Shıg'ıw 19 bob
1 İzraillılar Mısırdan shıqqannan keyingi u'shinshi aydın' birinshi ku'ni Sinay sho'line jetip keldi.
2 Olar Refidimnen jolg'a shıqqan bolıp, Sinay sho'line jetip kelgen edi. Olar sol jerde, Sinay tawının' qarsısına shatırların tikti+.
3 Sonda Muwsa tawg'a, Qudaydın' da'rgayına shıqtı. Jaratqan İye og'an tawdan bılay dedi: – Yaqıp na'siline, İzrail xalqına bılay de:
4 «Mısırlılarg'a ne islegenimdi, palapanların qanatları menen tasıg'an bu'rkit sıyaqlı, sizlerdi janıma a'kelgenimdi ko'rdin'ler.
5 Al endi so'zlerimdi dıqqat penen tın'lap, kelisimime a'mel qılsan'lar, sizler barlıq xalıqlar ishinde Menin' g'a'ziynem bolasızlar. Sebebi pu'tkil jer ju'zi Mag'an tiyisli.
6 6Sizler Menin' ushın ruwxaniyler patshalıg'ı ha'm muxaddes xalıq bolasızlar». Senin' izraillılarg'a aytatug'ın so'zlerin' usılar+.
7 Muwsa kelip, xalıq aqsaqalların shaqırıp aldı da, o'zine Jaratqan İyenin' buyırg'an barlıq so'zlerin olarg'a bildirdi.
8 Pu'tkil xalıq bir awızdan: «Jaratqan İyenin' aytqanlarının' ha'mmesin orınlaymız», – dep juwap berdi. Muwsa xalıqtın' juwabın Jaratqan İyege jetkizdi.
9 Sonda Jaratqan İye Muwsag'a: – Senin' menen so'yleskenimdi xalıqtın' esitiwi ha'm sag'an ma'n'gige iseniwi ushın, Men sag'an bir qalın' bult ishinde kelemen, – dedi. Muwsa xalıqtın' so'zlerin Jaratqan İyege jetkizgende,
10 Jaratqan İye Muwsag'a bılay dedi: – Bar, bu'gin ha'm erten' xalıq pa'klensin. Olar kiyimlerin juwıp,
11 u'shinshi ku'ni tayar bolsın. O'ytkeni u'shinshi ku'ni Men, Jaratqan İye pu'tkil xalıqtın' ko'z aldında Sinay tawına tu'semen.
12 Xalıq ushın tawdın' a'tirapına shegara sızıp, belgile ha'm olarg'a: «Abaylan'lar, tawg'a shıg'ıwshı bolman'lar, tawdın' etegine de jaqınlaman'lar! Tawg'a bir jerin tiygizgen ha'r bir adam so'zsiz o'ltiriledi.
13 Sol adamg'a qol tiygizilmey, tas boran qılınıp, ya bolmasa oq jay menen o'ltiriledi. Haywan bolsa da, adam bolsa da, ol tiri qalmaydı», – dep ayt. Tek ka'rnay uzaq shertilgende g'ana, olar tawg'a ko'terile aladı.
14 Son'ınan Muwsa tawdan xalıqtın' qasına tu'sip, olarg'a pa'kleniwdi buyırdı. Ha'r bir adam kiyimlerin juwdı.
15 Muwsa xalıqqa: – U'shinshi ku'ni tayar bolın'lar. Bul waqıt ishinde hayalların'ızg'a jaqınlaman'lar, – dedi.
16 U'shinshi ku'ni tan' atıwdan gu'ldirmama gu'rkirep, shaqmaq shaqtı. Tawdın' u'stin qalın' bult qaplap, ba'lent, ku'shli dawıslı ka'rnay sesti esitildi. Ordadag'ı pu'tkil xalıq titirey basladı.
17 Muwsa xalıqtı Quday menen ushırastırıw ushın, ordadan baslap shıqtı. Olar tawdın' etegine kelip turdı.
18 Quday Sinay tawına ot ishinde tu'skenlikten, pu'tkil taw tu'tep turg'an edi. Tawdan peshten shıqqanday tu'tin shıg'ıp, pu'tkil taw qattı silkinip turg'an edi.
19 Ka'rnay sesti barg'an sayın ku'sheye berdi. Muwsa Qudayg'a so'yledi ha'm Quday da og'an dawıslap juwap berdi.
20 Jaratqan İye Sinay tawının' to'besine tu'sip, Muwsanı tawdın' to'besine shaqırdı. Muwsa sol jerge shıqtı.
21 Jaratqan İye og'an bılay dedi: – To'men tu'sip, xalıqtı eskert. Meni ko'riw ushın, shegaradan shıg'ıp ketpesin. Bolmasa, ko'bisi o'lip qaladı.
22 Mag'an jaqınlasatug'ın ruwxaniyler de o'zlerin pa'klesin. Bolmasa, olarg'a qarsı shıg'aman.
23 Muwsa Jaratqan İyege: – Xalıq Sinay tawına shıg'a almaydı. O'ytkeni Sen: «Tawdın' a'tirapına shegara sızıp, belgile ha'm tawdı muxaddes qıl», – dep eskertken edin', – dedi.
24 Jaratqan İye og'an: – To'men tu'sip, Xarondı o'zin' menen birge alıp kel. Biraq ruwxaniyler menen xalıq aldıma keliw ushın, shegaradan o'tpesin. Bolmasa, olarg'a qarsı shıg'aman, – dedi.
25 Solay etip, Muwsa to'men tu'sti de, xalıqqa usılardı aytıp berdi.
