1 Qudaydın' adamı bolg'an Muwsanın' duwası
2 İye, a'wladtan-a'wladqa, Bizlerdin' pana jerimiz boldın'.
3 Tawlar payda bolmasınan aldın, Jer ju'zi ha'm du'nyanı bar qılmasın'nan aldın, A'zelden ma'n'gige Sen – Qudaysan'.
4 Adamzattı topıraqqa qaytarasan', «Adam ulları topıraqqa qaytın'», – deysen'.
5 Senin' na'zerin'de mın' jıl o'tken bir ku'n sıyaqlı, O'tetug'ın tu'ngi bir na'wbetshilik yan'lı.
6 Adamlardı tasqın suw sıyaqlı ıg'ızıp ketesen', Olar tan'da umıt bolatug'ın tu's sıyaqlı, Azanda gu'llep, o'setug'ın, Al keshte solıp qalatug'ın sho'p kibi.
7 Joq bolıp ketemiz g'a'zebin'nen, Qorqınıshqa tu'semiz Senin' qa'ha'rin'nen.
8 Sen ayıplarımızdı O'zin'nin' aldın'a, Jasırın gu'nalarımız ju'zin'nin' nurı aldına qoydın'.
9 Ku'nlerimiz g'a'zebin' astında o'ter, Jıllarımız bir dem yan'lı tawısılar.
10 O'mirimiz jetpis jıl eken, Eger ku'shli bolsaq, seksen jıl bolar. A'jayıp jıllarımız da mashqala ha'm qıyınshılıqta o'tti, O'mirimiz tez o'ter, ushıp ketermiz.
11 Kim bile alar Senin' g'a'zebin'nin' ku'shin? Adamlar qorqqanday, ol sonday ku'shli!
12 Dana ju'rekke iye bolıwımız ushın, O'mirimizdin' ku'nlerin sanawdı u'yret.
13 Bizlerge qayt, Jaratqan İye! Qashang'a deyin bul dawam etedi? Qulların'a rehim qıl!
14 Tan'da bizlerdi su'yispenshiligin' menen toydır, O'mir boyı quwanıp, shadlanıp baqırayıq.
15 Bizlerdi azapqa qaldırg'an ku'nlerin'nin', Baxıtsız jasag'an jıllarımızdın' esesine, Bizlerdi shadlıqqa bo'le.
16 Senin' islerin' qulların'a, Saltanatın' olardın' balalarına ko'rinsin.
17 Quday İyemiz, Senin' bizlerge miyrimin' tu'ssin, Qol miynetimizdi tabıslı qıl, Awa, qol miynetimizdi tabıslı qıl.
