Shıg'ıw 29 bob
1 Xarondı ha'm onın' ulların ruwxaniy qılıp, Mag'an xızmet etiwge bag'ıshlaw ushın mınalardı isle: minsiz bir bug'a ha'm eki qoshqar al.
2 Sapalı biyday unınan ashıtqısız nanlar, za'ytu'n mayı qosılg'an ashıtqısız sho'rekler ha'm u'stine za'ytu'n mayı jag'ılg'an pa'tirler japtır.
3 Olardı bir sebetke salıp, bug'a ha'm qoylar menen birge Mag'an alıp kel.
4 Xaron ha'm onın' ulların Ushırasıw shatırının' kirer awzının' aldına a'kelip, olardı juwındır.
5 Keyin ruwxaniylik kiyimlerin al da, Xarong'a uzın ko'ylek, bahalı u'st kiyim ha'm efodtı kiygizip, qaltalı o'n'irsheni taq. Efodtın' belbewin beline bayla.
6 Xaronnın' basına sa'lle orap, aldıng'ı jag'ına muxaddes tajdı tag'ıp qoy.Son'ınan maylaytug'ın za'ytu'n mayın alıp, onın' basına quyıp, onı mayla.
7 Son'ınan maylaytug'ın za'ytu'n mayın alıp, onın' basına quyıp, onı mayla
8 Keyin Xaronnın' ulların alıp kelip, olarg'a uzın ko'yleklerdi kiygiz.
9 Bellerine belbew baylap, baslarına kishigirim sa'lle ora. Xaron ha'm onın' urpaqları qag'ıyda boyınsha ma'n'gige ruwxaniyler bolıp qaladı. Usılayınsha, Xaron ha'm onın' ulların xızmetke tayınla.
10 Keyin Ushırasıw shatırının' aldına bug'anı alıp kelip, Xaron ha'm onın' ullarının' qolların bug'anın' basına qoydır.
11 Bug'anı Menin' aldımda, Ushırasıw shatırının' aldında soy.
12 Onın' qanın barmag'ın' menen qurbanlıq orınnın' shaqlarına jaq. Qalg'an qannın' ha'mmesin orınnın' tu'bine to'k.
13 Maldın' isheklerin qaplag'an sharbı mayların, bawırının' to'mengi ushın, bo'tekelerin ha'm olardın' mayların qurbanlıq orınnın' u'stinde tu'tetip jandırAl bug'anın' go'shin, terisin ha'm da'risin ordadan sırtqa shıg'arıp, jag'ıp jiber. Bul – gu'na ushın qurbanlıq.
14 Al bug'anın' go'shin, terisin ha'm da'risin ordadan sırtqa shıg'arıp, jag'ıp jiber. Bul – gu'na ushın qurbanlıq.
15 Son' bir qoshqar a'kelip, Xaron ha'm onın' ullarının' qolların qoshqardın' basına qoydır.
16 Qoshqardı o'zin' soyıp, qanın qurbanlıq orınnın' to'rt qaptalına serpip jiber.
17 Qoshqardı bo'leklep, onın' ishekqarnın ha'm tuyaqların juwıp, bulardı bo'leklengen go'sh penen bastın' u'stine qoy.
18 Qoshqardı tolıg'ı menen qurbanlıq orınnın' u'stinde tu'tetip jandır. Usı Jaratqan İyege arnalg'an jandırılatug'ın qurbanlıq, Og'an xosh iyisli sıy boladı.
19 Keyin ekinshi qoshqardı alıp kel. Xaron ha'm onın' ulları qoshqardın' basına qolların qoyg'annan son',
20 qoshqardı soyıp, qanın Xaron ha'm onın' ullarının' on' qulaqlarının' sırg'alıg'ına, on' qol ha'm on' ayag'ının' bas barmaqlarına jaq. Awısqan qandı qurbanlıq orınnın' to'rt qaptalına serpip jiber.
21 Qurbanlıq orınnın' u'stindegi qandı ha'm maylaytug'ın za'ytu'n mayın Xarong'a, onın' ullarına ha'm olardın' kiyimlerine sep. Sonda Xaron ha'm onın' kiyimleri, onın' ulları ha'm olardın' kiyimleri muxaddes boladı.
22 Qoshqardın' mayın, yag'nıy quyrıq mayın, isheklerin qaplag'an sharbı mayların, bawırının' to'mengi ushın, bo'tekelerin mayları menen qosa on' jaq sanın al. Sebebi bul – ruwxaniylikke tayınlag'anda soyılatug'ın qoshqar.
23 Menin' aldımdag'ı sebetten ashıtqısız bir sho'rek, za'ytu'n mayı qosılg'an ashıtqısız bir sho'rek ha'm bir pa'tir al.
24 Olardın' ha'mmesin Xaronnın' ha'm onın' ullarının' qollarına sal. Bulardı Menin' aldımda joqarı ko'terip usının'lar.
25 Son'ınan sol na'rselerdi olardın' qollarınan alıp, qurbanlıq orında jandırılatug'ın qurbanlıqqa qosıp, Mag'an xosh iyisli sıy qılıp tu'tetip jandır. Bul – Jaratqan İyege, yag'nıy Mag'an arnalg'an sıy boladı.
26 Qoshqardın' to'sin bolsa, Menin' aldımda joqarı ko'terip usın. Bul to's senin' payın' boladı.
27 Xaron ha'm onın' ullarının' tayınlanıwı ushın soyılg'an qoshqardın' joqarı ko'terip usınılg'an to'sin ha'm ajıratılg'an sanın Mag'an bag'ıshla.
28 Bul jilikler sadaqa bolg'anı ushın, izraillılar bulardı Xarong'a ha'm onın' ullarına ma'n'gi pay etip bersin. Bul izraillılardın' tatıwlıq qurbanlıqlarınan Jaratqan İyege, yag'nıy Mag'an usıng'an sadaqası boladı.
29 Xaronnın' muxaddes kiyimleri o'zinen keyin urpaqlarına qalsın. Olar may quyılıp, xızmetke tayınlang'anda, sol kiyimlerdi kiyedi.
30 Muxaddes orında xızmet etiw ushın, Xaronnın' ornına ruwxaniylikke tayınlanatug'ın ha'm Ushırasıw shatırına kiretug'ın ulı jeti ku'n dawamında usı kiyimlerdi kiyip ju'riwi tiyis.
31 Ruwxaniylikke tayınlaw ra'siminde qurbanlıq etip berilgen qoshqardın' go'shin bir muxaddes jerde qaynat.
32 Olar sol go'shti ha'm sebettegi nandı Ushırasıw shatırının' kirer awzının' aldında jesin.
33 Ruwxaniylikke tayınlaw ra'siminde gu'nalardan pa'klew ushın usınılg'an nan ha'm go'shti tek g'ana Xaron ha'm onın' ulları jesin. Bul na'rseler muxaddes bolg'anı ushın, olardan basqa adamlardın' jewine bolmaydı.
34 Bul ra'simde soyılg'an qurbanlıqtın' go'shinen yamasa nannan azang'a deyin awısıp qalsa, olardı jag'ıp jiber. Olar muxaddes bolg'anlıg'ı sebepli, jelinbewi kerek.
35 Bulardı Xaron ha'm onın' ulları ushın Menin' sag'an buyırg'anımday etip orınla. Olardı ruwxaniylikke tayınlaw ra'simi jeti ku'n dawam etsin.
36 Gu'nalardan pa'kleniw ushın ha'r ku'ni bir bug'a a'kel. Qurbanlıq orındı tazalaw ushın gu'na qurbanlıg'ın ber ha'm onı muxaddes qılıw ushın og'an may serp.
37 Jeti ku'n dawamında orındı tazalap, muxaddes qıl. Sol ta'rizde qurbanlıq orın ju'da' muxaddes boladı. Og'an tiyip ketken ha'r bir na'rse de muxaddes boladı.
38 – Ha'r ku'ni bir jasar eki erkek toqlı qurbanlıq orınnın' u'stinde qurbanlıqqa ber.
39 Toqlının' birewin azanda, al ekinshisin keshte ber.
40 Birinshi toqlıg'a qosıp, to'rtten bir hin sapalı za'ytu'n mayına aralastırılg'an onnan bir efa sapalı un ha'm ishimlik sadaqası ushın to'rtten bir hin sharap ber.
41 Ekinshi toqlını keshte Mag'an xosh iyisli sıy qılıp, azang'ısınday g'a'lle ha'm ishimlik sadaqaları menen birge usın.
42 Bul jandırılatug'ın qurbanlıq Ushırasıw shatırının' kirer awzının' aldında, Jaratqan İyenin' aldında a'wladlar dawamında ha'r ku'ni berilip barılsın. Men sol jerde senin' menen ushırasıp, so'ylesemen.
43 Men izraillılar menen sol jerde ushırasaman, shatır saltanatım menen muxaddes boladı.
44 Ushırasıw shatırın ha'm qurbanlıq orındı muxaddes qılaman. Xaron ha'm onın' ulların da ruwxaniy bolıp, Mag'an xızmet etiwi ushın muxaddes qılaman.
45 Men izraillılar arasında jasap, olardın' Qudayı bolaman.
46 Sonda arasında jasaw ushın, olardı Mısırdan shıg'arg'an Qudayı Jaratqan İye Men ekenimdi olar bilip aladı. Men – olardın' Qudayı Jaratqan İyemen.
