Shıg'ıw 35 bob
1 Muwsa İzrail xalqının' pu'tkil ja'miyetin shaqırıp alıp, olarg'a bılay dedi: – Jaratqan İye mına islerdi islewin'izdi buyırdı:
2 altı ku'n jumıs islen'. Biraq jetinshi ku'n sizler ushın Jaratqan İyege arnalg'an tolıq dem alatug'ın muxaddes Shabbat ku'ni boladı. Sol ku'ni jumıs islegen ha'r bir adam o'ltiriledi.
3 Shabbat ku'ni o'z shan'araqların'ızda ot ta jaqpan'.
4 Muwsa İzrail xalqının' pu'tkil ja'miyetine bılay dedi: – Jaratqan İyenin' buyrıg'ı mınaw:
5 o'zlerin'izde barınan Jaratqan İyege na'zir berin'ler. Og'an shın kewilden beriwdi qa'lewshiler mına na'rselerdi bersin: altın, gu'mis, qola,
6 ju'nnen iyirilgen qızg'ısh ko'k, shım qızıl, qırmızı jip ha'm hasıl zıg'ır jibi, eshkinin' ju'ni,
7 qızılg'a boyalg'an qoshqar terisi, jumsaq teri ha'm akatsiya ag'ashı,
8 shıralar ushın za'ytu'n mayı, maylaw ra'simi ha'm xosh iyisli tu'tetki ushın xosh iyisli zatlar,
9 bas ruwxaniydin' efodına ha'm qaltalı o'n'irshesine tag'ılatug'ın oniks ha'm qımbatbaha taslar.
10 Aran'ızdag'ı barlıq uqıplı adamlar kelip, Jaratqan İyenin' buyırg'anlarının' ha'mmesin islesin. Olar mınalardı:
11 Muxaddes shatırdı, onın' ishki ha'm sırtqı japqıshların, ilmeklerin, taxtayların, qadaların, baqanların, ultanların,
12 Kelisim sandıg'ı ha'm onın' sırıqların, qaqpaqtı, bo'lmeni jawıp turatug'ın perdeni,
13 stol ha'm onın' sırıqların, stoldın' barlıq buyımların ha'm usınılg'an nanlardı,
14 jaqtı tu'siriw ushın shıra qoyg'ıshtı, onın' buyımların, onın' shıraların ha'm shıralar ushın za'ytu'n mayın,
15 tu'tetki tu'tetiletug'ın orın menen onın' sırıqların, maylaw ra'simi ushın za'ytu'n mayın, xosh iyisli tu'tetkini, Muxaddes shatırdın' kirer awzındag'ı perdeni,
16 qurbanlıq jandırılatug'ın orındı ha'm onın' qola torın, sırıqların ha'm barlıq buyımların, u'lken la'gendi ha'm onın' tuyaqların,
17 ha'wlinin' perdelerin, baqanların, baqannın' ultanların, ha'wlinin' kirer awzındag'ı perdeni,
18 Muxaddes shatırdın' qazıqların, ha'wlinin' qazıqların ha'm arqanların,
19 Muxaddes orında xızmet etiwge arnalıp, a'jayıp qılıp tigilgen kiyimlerdi – ruwxaniy Xaronnın' muxaddes kiyimlerin ha'm onın' ullarının' ruwxaniylik kiyimlerin islesin.
20 Son'ınan İzrail xalqının' pu'tkil ja'miyeti Muwsanın' qasınan ketti.
21 Ju'reginde qa'lew ha'm tilegi bar adamlar Ushırasıw shatırının' qurılısı, ondag'ı xızmet ha'm muxaddes kiyimler ushın, Jaratqan İyege sadaqalar alıp keldi.
22 Solay etip, ju'reginde qa'lewi bar ha'r bir erkek ha'm hayal ha'r tu'rli altın buyımlardı: bilezik, sırg'a, ju'zik ha'm ha'ykellerdi a'kelip, Jaratqan İyege bag'ıshlap, usındı.
23 Kimde ju'nnen iyirilgen qızg'ısh ko'k, shım qızıl, qırmızı jip, hasıl zıg'ır, eshki ju'ni, qızılg'a boyalg'an qoshqar terisi ha'm jumsaq teri bolsa, alıp keldi.
24 Gu'mis ha'm qolanı sadaqa qılıp bere alg'anlar da olardı Jaratqan İyege arnadı. Kimde akatsiya ag'ashı bolsa, onı shatırdın' mu'ta'jlikleri ushın alıp keldi.
25 Jip iyiriwge uqıplı barlıq hayallar o'z qolları menen iyirgen qızg'ısh ko'k, shım qızıl, qırmızı jiplerdi ha'm hasıl zıg'ır jiplerdi alıp keldi.
26 Ju'n iyirip biletug'ın, ju'reginde qa'lewi bar barlıq hayallar da eshki ju'nin iyirdi.
27 Basshılar efodqa ha'm qaltalı o'n'irshege tag'ılatug'ın oniks ha'm qımbatbaha taslar,
28 shıralar ushın, maylaw ushın ha'm xosh iyisli tu'tetki ushın xosh iyisli zatlar menen za'ytu'n mayın alıp keldi.
29 Hayal, erkek, ju'reginde qa'lewi bar barlıq izraillılar Jaratqan İyenin' Muwsa arqalı islewdi buyırg'an isleri ushın, Jaratqan İyege ıqtıyarlı sadaqalar berdi.
30 Muwsa izraillılarg'a bılay dedi: – Qaran'lar, Jaratqan İye Yahuda urıwınan bolg'an Xurdın' aqlıg'ı, Uriydin' ulı Besaleldi tan'lap aldı.
31 Onı Qudaydın' Ruwxına toltırıp, og'an o'nermentshiliktin' barlıq tarawlarında qa'bilet, uqıp ha'm sheberlik berdi.
32 Solay etip, og'an altın, gu'mis ha'm qoladan ko'rkem o'ner islewge,
33 hasıl taslardı jonıp qondırıwg'a, ag'ash ustashılıg'ı boyınsha ha'm ha'r qıylı ko'rkem o'ner islerin islewge qa'bilet berdi.
34 Jaratqan İye og'an ha'm Dan urıwınan bolg'an Axisamax ulı Oholiabqa basqalarg'a u'yretiw uqıbın da berdi.
35 Bul adamlardın' ha'r qanday isti isley alıwı ushın, olarg'a ustashılıq, bezewshilik, qızg'ısh ko'k, shım qızıl, qırmızı jip ha'm hasıl zıg'ırdan toqımashılıq ha'm ha'r tu'rli o'nermentshilik islerin islew ayrıqsha qa'biletin berdi.
