1 Quday Taalanın' panasında jasag'an adam, Qu'direti ku'shli Qudaydın' sayasında tu'neydi.
2 Jaratqan İyege bılay deymen: «Sen menin' panamsan', bekinisimsen', Men u'mit baylag'an Qudayımsan'».
3 So'zsiz Ol seni an'shının' duzag'ınan, O'ltiretug'ın illetten qutqaradı.
4 Ol seni oraydı O'z pa'rleri menen, Onın' qanatlarının' astınan pana tabasan', Onın' sadıqlıg'ı qalqanın' ha'm qorg'an diywalın' boladı.
5 Sonda sen tu'nde qa'wip-qa'terden, Ku'ndiz ushqan oqlardan,
6 Qaran'g'ılıqta keletug'ın illetten, Tu'ski waqıtta qırg'ın keltiretug'ın apattan qorqpaysan'.
7 Qaptalın'da mın' adam, On' ta'repin'de on mın' adam qırılsa da, Bul apatlar sag'an jaqınlamaydı.
8 Tek g'ana sen o'z ko'zin' menen, Jawız adamlardın' jazalanıwın ko'resen'.
9 Eger Jaratqan İyeni o'z panan', Quday Taalanı ma'kanlaytug'ın jerin' qılsan',
10 Ba'lege duwshar bolmaysan', Shatırın'a apat jaqınlamaydı.
11 Ol perishtelerine buyrıq beredi, Perishteler barlıq jolların'dı qorg'aydı.
12 Ayag'ın'dı tasqa urıp almawın' ushın, Olar seni qollarında alıp ju'redi.
13 Arıslan ha'm jılannın' u'stinen basıp o'tesen', Ku'shli arıslan ha'm jılandı basqılap taslaysan'.
14 Jaratqan İye bılay deydi: «Meni su'ygeni ushın, onı qutqaraman, Menin' atımdı bilgeni ushın, onı aman saqlayman.
15 Meni shaqırg'anda, og'an juwap beremen, Basına is tu'skende, onın' qasında bolaman, Onı qutqarıp, izzet ko'rsetemen.
16 Og'an uzaq o'mir bag'ıshlayman, O'z qutqarıwımdı og'an ko'rsetemen».
