Shıg'ıw 11 bob
1 Jaratqan İye Muwsag'a bılay dedi: – Faraonnın' basına ha'm Mısır eline ja'ne bir ba'le jawdıraman. Sonnan keyin, ol ketiwin'izge ruxsat etedi, ha'tte, sizlerdi bul jerden pu'tkilley quwıp shıg'aradı.
2 Sen izraillılarg'a ayt, ha'r bir er adam ha'm ha'r bir hayal qon'sısınan gu'mis ha'm altın buyımlardı sorap alsın.
3 Jaratqan İye İzrail xalqın mısırlılarg'a unamlı etip ko'rsetti. Muwsa da Mısırda faraonnın' xızmetkerlerinin' ha'm xalqının' aldında ma'rtebeli edi.
4 Solay etip, Muwsa faraong'a: – Jaratqan İye bılay deydi: «Tu'nnin' yarımında Mısırdı aralap o'temen.
5 Sonda Mısırdag'ı ha'mme tun'g'ısh ullar: taxtında otırg'an faraonnın' balasınan, digirman tartatug'ın shorı hayaldın' balasına deyin, sonday-aq barlıq mallardın' tun'g'ısh to'lleri o'ledi.
6 Pu'tkil Mısır eli burın bolmag'an ha'm endi qaytıp bolmaytug'ın dad salıp way-waylasqan dawıslarg'a tolıp ketedi.
7 Al izraillılardın' hesh bir adamına, ya malına hesh qanday zıyan tiymeydi. Usı arqalı sizler Menin', Jaratqan İyenin' izraillılar menen mısırlılar arasına qanday ayırmashılıq qoyg'anımdı bilip alasız»
8 Sonda mına xızmetkerlerin'nin' ha'mmesi kelip, mag'an ta'jim etip: «Sen de ket, senin' izin'e ergen pu'tkil xalıq ta ketsin», – deysizler. Sonnan son', men ketemen, – dedi. Muwsa faraonnın' aldınan qattı qa'ha'rlenip shıg'ıp ketti.
9 Keyin Jaratqan İye Muwsag'a: – Mısırda Menin' ka'ramatlarım ko'beyiwi ushın, faraon sizlerdi tın'lamaydı, – dedi.
10 Solay etip, Muwsa menen Xaron faraonnın' aldında usı barlıq ka'ramatlardı isledi. Biraq Jaratqan İye faraonnın' ju'regin qatal qılıp qoyg'anlıqtan, ol izraillılardı o'z jerinen jibermedi.
