Shıg'ıw 25 bob
1 Jaratqan İye Muwsag'a bılay dedi:
2 – İzraillılarg'a ayt, Mag'an sadaqa alıp kelsin. Shın ju'regi menen bergen ha'r bir adamnın' sadaqasın qabıl etin'ler.
3 Olardan qabıl etetug'ın sadaqaların'ız mınalar: altın, gu'mis, qola,
4 ju'nnen iyirilgen qızg'ısh ko'k, shım qızıl, qırmızı jipler ha'm hasıl zıg'ır jibi, eshkinin' ju'ni,
5 qızılg'a boyalg'an qoshqar terisi, jumsaq teri ha'm akatsiya ag'ashı,
6 shıralar ushın za'ytu'n mayı, maylaw ra'simine arnalg'an may ushın ha'm tu'tetki ushın xosh iyisli zatlar,
7 bas ruwxaniydin' efodına ha'm qaltalı o'n'irshesine tag'ılatug'ın oniks ha'm qımbatbaha taslar.
8 Arasında jasawım ushın, izraillılar Mag'an arnap, Muxaddes ma'kan tayarlasın.
9 Muxaddes shatırdı ha'm onın' buyımların Men sag'an ko'rsetken u'lgige say qılıp islen'ler
10 Akatsiya ag'ashınan sandıq islen'ler. Onın' uzınlıg'ı eki yarım shıg'anaq, eni bir yarım shıg'anaq ha'm biyikligi bir yarım shıg'anaq bolsın.
11 Sandıqtın' ishi-sırtın sap altın menen qaplat. Al ernegine altın jiyek saldır.
12 Sandıq ushın to'rt altın halqa quydırıp, to'rt tuyag'ına ornattır: ekewi bir jag'ında, qalg'an ekewi ekinshi jag'ında bolsın.
13 Son'ınan akatsiya ag'ashınan sırıqlar isletip, olardı altın menen qaplat.
14 Sandıqtı ko'terip ju'riw ushın, sırıqlardı eki ta'repindegi halqalardan o'tkiz.
15 Sırıqlar halqalardan ayırıp alınbay, ha'mme waqıt halqalarg'a kirgiziwli tursın.
16 Men sag'an beretug'ın kelisim buyrıqları jazılg'an eki tastı sandıqtın' ishine salıp qoy.
17 Sandıqtın' qaqpag'ın da sap altınnan islet. Qaqpaqtın' uzınlıg'ı eki yarım shıg'anaq, eni bir yarım shıg'anaq bolsın.
18 Qaqpaqtın' eki shetine altınnan eki kerub sho'kkishlep soqtır.
19 Kerublardın' birewi qaqpaqtın' bir shetinde, al basqası ekinshi shetinde bolıp, olar qaqpaq penen bir tutas qılıp islensin.
20 Kerublardın' joqarıg'a jayılg'an qanatları qaqpaqtı jawıp, ju'zleri bir-birine qarama-qarsı tu'rde qaqpaqqa qarap tursın.
21 Qaqpaqtı sandıqtın' u'stine, Men sag'an beretug'ın taslardı bolsa, sandıqtın' ishine qoy.
22 Men senin' menen sol jerde, Kelisim sandıg'ının' u'stindegi kerublar arasında, yag'nıy qaqpaqtın' u'stinde ushırasıp, izraillılar ushın sag'an buyrıqlar beremen.
23 – Akatsiya ag'ashınan bir stol islet. Onın' uzınlıg'ı eki shıg'anaq, eni bir shıg'anaq, al biyikligi bir yarım shıg'anaq bolsın.
24 Stoldı sap altın menen qaplatıp, ernegine altın jiyek saldır.
25 Stoldın' a'tirapına to'rt eli bolg'an qaptal isletip, onı altın jiyek penen qaplat.
26 Stol ushın to'rt altın halqa isletip, olardı stoldın' to'rt mu'yeshindegi to'rt tuyaqqa ornat.
27 Stoldı ko'terip alıp ju'riwge arnalg'an sırıqlar o'tkiziletug'ın halqalar qaptallarg'a jaqın ornatılsın.
28 Sırıqlardı akatsiya ag'ashınan isletip, olardı sap altın menen qaplat. Stoldı usı sırıqlar ja'rdeminde ko'teretug'ın bolsın.
29 Ja'ne de, stol ushın sap altınnan tabaqlar, tu'tetki salatug'ın tostag'anlar, ishimlik sadaqaları ushın gu'zeler ha'm keseler islet.
30 Menin' aldımdag'ı stolda ba'rqulla usınılg'an nanlar tursın.
31 – Sap altınnan shıra qoyg'ısh islet. Onın' ultanı, baldag'ı, shaqaları, gu'lleri ha'm onın' gu'lkeseleri menen gu'ltajları o'zi menen bir tutas bolıp sho'kkishlep islensin.
32 Shıra qoyg'ıshtın' eki qaptalınan u'sh-u'shten, altı shaqa shıg'ıp tursın.
33 Shıg'ıp turg'an ha'r bir shaqada badam gu'line uqsas u'sh gu'l ha'm onın' gu'lkeseleri menen gu'ltajları bolsın.
34 Shıra qoyg'ıshtın' baldag'ında badam gu'line uqsas to'rt gu'l ha'm onın' gu'lkeseleri menen gu'ltajları bolsın.
35 Shıra qoyg'ıshtan shıg'ıp turatug'ın altı shaqanın' ha'r bir jubının' astında u'sh gu'lkese izli-izinen dizilip tursın.
36 Shıra qoyg'ısh gu'lkeseleri ha'm shaqaları menen bir tutas etip, sap altınnan sho'kkishlep islensin.
37 Shıra qoyg'ısh ushın jeti shıra islet. Shıralardı shıra qoyg'ıshtın' aldı betine jaqtı tu'sirip turatug'ınday etip ornat.
38 Piliklerdi tazalaytug'ın qısqıshlar menen ıdıslar da sap altınnan bolsın.
39 Shıra qoyg'ısh ha'm onın' barlıq buyımları bir talant sap altınnan islensin.
40 Abaylı bol, bulardın' ha'mmesin sag'an tawda ko'rsetilgen u'lgiler boyınsha isle.
