan onı alday almaydı, Jawızlar og'an zulımlıq qıla almaydı
24 Jawların onın' ko'z aldında ezemen, Onı jek ko'rgenlerdi qıraman.
25 Sadıqlıg'ım ha'm su'yispenshiligim onın' menen birge, Menin' atım menen ol jen'iske erisedi.
26 Onın' qolın ten'izdin' u'stine, On' qolın da'ryalardın' u'stine qoyaman.
27 Ol Meni shaqırıp, bılay deydi: „Sen menin' a'kemsen', Qudayımsan', Qutqarıwshı jartasımsan'“.
28 Men de onı tun'g'ısh ul qılıp alaman, Du'nyadag'ı patshalardın' en' ullısı qılaman.
29 Og'an bolg'an su'yispenshiligimdi ma'n'gi saqlayman, Onın' menen du'zgen kelisimim bekkem turadı.
30 A'wladın ma'n'gige, Taxtın ko'kler turg'ansha dawam ettiremen.
31 Eger onın' na'sili ko'rsetpelerimnen ju'z burıp, Nızamlarım boyınsha ju'rmese,
32 Qag'ıydalarımdı buzıp, Buyrıqlarımdı orınlamasa,
33 Jınayatları ushın tayaq penen uraman, Gu'naları ushın olardı jazalayman.
34 Biraq Dawıtqa bolg'an su'yispenshilikten waz keshpeymen, Sadıqlıg'ıma nemquraydı qaramayman.
35 Kelisimimdi buzbayman, Awzımnan shıqqan so'zimnen hasla qaytpayman.
36 Bir ma'rte muxaddesligim haqı ant ishtim, Dawıttı aldamayman.
37 Onın' a'wladı ma'n'gi dawam etedi, Onın' taxtı Menin' aldımda quyash yan'lı turadı.
38 Ay sıyaqlı ma'n'gi-baqıy aman turadı, Ko'klerde sadıq gu'wa boladı».
39 Biraq Sen onnan jerkenip, ju'z burdın', Maylag'an patshan'a qattı g'a'zeplendin'.
40 Qulın' menen du'zgen kelisimnen bas tarttın', Onın' tajın topıraqqa bılg'adın'.
41 Onın' barlıq diywalların qulattın', Wayran qıldın' qorg'anların.
42 Joldan o'tkenlerdin' ha'mmesi onı tonadı, Qon'sı xalıqlarg'a masqara boldı.
43 Jawlarının' on' qolın onnan joqarı qıldın', Barlıq dushpanların quwanıshqa bo'ledin'.
44 O'tkir qılıshın artqa qaytardın', Sawashta onı qollap quwatlamadın'.
45 Onın' saltanatına shek qoydın', Taxtın jerge qulattın'.
46 Onın' jaslıq ku'nlerin qısqarttın', Onı shermende qıldın'.
47 Qashang'a deyin bul dawam etedi, Jaratqan İye?! O'zin'di bizlerden ma'n'gi jasırasan' ba? Qashang'a deyin, g'a'zebin' ottay lawlap janadı?
48 Esin'e tu'sir o'mirimnin' qanshelli qısqa ekenin, Ne ushın adamzattı biyhuda jarattın'?!
49 Bul du'nyada o'mir su'rip, o'lim ko'rmeytug'ın, O'liler ma'kanının' qolınan janın qutqaratug'ın adam bar ma?
50 Qayaqta senin' burıng'ı su'yispenshiligin', İye? Dawıtqa sadıqlıq penen ant ishken edin'!
51 Esle, İye, qulın'nın' shermende bolg'anın, Barlıq xalıqlardın' xorlıqlı so'zlerin ko'terip ju'rippen.
52 Esle, dushpanların'nın' masqaralawın, Maylag'an patshan'nın' ha'r bir qa'demin masqara qılıwın.
53 Jaratqan İyege ma'n'gi alg'ıslar bolsın! Awmiyin! Awmiyin!
