Shıg'ıw 22 bob
1 – Eger kim de kim iri mal yamasa mayda mal urlap, onı soysa yamasa satıp jiberse, bir o'gizdin' ornına bes o'giz, bir qoydın' ornına to'rt qoy to'lesin.
2 Kim de kim tu'nde u'yge urlıqqa tu'sip atırg'an urıg'a tap bolıp, onı urıp o'ltirse, to'gilgen qan onın' moynına ju'klenbesin.
3 Biraq eger waqıya quyash shıqqannan keyin bolsa, onda qan to'kken adam ayıplı boladı. Urı urlag'an na'rsesinin' qunın tolıq to'lesin. Eger urının' to'leytug'ın hesh na'rsesi bolmasa, urlag'anların to'lewi ushın, ol qul qılıp satılsın.
4 Qara mal ma, eshek pe yamasa mayda mal ma, ne bolsa da, urlang'an mal urının' qolınan tiriley tabılsa, onda ol mal ushın eki ese qun to'lesin.
5 Eger kim de kim malların o'z atızına yamasa ju'zim bag'ına otlatıp qoyıp, mallarının' basqa birewdin' atızına tu'siwine jol qoysa, onda ol o'z atızının' yamasa bag'ının' en' jaqsı o'nimlerinen to'lesin.
6 Eger birew ot jag'ıp, bul ottan tikenler alısıp ketip, bawlang'an eginlerdi, atızdag'ı zu'ra'a'tti yamasa pu'tkil egislikti jandırıp jiberse, onda ot jaqqan adam shıg'ındı tolıq to'lesin.
7 Kim de kim qon'sısına aqshasın yamasa zatların amanat etip berse, biraq sol na'rseler qon'sısının' u'yinen urlanıp, urı tabılsa, urı urlag'an zatların eki ese etip to'lesin.
8 Al eger urı tabılmasa, u'y iyesi qazılardın' aldına barıp, amanatqa qıyanet etpegenin aytıp ant ishsin.
9 Qanday da bir dawlı na'rse: iri mal, eshek, mayda mal, kiyim-kenshek, ha'r qanday joytılg'an na'rse boyınsha: «Bul – meniki» degen talas bolsa, onda eki ta'rep ma'seleni qazılarg'a jetkizsin. Qazılar ayıplı dep tapqan adam qon'sısına eki ese to'lesin.
10 Kim de kim qon'sısına eshegin, iri malın, mayda malın yamasa qanday da bir malın amanat etip berse, sol mal o'lip qalsa yamasa jaraqat alsa, ya bolmasa urlanıp, bug'an gu'wa bolmasa,
11 onda maldı amanatqa alg'an adam qon'sısının' malına qol tiygizbegenin aytıp, Jaratqan İyenin' atı menen ant ishsin. Maldın' iyesi bunı qabıl etsin ha'm qon'sısı hesh na'rse to'lemesin.
12 Biraq alg'an adamnan sol mal urlang'an bolsa, onda ol maldın' iyesine qun to'lesin.
13 Eger maldı bir jırtqısh haywan tilkimlep taslag'an bolsa, onda baqqan adam tilkimlengen maldı da'lil etip ko'rsetiwi tiyis ha'm sol mal ushın hesh na'rse to'lemesin.
14 Eger kim de kim qon'sısınan bir mal sorap alıp tursa, iyesi joqta mal jaraqat alsa yamasa o'lip qalsa, alg'an adam mal ushın tolıq qun to'lewi tiyis.
15 Biraq iyesi maldın' qasında bolg'an bolsa, qarızg'a mal alg'an adam hesh na'rse to'lemesin. Al eger mal jallap alıng'an bolsa, onda jallang'an bahası to'leniwi tiyis.
16 – Eger kim de kim atastırılmag'an bir qızdı aldap, onın' menen jatsa, qız ushın qalın' mal berip, og'an u'yleniwi tiyis.
17 Eger a'kesi qızın sol adamg'a beriwge ırazı bolmasa, onda ol qızlarg'a beriletug'ın qalın' mal mug'darın to'lesin.
18 Sıyqırshı hayaldı tiri qaldırman'lar.
19 Haywan menen jınısıy qatnas jasaytug'ın adam so'zsiz o'ltirilsin.
20 Jaratqan İyeden basqa qudaylarg'a qurbanlıq bergen adam joq qılınsın.
21 Kelgindi adamg'a ja'bir berip, eziwshi bolman'lar. Sebebi sizler de Mısırda kelgindi boldın'lar.
22 Jesirler menen jetimlerge ja'bir bermen'ler.
23 Eger ja'bir bersen'iz, olar Mag'an jalbarınsa, olardın' nalaların so'zsiz esitemen.
24 Sonda Menin' g'a'zebim lawlap, sizlerdi qılısh penen o'ltiremen. Aqıbetinde hayalların'ız jesir, al balaların'ız jetim bolıp qaladı.
25 Menin' xalqımnan bir ka'mbag'alg'a qarızg'a aqsha bersen', o'simge pul beriwshi sıyaqlı payız mindirme.
26 Eger qon'sın'nın' shapanın girewge alsan', onı quyash batpastan burın qaytarıp ber.
27 O'ytkeni sol shapan onın' jalg'ız jamılatug'ın na'rsesi. Shapanı bolmasa, ol neni jamılıp uyıqlaydı? Solay etip, ol Mag'an jalbarınsa, onı esitemen. Sebebi Men miyrim-sha'pa'a'tlimen.
28 Qudayg'a til tiygizben'ler. Xalqın'ızdın' basshıların g'arg'aman'lar.
29 Qırmanın'ızdın' ha'm juwazların'ızdın' zu'ra'a'tinen ayap, Mag'an alıp keliwdi keshiktirmen'ler. Tun'g'ısh ulların'ızdı da Mag'an bag'ıshlan'lar.
30 İri mal ha'm mayda malların'ız benen de solay islen'ler. Olar jeti ku'n anasının' janında qalsın, al segizinshi ku'ni olardı Mag'an berin'ler.
31 Sizler Menin' muxaddes xalqım bolasızlar. Sonlıqtan dalada tilkimlenip taslang'an haywandı jemen'ler, onı iytlerge taslan'lar.
