Shıg'ıw 26 bob
1 – Al Muxaddes shatırdı on perdeden qur. Perdeler hasıl zıg'ır jipten, ju'nnen iyirilgen qızg'ısh ko'k, shım qızıl ha'm qırmızı jiplerden islenip, u'stine kerublardın' su'wretleri sheberlik penen kestelensin.
2 Ha'r bir perdenin' uzınlıg'ı jigirma segiz shıg'anaq, eni to'rt shıg'anaq bolsın. Ha'mme perdenin' o'lshemi birdey bolsın.
3 Perdeler besew-besewden bir-birine qosıp tigilsin.
4 Birinshi bes perdenin' shetine qızg'ısh ko'k jipten ilgekler islet. Ekinshi perdelerge de solay islet.
5 Birinshi bes perdenin' da'slepki perdesine eliw, ekinshi bes perdenin' son'g'ı perdesine eliw ilgek tiktir. İlgekler bir-birine qarama-qarsı jaylasqan bolsın.
6 Ja'ne de, eliw altın ilmek isletip, olar ja'rdeminde perdelerdi bir-birine biriktir. Sonda shatır bir tutas boladı.
7 Muxaddes shatırdın' u'stin jabıw ushın, eshki ju'ninen on bir perde islet.
8 Ha'r bir perdenin' uzınlıg'ı otız shıg'anaq, eni to'rt shıg'anaq bolsın. On bir perdenin' o'lshemi birdey bolsın.
9 Bes perdeni bir bo'lek, qalg'an altı perdeni bir bo'lek qılıp, bir-biri menen biriktir. Altınshı perdeni shatırdın' aldı betine eki qabatlap bu'klep qoyg'ız.
10 Solay etip, biriktirilgen eki bo'lek perdelerdi bir-birine qosıw ushın, ha'r bir bo'lektin' shetlerine eliw-eliwden ilgek islet.
11 Tag'ı da, qoladan eliw ilmek islet. İlgeklerdi ilmekler menen ildirip, shatırdın' perdelerin bir tutas qılıp biriktir.
12 Shatırdın' perdelerinen awısqan yarım perde shatırdın' art jag'ına asıp qoyılsın.
13 Al perdelerdin' uzınlıg'ınan awısqan bir shıg'anaq tawar shatırdın' eki jag'ınan to'men salbırap, shatırdı jawıp tursın.
14 Shatır ushın qızılg'a boyalg'an qoshqar terisinen japqısh, onın' u'stine jumsaq teriden sırtqı japqısh islet.
15 Akatsiya ag'ashınan shatır ushın tikkesine turatug'ın taxtaylar islet.
16 Ha'r bir taxtaydın' uzınlıg'ı on shıg'anaq, eni bir yarım shıg'anaq bolsın.
17 Ha'r bir taxtaydın' astına bir-birine qatarlastırıp, eki tuyaqtan o'zinen shıg'arıp islet. Shatırdın' ha'mme taxtayların usılay islet.
18 Shatırdın' qubla ta'repi ushın jigirma taxtay islet.
19 Usı jigirma taxtaydın' astına qoyılatug'ın qırıq gu'mis ultan islet. Ha'r bir taxtaydın' tuyag'ının' astında bir ultannan bolıwı ushın, ha'r bir taxtayg'a eki ultannan islet.
20 Shatırdın' arqa ta'repi ushın jigirma taxtay islet.
21 Al ha'r bir taxtaydın' astına eki ultannan qoyıw ushın, qırıq gu'mis ultan islet.
22 Shatırdın' batısqa qarag'an art jag'ı ushın altı taxtay,
23 shatırdın' artındag'ı mu'yeshler ushın eki taxtay islet.
24 Bul mu'yeshlerdegi taxtaylar to'mennen joqarıg'a deyin juplasıp, joqarıdag'ı bir halqa menen biriktiriledi. Eki mu'yesh te usılay islensin.
25 Solay etip, segiz taxtay ha'm ha'r bir taxtaydın' astına eki ultannan qoyıw ushın, on altı gu'mis ultan boladı.
26 Akatsiya ag'ashınan shatırdın' bir ta'repindegi taxtaylar ushın bes qada,
27 ekinshi ta'repindegi taxtaylar ushın bes qada ha'm artındag'ı, yag'nıy batıs ta'repindegi taxtaylar ushın da bes qada islet.
28 Al taxtaylardın' orta belinen o'tetug'ın qadalardı shatırdın' bir shetinen ekinshi shetine jetetug'ın qılıp islet.
29 Taxtaylardı ha'm qadalardı altın menen qaplatıp, qadalar o'tkeriletug'ın halqalardı altınnan islet.
30 Muxaddes shatırdı tawda o'zin'e ko'rsetilgen u'lgi boyınsha islet.
31 Ju'nnen iyirilgen qızg'ısh ko'k, shım qızıl, qırmızı jiplerden ha'm hasıl zıg'ır jipten bir perde islet. Onın' u'stine kerublardın' su'wretlerin sheberlik penen kestelet.
32 Akatsiya ag'ashınan to'rt baqan isletip, olardı to'rt gu'mis ultang'a ornat. Baqanlardı altın menen qaplatıp, olarg'a altın ayrı ildirgishler ildir ha'm usı ildirgishlerge perdeni qıstır
33 Perdeni shatırdın' joqarısındag'ı ilmeklerdin' to'menine, ayrı ilgishlerge ildir ha'm ishki ta'repine Kelisim sandıg'ın kirgizip qoy. Bul perde Muxaddes bo'lme menen En' muxaddes bo'lmeni bir-birinen ayırıp turadı.
34 Qaqpaqtı En' muxaddes bo'lmede bolg'an Kelisim sandıg'ının' u'stine qoy.
35 Stoldı perdenin' sırtqı jag'ına, shatırdın' arqag'a qarag'an ta'repine ornalastır. Shıra qoyg'ıshtı stoldın' qarsısına, shatırdın' qubla ta'repine qoy.
36 Shatırdın' kirer awzına ju'nnen iyirilgen qızg'ısh ko'k, shım qızıl, qırmızı jiplerden ha'm hasıl zıg'ır jipten nag'ıslı perde toqıt.
37 Perdeni ildiriw ushın, akatsiya ag'ashınan bes baqan isletip, olardı altın menen qaplat ha'm u'stine altın ayrı ildirgishler ornat. Baqanlar ushın qoladan islengen bes ultan quydır.
