1 Atqarıwshılardın' jetekshisine. «Uldın' o'limi» namasına aytıladı. Dawıttın' jırı
2 Jaratqan İye, shın ju'rekten Seni ta'riyipleymen, Barlıq a'jayıp islerin'di ja'riyalayman.
3 Sen sebepli quwanıp, shadlanaman, Atın'a arnap, saz shertip alg'ıslayman, Quday Taala!
4 Dushpanlarım sheginip qashqanda, Su'rnigip o'ler Senin' aldın'da.
5 Meni hu'kim qılıp, dawamdı qarap shıqtın', Taxtın'a otırıp, a'dil hu'kim shıg'ardın'.
6 Qa'ha'rlenip, xalıqlardı ayıpladın', Napa'klerdi joq qıldın', Ma'n'gi-baqıy o'shirdin' olardın' atların.
7 Wayran ishinde qalıp, ma'n'gi joq boldı dushpanımız, Sen olardın' qalaların qulattın', Olar endi qaytadan eske alınbas.
8 Jaratqan İye ma'n'gi patshalıq qıladı, Hu'kim qılıw ushın O'z taxtın qurdı.
9 Ol du'nyanı basqarar a'dalatlıq penen, Hu'kim qılar xalıqlardı a'dillik penen.
10 Ezilgenler ushın Jaratqan İye biyik qorg'andur, Qıyın jag'daylarda olarg'a qorg'an bolar.
11 Seni tanıytug'ınlar, Sag'an u'mit baylar, Jaratqan İye, O'zin'di izlegenlerdi hesh qashan taslap ketpedin'.
12 Saz shertip, Sionda otırg'an Jaratqan İyeni alg'ıslan'! İslegen islerin xalıqlar arasında ja'riyalan'!
13 To'gilgen qannın' qunın talap qıladı, Ol bulardı este saqlaydı, Ezilgenlerdin' pa'riyadın umıtpaydı.
14 Rehim qıl mag'an, Jaratqan İye! Meni jek ko'rgen jawlarım azap bermekte! O'lim awzınan Sen meni qaytarasan'.
15 Sonın' ushın, qız Sionnın' da'rwazaları aldında, Sag'an alg'ıs-maqtaw aytaman, Shadlanaman, meni qutqarg'an Sensen'.
16 Xalıqlar o'zleri qazg'an shuqırg'a o'zleri tu'sti, Qurg'an torlarına o'z ayaqları ilindi.
17 A'dil hu'kimi menen Jaratqan İye O'zinin' kimligin ko'rsetti, Zalımlar o'zleri qurg'an duzaqqa tu'sti.
18 Jawızlar ha'm Qudaydı umıtqan barlıq xalıqlar, O'liler ma'kanına tu'ser.
19 Al mu'ta'j adamlar ha'mme waqıtta umıtılıp qalmas, G'a'riplerdin' u'miti ma'n'gi joqqa shıg'arılmas.
20 Tur, Jaratqan İye! Adamzat jen'ip shıqpasın, Da'rgayın'da xalıqlar hu'kim qılınsın.
21 Olarg'a qorqınısh ber, Jaratqan İye! Xalıqlar o'zlerinin' adamzat ekenin bilsin.
22 Jaratqan İye, ne ushın uzaqta turıpsan', Qıyın jag'daylarda O'zin'di jasırasan'?
23 Jawızlar menmenlik penen g'a'riplerdi awlaydı, O'z basına jetsin toqıg'an hiyleleri.
24 Jawız adam jawız ha'wesleri menen maqtanar, Ashko'z adam Jaratqan İyege na'let aytıp, Onı mensinbes.
25 Qudayg'a qaray umtılmaydı ta'kabbir zalımlar, Ha'mme waqıtta «Quday joq», – dep oylaydı olar.
26 Zalımlar ha'mme waqıtta tabısqa eriser, Qudaydın' buyrıqlarına aqılı jetpes, Olar dushpanların pisent etpes.
27 Olar o'z kewlinde bılay dep oylaydı: «Bizler hesh qashan su'rnikpeymiz, A'wladtan-a'wladqa apatqa dus kelmeymiz».
28 Jawızlardın' awzı na'letke, hiylege, zulımg'a tolı, Tilinin' astında tur jawızlıq ha'm jaman so'zler.
29 Olar awıllarda jasırınıp aladı, An'lıp, ayıpsız adamdı o'ltiredi. Ko'zleri sharasız qalg'an qurbandı izleydi.
30 Buqqıda jatqan arıslan sıyaqlı, Biysharanı uslayman, dep tasada jatadı. O'z torına ilindirip, g'a'ripti uslap aladı.
31 Biyshara jen'ilip, qulaydı, Jawızdın' oljasına aylanadı.
32 Olar o'z kewlinde: «Quday qılmıslarımızg'a itibar bermeydi, Ju'zin jawıp alg'an, hesh qashan ko'rmeydi», – dep oylaydı.
33 Tur, Jaratqan İye, qolın'dı soz, Quday! Ezilgenlerdi umıtpa!
34 Ne ushın jawızlar Seni mensinbeydi? Ne ushın olar o'z kewlinde: «Quday mennen esap soramaydı», – deydi?
35 Al Sen ezilgenlerdi ha'm azap shekkenlerdi ko'resen', Ja'rdem beriw ushın olarg'a na'zer salasan', Sharasız qalg'anlar o'zlerin Sag'an tapsıradı, Jetimlerdin' ja'rdemshisi O'zin'sen'.
36 Napa'k ha'm jawızdın' qolların sındırıp tasla, Qılmısları ushın olardan esap sora, Basqa jawızlıq qılmasın olar.
37 Jaratqan İye ma'n'gi-baqıy patshadur, Joq boladı Onın' elinen basqa xalıqlar.
38 Jaratqan İye, ezilgenlerdin' tilegin esitesen', Jigerlendirersen' olardı, Jetim ha'm ezilgenlerdin' dadına qulaq salıp,
39 Hesh adam bendesi olardı qorqınıshqa salmasın, dep, A'dillik qılasan' olarg'a.
