1 O'sh alıwshı Quday, Jaratqan İye, O'sh alıwshı Quday, nurın'dı shash!
2 Tur, jer ju'zin hu'kim etiwshi, Menmenlerge ılayıqlı jazasın ber!
3 Jawızlar qashang'a deyin, Jaratqan İye, Qashang'a deyin, u'stem bolıp shadlanadı?
4 Awızlarınan menmen so'zler shıg'ıp, Zalımlardın' ha'mmesi maqtanıp atır.
5 Jaratqan İye, olar xalqın'dı ezip, O'zin' tan'lag'an xalqın'a azap berip atır.
6 Jesir ha'm kelgindini o'ltirip, Jetimlerdi joq qılıp atır.
7 Olar: «Jaratqan İye ko'rmeydi, Yaqıptın' Qudayı itibar bermeydi», – deydi.
8 Ha'y, xalıqtın' ishindegi oysızlar, dıqqat etin', Ha'y, aqmaqlar, qashan sizlerge aqıl kiredi?
9 Qulaqtı jaratqan esitpey me? Ko'zdi do'retken ko'rmey me?
10 Milletlerge ta'rtip bergen, Adamzatqa bilim bergen jazalamay ma?
11 Jaratqan İye adamzattın' pikirlerin, Ha'm onın' biyhuda ekenin biledi.
12 Jaratqan İye, qanday baxıtlı Sen ta'rtip bergen, Nızamın'dı O'zin' u'yretken adam!
13 Qıyın ku'nlerde og'an tınıshlıq beresen', Jawızlar ushın shuqır qazılg'ansha, ol aman boladı.
14 Awa, Jaratqan İye xalqın taslap ketpeydi, O'z menshik xalqın ta'rk etpeydi.
15 Hu'kimnin' tiykarı ja'ne a'dalat boladı, A'dil adamlar onın' izine eredi.
16 Kim meni qorg'aw ushın jawızlarg'a qarsı shıg'adı? Kim men ushın zalımlarg'a qarsı turadı?
17 Eger Jaratqan İye mag'an ja'rdem bermegende, Janım u'nsiz o'lim ma'kanına tu'ser edi.
18 «Ayag'ım tayıp atır», – degenimde, Senin' su'yispenshiligin' meni qolladı, Jaratqan İye.
19 İshim qayg'ı-uwayımg'a tolıp ketkende, Senin' jubanıshın' kewlimdi ko'terdi.
20 Qag'ıydanı ba'nelep, nahaqlıq qılg'an hu'kimdar, Senin' menen sherik bola ala ma?
21 Olar haq adamg'a qarsı birlesedi, Ayıpsızg'a o'lim jazasın beredi.
22 Biraq Jaratqan İye menin' qorg'anım, Qudayım, panalaytug'ın jartasım.
23 Qudayımız Jaratqan İye olardın' jawız islerin, O'z basına keltiredi. Jawızlıqları ushın olardı joq qıladı, Awa, olardı joq qıladı.
