Shıg'ıw 27 bob
1 – Akatsiya ag'ashınan to'rt mu'yeshli qılıp, qurbanlıq orın du'zet. Orınnın' uzınlıg'ı da, eni de bes shıg'anaq, al biyikligi u'sh shıg'anaq bolsın.
2 Onın' to'rt mu'yeshine o'zinen shıg'ıp turatug'ın shaqlar islep, orındı ha'm shaqların qola menen qaplat.
3 Orın ushın ku'lge arnalg'an ıdıslar menen belsheler, qan sebetug'ın tabaqlar, shanıshqılar ha'm shoq salınatug'ın ıdıslar islet. Olardın' ha'mmesin qoladan islet.
4 Qurbanlıq orıng'a qoladan tor sıyaqlı nag'ıs ha'm onın' to'rt mu'yeshine qoladan to'rt halqa islet.
5 Tor nag'ıstı qurbanlıq orınnın' ortasına jetetug'ınday qılıp, jiyeginin' astınan islet.
6 Orın ushın akatsiya ag'ashınan sırıqlar isletip, olardı qola menen qaplat.
7 Qurbanlıq orındı ko'terip ju'riw ushın, orınnın' eki jag'ındag'ı halqalardan usı sırıqlardı o'tkizip qoy.
8 Orın taxtaydan islenip, ishi bos bolsın. Orındı tawda sag'an ko'rsetilgendey qılıp islet.
9 – Muxaddes shatırdın' ha'wlisin qur. Ha'wlinin' qubla ta'repine uzınlıg'ı ju'z shıg'anaq bolg'an, hasıl zıg'ır jipten toqılg'an perdeler taq.
10 Perdeler ushın qoladan islengen jigirma ultang'a jigirma baqan ornat. Al baqannın' ayrı ildirgishleri menen karnizleri gu'misten bolsın.
11 Arqa ta'repi ushın da uzınlıg'ı ju'z shıg'anaq bolg'an perdeler, jigirma baqan ha'm baqanlar ushın qoladan jigirma ultan islensin. Baqanlardın' ayrı ildirgishleri menen karnizleri gu'misten bolsın.
12 Ha'wlinin' batıs ta'repi ushın uzınlıg'ı eliw shıg'anaq bolg'an perde, on baqan ha'm og'an on ultan islensin.
13 Ha'wlinin' shıg'ısqa qarag'an aldıng'ı ta'repinin' ken'ligi eliw shıg'anaq bolsın.
14 Usı kirer awızdın' bir ta'repinde uzınlıg'ı on bes shıg'anaq perde, u'sh baqan ha'm u'sh ultan bolsın.
15 Onın' ekinshi ta'repinde de uzınlıg'ı on bes shıg'anaq perde, u'sh baqan ha'm u'sh ultan bolsın.
16 Ha'wlinin' kirer awzına ju'nnen iyirilgen qızg'ısh ko'k, shım qızıl ha'm qırmızı jiplerden, ja'ne de, hasıl zıg'ırdan uzınlıg'ı jigirma shıg'anaq bolg'an nag'ıslı perde toqıt. Og'an to'rt baqan ha'm to'rt ultan islensin.
17 Ha'wlinin' a'tirapındag'ı barlıq baqanlar gu'mis karnizler ha'm gu'mis ayrı ildirgishler menen biriktirilsin. Olardın' ultanları qola bolsın.
18 Ha'wlinin' uzınlıg'ı ju'z, eni eliw, al a'tirapındag'ı hasıl zıg'ır jibinen toqılg'an perdelerdin' biyikligi bes shıg'anaq bolsın. Ultanlar qoladan bolsın.
19 Shatırg'a tiyisli barlıq zatları, shatırdın' ha'm ha'wlinin' barlıq qazıqları qoladan bolsın.
20 – Shıralar ha'r ku'ni tu'nde janıp turıwı ushın, İzrail xalqına sapalı za'ytu'n mayınan a'keliwdi buyır.
21 Xaron ha'm onın' ulları Ushırasıw shatırında, Kelisim sandıg'ının' aldındag'ı perdenin' sırtında, keshten tan'g'a deyin shıralardın' Menin' aldımda janıwın ta'miyinlesin. Bul izraillılar ushın a'wladlar boyı ma'n'gi qag'ıyda bolsın.
