Shıg'ıw 24 bob
1 Jaratqan İye Muwsag'a bılay dedi: – Sen, ja'ne de, Xaron, Nadab, Abihu ha'm İzrail aqsaqallarınan jetpis adam tawg'a ko'terilip, Menin' aldıma kelin'ler ha'm uzaqta turıp ta'jim etin'ler.
2 Tek sen g'ana Mag'an jaqınla, basqa hesh kim jaqın kelmesin. Xalıq senin' menen birge tawg'a shıqpasın.
3 Muwsa barıp, Jaratqan İyenin' barlıq so'zlerin ha'm nızamların xalıqqa bildirdi. Ha'mme bir awızdan: – Jaratqan İyenin' aytqanlarının' ha'mmesin isleymiz, – dep juwap berdi.
4 Sonnan keyin Muwsa Jaratqan İyenin' barlıq so'zlerin jazıp qoydı. Ol erten'ine azanda tawdın' etegine qurbanlıq orın qurdı. İzraildın' on eki urıwının' belgisi retinde on eki tas ornattı.
5 Son'ınan ol Jaratqan İyege arnap, jandırılatug'ın qurbanlıqlar berip, tatıwlıq qurbanlıg'ı ushın bug'alardı soyıwg'a İzraildın' jas jigitlerin jiberdi.
6 Muwsa qannın' yarımın la'genlerge quydı. Al qalg'an yarımın qurbanlıq orıng'a serpip jiberdi.
7 Keyin kelisim kitabın alıp, xalıqqa oqıp berdi. Xalıq: «Jaratqan İyenin' aytqanlarının' ha'mmesin isleymiz, Og'an qulaq asamız», – dedi.
8 Sonda Muwsa la'genlerdegi qandı xalıqqa sewip: «Bul – usı aytılg'an ha'mme so'zlerge tiykarlanıp, Jaratqan İyenin' sizler menen du'zgen kelisiminin' qanı», – dedi.
9 Sonnan son', Muwsa, Xaron, Nadab, Abihu ha'm İzrail aqsaqallarınan jetpisi tawg'a shıg'ıp,
10 İzraildın' Qudayın ko'rdi. Qudaydın' ayaqları astına lazurit tasına uqsas, aspan sıyaqlı tınıq bir na'rse to'selgen edi.
11 İzrail basshıları Qudaydı ko'rse de, Quday olarg'a zıyan tiygizbedi. Olar sol jerde iship-jedi.
12 Jaratqan İye Muwsag'a: – Tawg'a, Menin' janıma kelip, usı jerde ku'tip tur. Xalıqqa u'yretiw ushın, tegis eki tasqa jazılg'an nızam ha'm buyrıqlardı beremen, – dedi.
13 Solay etip, Muwsa ha'm onın' ja'rdemshisi Eshua jolg'a atlandı. Muwsa Qudaydın' tawına shıg'ıp baratırıp,
14 aqsaqallarg'a: – Bizler qaytıp kelgenshe, usı jerde ku'tip turın'lar. Xaron menen Xur sizler menen birge boladı. Kimnin' qanday isi bolsa, solarg'a aytsın, – dedi.
15 Muwsa tawg'a shıqqanda, tawdı bult qapladı.
16 Sonda Jaratqan İyenin' saltanatı Sinay tawına tu'sti. Bult tawdı altı ku'n qaplap turdı. Jetinshi ku'ni Jaratqan İye bulttın' ishinen Muwsanı shaqırdı.
17 İzraillılarg'a Jaratqan İyenin' saltanatı tawdın' to'besinde jalmap jutatug'ın ot sıyaqlı bolıp ko'rindi.
18 Muwsa bult ishine kirip, tawg'a shıqtı. Ol qırıq ku'n ha'm qırıq tu'n tawda qaldı.
