Shıg'ıw 21 bob
1 – Sen xalıqqa ja'riyalawın' kerek bolg'an nızamlar mınalar:
2 eger sen evrey qul satıp alsan', ol altı jıl xızmet etip, jetinshi jılı esheyin azat etilsin.
3 Eger ol kelgende boydaq bolsa, jalg'ız ketsin. Al u'ylengen bolsa, onda onın' hayalı da birge ketsin.
4 Eger xojayını sol quldı u'ylendirgen ha'm hayalı og'an ul-qız tuwıp bergen bolsa, onda hayalı ha'm balaları xojayınında qalıp, quldın' bir o'zi ketsin.
5 Biraq qul: «Men xojayınımdı, hayalımdı ha'm balalarımdı jaqsı ko'remen, azatlıqqa shıqpayman», – dese,
6 onda xojayını onı qazılardın' aldına alıp kelsin ha'm onı qapının' yamasa qapının' kese ag'ashının' janında turg'ızıp, qulag'ın biz benen tessin. Sonda ol o'mir boyı xojayınına qul bolıp qaladı.
7 7Eger kim de kim qızın shorılıqqa satsa, qız erkek qullar sıyaqlı azatlıqqa shıg'a almaydı.
8 Eger xojayını sol qızdı hayallıqqa alıwdı niyet qılıp bolıp, onı jaqtırmay qalsa, onda qızdın' a'kesi ta'repinen qunı to'lenip, qızdın' azat bolıwına ruxsat etsin. Biraq o'zi aldag'anı ushın, jat adamlarg'a satıwg'a haqısı joq.
9 Eger ol qızdı ulına nekelese, onı o'z qızınday ko'rsin.
10 Al eger xojayını shorısına u'ylenip bolıp, ja'ne basqa hayal alsa, onda shorı hayalın azıq-awqattan, kiyim-kenshekten ha'm erlizayıplılıq huqıqlarınan mahrum etpesin.
11 Eger ol usı u'sh na'rseden shorını mahrum qılsa, shorı qunı to'lenbesten azat qılınsın.
12 – Kim de kim birewdi urıp o'ltirse, onın' o'zi de so'zsiz o'ltirilsin.
13 Biraq eger ol bunı abaysızda islegen bolsa, Qudayın'ız bolg'an Men usıg'an jol qoyg'an bolsam, onda sol adamnın' qashıp barıp, panalaytug'ın jerin O'zim belgilep beremen.
14 Al eger kim de kim janındag'ı adamdı qastan o'ltirip, Menin' qurbanlıq ornıma qashıp barsa da, onı sol jerden shıg'arıp alıp, o'ltirin'ler.
15 Kim de kim anasın yamasa a'kesin ursa, ol so'zsiz o'ltirilsin.
16 Kim de kim birewdi urlap, onı satsa yamasa uslap tursa, ol so'zsiz o'ltirilsin.
17 Kim de kim anasın yamasa a'kesin g'arg'asa, ol so'zsiz o'ltirilsin.
18 Eki adam ja'njellesip, birewi ekinshisin tas yamasa mush penen ursa, ol o'lmegeni menen, to'sek tartıp jatıp qalsa,
19 keyin ornınan turıp, dalag'a tayaq penen shıg'a alatug'ın bolsa, onda urg'an adam ayıpsız bolıp esaplanadı. Tek ol jaraqat alg'an adamg'a onı jumısınan qaldırg'anı ushın ha'm tolıq emleniwi ushın pul to'lesin.
20 Eger kim de kim qulın yamasa shorısın tayaq penen urıp o'ltirse, ol jazalansın.
21 Biraq eger qul da'rhal o'lmey, al bir-eki ku'nnen son' o'lse, quldın' xojayını jazalanbasın. Sebebi qul onın' o'z menshigi.
22 Birewler to'belesip atırıp, bir ha'miledar hayaldı urıp alsa ha'm hayal shala tuwıp qoysa, biraq basqa zıyan ko'rmese, onda zıyan jetkizgen adam hayaldın' ku'yewi talap qılg'an ha'm qazılar belgilegen mug'darda qun to'lesin.
23 Al eger basqa zıyan jetkizilgen bolsa, jang'a jan,
24 ko'zge ko'z, tiske tis, qolg'a qol, ayaqqa ayaq alınıp,
25 ku'yik ushın ku'ydirilip, jaraqat ushın jaraqat salınıp, ko'gergen ushın ko'gertilsin.
26 Eger kim de kim qulının' yamasa shorısının' ko'zine urıp, soqır qılsa, ko'zi ushın onı azatlıqqa shıg'arsın.
27 Al eger qulının' yamasa shorısının' tisin sındırsa, tisi ushın onı azatlıqqa shıg'arsın.
28 Eger bir er adamdı yamasa bir hayaldı o'giz su'zip o'ltirse, o'giz tas penen urıp o'ltirilsin, al go'shi jelinbesin. O'gizdin' iyesi ayıpsız bolıp esaplansın.
29 Biraq o'giz burınnan-aq su'zewik bolıp, bul tuwralı eskertilgenine qaramay, iyesi o'gizine ko'zqulaq bolmag'an bolsa, o'giz bir er adamdı yamasa bir hayaldı o'ltirse, onda o'giz tas penen urıp o'ltirilsin. O'gizdin' iyesi de o'ltirilsin.
30 Eger o'gizdin' iyesine o'z janın saqlap qalıwı ushın qun to'lewine ruxsat etilse, ol talap qılıng'an qundı tolıg'ı menen to'lewi tiyis+.
31 Eger o'giz ul balanı yamasa qız balanı su'zip o'ltirse, onda da usı nızam qollanılsın.
32 Eger o'giz bir quldı yamasa bir shorını su'zip o'ltirse, onda olardın' xojayınına otız shekel* gu'mis berilip, o'giz tas penen urıp o'ltirilsin.
33 Eger kim de kim suw saqlanatug'ın shuqırdı ashıq qaldırsa yamasa taza shuqır qazıp, onın' awzın jappay ketse ha'm sol shuqırg'a bir o'giz yamasa eshek tu'sip ketse,
34 onda shuqırdın' iyesi maldın' qunın to'lewi tiyis. Ol maldın' iyesine pul to'lesin, al maldın' denesin o'zine alsın.
35 Eger bir adamnın' o'gizi qon'sısının' o'gizin su'zip o'ltirip qoysa, onda olar tiri qalg'an o'gizdi satıp, aqshasın ha'm o'li o'gizdin' go'shin ten' bo'lisip alsın.
36 Eger o'gizdin' su'zewik ekeni burınnan-aq belgili bolsa da, iyesi og'an ko'zqulaq bolmag'an bolsa, onda ol o'gizdin' ornına o'giz berip, o'lgen maldı o'zine alsın.
