Shıg'ıw 1 bob
1 Yaqıp penen birge xojalıqları menen Mısırg'a kelgen İzrail ullarının' atları mınalar edi:
2 Ruben, Shimon, Lebiy, Yahuda, 3 İssaxar, Zebulon, Benyamin,
3 İssaxar, Zebulon, Benyamin,
4 Dan, Naftaliy, Gad ha'm Asher.
5 Yaqıptın' urpag'ınan shıqqanlar barlıg'ı bolıp jetpis adam edi. Al Yusup a'lle qashan Mısırda edi.
6 Waqtı kelip, Yusup, onın' tuwısqanları ha'm sol a'wladtın' ha'mmesi du'nyadan o'tti.
7 Biraq İzrail urpaqları o'sip-o'nip, barg'an sayın sansız ko'beyip, ku'sheygeni sonshelli, Mısır eli olarg'a tolıp ketti.
8 Sol waqıtta Mısır taxtına Yusupti tanımaytug'ın jan'a patsha otırdı.
9 Patsha o'z xalqına: «Minekey, İzrail xalqının' sanı ju'da' ko'beyip, ku'shli bolıp baratır.
10 Kelin'ler, ko'beyip ketpewi ushın olarg'a qarsı hiyle qollanayıq. Bolmasa, urıs bolg'an jag'dayda, olar dushpanlarımızg'a qosılıp ketiwi ha'm bizlerge qarsı urısıp, elimizden ketip qalıwı mu'mkin», – dedi.
11 Solay etip, mısırlılar izraillılarg'a awır jumıslardı isletip, eziw ushın, olardın' u'stinen qul jumsaytug'ın basshılardı tayınladı. İzraillılar faraon ushın Pitom ha'm Ramses degen telekleri bar qalalardı saldı.
12 Degen menen, mısırlılar izraillılardı qanshelli ezgen sayın, olar sonshelli ko'beyip, artıp bardı. Sonda mısırlılar qorqınıshqa tu'sip,
13 izraillılardı ayawsız tu'rde jumıs islewge ma'jbu'rledi.
14 Olardı ha'r tu'rli atız jumısların, ılay sog'ıw ha'm gerbish quyıwday awır jumıslardı islewge ayawsız ma'jbu'rlep, turmısın qıyınlastırdı.
15 Mısır patshası Shifra ha'm Puwa degen evreylerdin' kindik sheshelerine buyırıp:
16 – Evrey hayalların tuwdırıp atırg'anın'ızda, dıqqatlı bolın': eger ul tuwılsa, o'ltirin', al eger qız tuwılsa, tiri qaldırın', – dedi.
17 Biraq kindik shesheler Qudaydan qorqatug'ın edi. Sonlıqtan olar Mısır patshasının' aytqanın islemey, ul balalardı tiri qaldırdı.
18 Sonda Mısır patshası kindik sheshelerdi shaqırtıp alıp: – Nege bulay islep atırsızlar? Nege ul balalardı tiri qaldırıp atırsızlar? – dep soradı.
19 Kindik shesheler og'an juwap berip: – Evrey hayalları mısırlı hayallarg'a uqsamaydı. Olar ju'da' qarıwlı bolıp, bizler barmastan aldın-aq, tuwıp aladı, – dedi.
20 Bul isi ushın Quday kindik sheshelerge jaqsılıq isledi. Al İzrail xalqı ko'beyip, barg'an sayın ku'shi artıp bardı.
21 O'zinen qorqqanı ushın, Quday kindik sheshelerge urpaq berdi.
22 Sonnan keyin, faraon o'zinin' pu'tkil xalqına: «Evreylerdin' tuwılg'an ha'r bir ul balasın Nil da'ryasına taslan'lar, al qız balaların tiri qaldırın'lar», – dep buyırdı.
