Shıg'ıw 30 bob

Tu'tetki tu'tetiletug'ın orın(1-10),Muxaddes shatır ushın to'lenetug'ın qun(11-21),Maylaw ra'simine arnalg'an may(22-38).

¹ – Tu'tetki tu'tetiw ushın, akatsiya ag'ashınan tu'tetki tu'tetiletug'ın orın islet.

² Ol to'rt mu'yeshli, uzınlıg'ı bir shıg'anaq, eni bir shıg'anaq, biyikligi eki shıg'anaq bolıp, o'zinen shıg'ıp turatug'ın shaqları menen bir tutas qılıp islensin+.

³ Orınnın' u'stin, qaptalların ha'm shaqların sap altın menen qaplap, a'tirapına altın jiyek islet.

⁴ Eki qaptalındag'ı jiyektin' astına eki altın halqa ornat. Orındı ko'terip ju'riw ushın, usı halqalardan sırıqlar o'tkiziledi.

⁵ Sırıqlardı akatsiya ag'ashınan isletip, altın menen qaplat.

⁶ Orındı Kelisim sandıg'ının', yag'nıy sandıqtın' u'stindegi gu'nadan pa'klew qaqpag'ının' aldındag'ı perdenin' sırtına, Men senin' menen ushırasatug'ın jerdin' sırtına qoy.

⁷ Xaron ha'r ku'ni azanda shıralardı tayarlag'anda, orınnın' u'stinde xosh iyisli tu'tetki tu'tetsin.

⁸ Al keshqurın shıralardı jaqqanda, ja'ne tu'tetki tu'tetsin. Solay etip, Menin' aldımda a'wladlar boyı tu'tetki u'zliksiz janıp turadı.

⁹ Orınnın' u'stinde jat bolg'an tu'tetki tu'tetpen' ha'm bunda jandırılatug'ın qurbanlıq ta, g'a'lle sadaqasın da bermen'. Onın' u'stine ishimlik sadaqasın da quyman'.

¹⁰ Xaron jılına bir ret gu'nalardın' keshiriliwi ushın berilgen qurbanlıqtın' qanın tu'tetki tu'tetiletug'ın orınnın' shaqlarına jag'ıp, orındı tazalaydı. Bul ha'r jılı, a'wladlar boyı dawam etsin. Orın Mag'an, Jaratqan İyege bag'ıshlang'an bolıp, ju'da' muxaddesdur.

¹¹ Son'ınan Jaratqan İye Muwsag'a bılay dedi:

¹² – İzraillılardın' esabın alg'anın'da, esaptan o'tken ha'r bir adam o'z janı ushın Mag'an qun to'lesin. Sonda olardın' esabın alg'anın'da, olarg'a apat keltirmeymen.

¹³ Esaptan o'tetug'ın ha'r bir adam Mag'an Muxaddes orın o'lshemi menen yarım shekel gu'mis na'zir bersin. Bir shekel jigirma geradan ibarat.

¹⁴ Jigirma ha'm onnan joqarı jastag'ı esaptan o'tetug'ın adamlar Mag'an na'zir beriwi tiyis.

¹⁵ Janın'ızdın' qunı sıpatında usı na'zirdi bergenin'izde, bay adam yarım shekelden artıq, al jarlı adam yarım shekelden kem bermewi kerek.

¹⁶ İzraillılardın' qun sıpatında bergen gu'mislerin alıp, Ushırasıw shatırının' xızmetinde qollan. Bul Jaratqan İyenin' aldında janların'ızdın' qunı to'lengenin esletip turadı.

¹⁷ Ja'ne Jaratqan İye Muwsag'a bılay dedi:

¹⁸ – Juwınıw ushın, qoladan u'lken la'gen islet. Onın' tuyaqları da qoladan bolsın. La'gendi Ushırasıw shatırı menen qurbanlıq orınnın' arasına qoyıp, ishine suw quy.

¹⁹ Xaron ha'm onın' ulları ayaq-qolların og'an juwadı.

²⁰ Olar Ushırasıw shatırına kirmesten, yag'nıy Jaratqan İyege sıylar tu'tetip jandırıw ushın qurbanlıq orıng'a jaqınlamastan aldın, o'lip qalmawı ushın, suwg'a juwınıp alıwı tiyis.

²¹ Olar Ushırasıw shatırına kirmesten, yag'nıy Jaratqan İyege sıylar tu'tetip jandırıw ushın qurbanlıq orıng'a jaqınlamastan aldın, o'lip qalmawı ushın, suwg'a juwınıp alıwı tiyis.

²² Jaratqan İye Muwsag'a tag'ı bılay dedi:

²³ – Mına en' jaqsı xosh iyisli zatlardı al: 500 shekel suyıq mirra, onın' yarımına ten', 250 shekel koritsa, 250 shekel iyisli qamıs

²⁴ ha'm 500 shekel kassiya. Ha'mmesi Muxaddes orın o'lshemi menen o'lshensin. Bir hin za'ytu'n mayın alıp,

²⁵ bulardı sheberlik penen aralastırıp, xosh iyisli muxaddes may isle. Ol maylaw ra'simine arnalg'an muxaddes may boladı.

²⁶ Bul maydı Ushırasıw shatırına, Kelisim sandıg'ına,

²⁷ stolg'a, shıra qoyg'ıshqa ha'm olarg'a tiyisli ha'mme buyımlarg'a, tu'tetki tu'tetiletug'ın orıng'a,

²⁸ qurbanlıq jandırılatug'ın orıng'a ha'm onın' ha'mme buyımlarına, u'lken la'genge ha'm onın' tuyaqlarına serpip shıq+.

²⁹ Sol ta'rizde olardı muxaddes qıl. Sonda olar ju'da' muxaddes boladı. Olarg'a tiygen ha'r bir na'rse de muxaddes boladı.

³⁰ Son', ruwxaniy bolıp Mag'an xızmet etiwi ushın, Xaron ha'm onın' ulların maylap, olardı bag'ıshla.

³¹ Al izraillılarg'a bılay dep ayt: «Bul maylaytug'ın muxaddes may a'wladlar dawamında tek Men ushın qollanıladı.

³² Onı basqa adamlardın' denesine jag'ıwg'a bolmaydı. Usınday quramdag'ı maydı o'zlerin'izge tayarlaman'lar. Ol muxaddes ha'm sizler ushın da muxaddes bolıwı kerek.

³³ Kim de kim usınday maydı tayarlap, onı ruwxaniy bolmag'an adamg'a jaqsa, ol İzrail xalqı arasınan joq qılınadı».

³⁴ Keyin Jaratqan İye Muwsag'a bılay dedi: – Mına xosh iyisli zatlardı: balzamdı, mollyusk baqanshag'ın, galban shayırın ha'm taza livan shayırın al. Olardın' ha'mmesi birdey mo'lsherde bolsın.

³⁵ Bulardı sheberlik penen aralastırıp, tu'tetki isle. Olar duzlang'an, sap ha'm muxaddes boladı.

³⁶ Onın' bir bo'legin alıp, maydalap unta ha'm Menin' sen menen ushırasatug'ın Ushırasıw shatırımdag'ı Kelisim. sandıg'ının' aldına qoy. Sizler ushın ol ju'da' muxaddes boladı

³⁷ O'zlerin'iz ushın usınday quramdag'ı tu'tetki islemen'ler. Onı Jaratqan İyege arnalg'an muxaddes dep sanan'lar.

³⁸ Kim de kim o'zi ushın tu'tetiwge usınday tu'tetki islese, ol xalıq arasınan joq qılınıwı tiyis.