Shıg'ıw 31 bob
1 Jaratqan İye Muwsag'a bılay dedi:
2 – Minekey, Men Yahuda urıwınan bolg'an Xurdın' aqlıg'ı, Uriydin' ulı Besaleldi tan'ladım.
3 Onı Qudaydın' Ruwxına toltırıp, og'an o'nermentshiliktin' barlıq tarawlarında qa'bilet, uqıp ha'm sheberlik berdim+.
4 Ol altın, gu'mis ha'm qoladan ko'rkem islerin islewge,
5 hasıl taslardı jonıp qondırıwg'a, ag'ash ustashılıg'ı boyınsha ha'm ha'r tu'rli o'nermentshilik islerin islewge qa'biletli.
6 Ja'ne de, Dan urıwınan bolg'an Axisamaxtın' ulı Oholiabtı og'an ja'rdemshi qılıp berdim. Sag'an buyırg'an islerimnin' ha'mmesin isley alıwı ushın, Men olarg'a ja'rdem beretug'ın barlıq adamlarg'a ayrıqsha qa'bilet berdim.
7 Olar Ushırasıw shatırın, Kelisim sandıg'ın, sandıqtın' u'stindegi qaqpaqtı, shatırdag'ı barlıq buyımlardı,
8 stol ha'm onın' buyımların, sap altın shıra qoyg'ıshtı ha'm onın' buyımların, tu'tetki tu'tetiletug'ın orındı,
9 qurbanlıq jandırılatug'ın orındı ha'm orınnın' ha'mme buyımların, u'lken la'gen ha'm onın' tuyaqların,
10 sonday-aq, ruwxaniy Xaron ushın a'jayıp qılıp tigilgen muxaddes kiyimlerdi, onın' ullarının' ruwxaniylik kiyimlerin,
11 maylaytug'ın za'ytu'n mayın, Muxaddes orın ushın xosh iyisli tu'tetkini, ulıwma ha'mmesin Menin' sag'an buyırg'anımday qılıp islesin.
12 Son'ınan Jaratqan İye Muwsag'a bılay dedi:
13 – İzraillılarg'a mınalardı ayt: «Menin' Shabbatıma a'mel qılın'lar. Sebebi bul Men ha'm İzrail xalqı arasındag'ı a'wladlar boyı dawam etetug'ın bir nıshan boladı. Solay etip, Jaratqan İye ekenimdi ha'm sizlerdi O'zime ajıratıp alıp, muxaddes qılg'anımdı bilip alasızlar.
14 Shabbat ku'nine a'mel qılın'lar. O'ytkeni bul sizler ushın muxaddes. Kim de kim onı xorlasa, ol so'zsiz o'ltirilsin. Sol ku'ni jumıs islegen ha'r bir adam o'z xalqının' arasınan joq qılınıwı tiyis.
15 Altı ku'n jumıs islen'ler, biraq jetinshi ku'n Jaratqan İyege arnalg'an tolıq dem alatug'ın muxaddes Shabbat ku'ni. Usı ku'ni jumıs islegen ha'r bir adam so'zsiz o'ltirilsin.
16 İzraillılar ma'n'gi kelisim sıpatında Shabbat ku'nin, a'wladlar dawamında saqlasın.
17 Bul Menin' menen izraillılar arasındag'ı ma'n'gilik bir nıshan boladı. Sebebi Men, Jaratqan İye aspan ha'm jerdi altı ku'nde jarattım, al jetinshi ku'ni dem alıp, ha'llendim».
18 Solay etip, Quday Sinay tawında Muwsa menen so'ylesip bolıp, og'an buyrıqlar jazılg'an eki tastı berdi. Quday bul buyrıqlardı taslarg'a O'z qolı menen jazg'an edi.
