1 – Besalel, Oholiab ha'm Jaratqan İye Muxaddes shatırdı qurıw ushın qa'bilet, uqıp ha'm sheberlik bergen barlıq adamlar ha'r bir na'rseni Jaratqan İyenin' buyırg'anınday qılıp islesin.
2 Muwsa Besaleldi, Oholiabtı ha'm Jaratqan İye qa'bilet bergen, islewge qa'lewi bar barlıq adamlardı jumısqa shaqırdı.
3 Kelgenler Muxaddes shatırdı qurıw ushın, izraillılar a'kelgen barlıq sadaqalardı Muwsadan aldı. İzraillılar ha'r ku'ni azanda ıqtıyarlı sadaqaların Muwsag'a a'keliwdi dawam etti.
4 Sonda Muxaddes shatırdı qurıw isleri menen shug'ıllanıp atırg'an ustalar islerin qaldırıp,
5 Muwsanın' janına keldi de: – Xalıq Jaratqan İye buyırg'an is ushın kereginen zıyat alıp kelmekte, – dedi.
6 Sonda Muwsa xalıqqa ja'riyalanıwı ushın mınaday buyrıq berdi: «Endi birde bir erkek te, hayal da Muxaddes shatır ushın hesh na'rse a'kelmesin». Solay etip, xalıq sadaqa a'keliwdi toqtattı.
7 Sebebi sol waqıtqa deyin a'kelingenler isti pitkeriwge jetetug'ın, ha'tte, awısıp ta qalatug'ın edi.
8 İslewshiler arasındag'ı uqıplı adamlar shatırdı on perdeden qurdı. Olardı hasıl zıg'ır jipten, ju'nnen iyirilgen qızg'ısh ko'k, shım qızıl ha'm qırmızı jiplerden islep, u'stine kerublardın' su'wretlerin sheberlik penen kesteledi.
9 Ha'r bir perdenin' uzınlıg'ı jigirma segiz shıg'anaq, eni to'rt shıg'anaq edi. Perdelerdin' ha'mmesi bir o'lshemde boldı.
10 Olar perdelerdi besew-besewden bir-birine qosıp tikti.
11 Birinshi bes perdenin' shetine qızg'ısh ko'k jipten ilgekler tikti. Ekinshi bes perdenin' shetine de solay isledi.
12 Birinshi bes perdenin' da'slepki perdesine eliw, ekinshi bes perdenin' son'g'ı perdesine eliw ilgek tikti. İlgekler bir-birine qarama-qarsı jaylasqan edi.
13 Son'ınan eliw altın ilmek islep, olar ja'rdeminde perdelerdi bir-birine biriktirdi. Sol ta'rizde shatır bir tutas boldı.
14 Ja'ne de, Muxaddes shatırdın' u'stin jabıw ushın, eshki ju'ninen on bir perde isledi.
15 Ha'r bir perdenin' uzınlıg'ı otız shıg'anaq, eni to'rt shıg'anaq edi. On bir perde de bir o'lshemde boldı.
16 Olar bes perdeni bir bo'lek, qalg'an altı perdeni bir bo'lek qılıp, bir-biri menen biriktirdi.
17 Usı biriktirilgen eki bo'lek perdelerdi bir-birine qosıw ushın, ha'r bir bo'lektin' shetlerine eliw-eliwden ilgek tikti.
18 Shatırdın' perdelerin bir tutas qılıp biriktiriw ushın, qoladan eliw ilmek isledi.
19 Shatır ushın qızılg'a boyalg'an qoshqar terisinen bir japqısh, onın' u'stine jumsaq teriden sırtqı japqısh isledi+.
20 Tag'ı da, olar akatsiya ag'ashınan shatır ushın tikkesine turatug'ın taxtaylar isledi.
21 Ha'r bir taxtaydın' uzınlıg'ı on shıg'anaq, eni bir yarım shıg'anaq edi
22 Ha'r bir taxtaydın' astına bir-birine qatarlastırıp, eki tuyaqtan o'zinen shıg'arıp isledi. Shatırdın' ha'mme taxtayların usılay isledi.
23 Al shatırdın' qubla ta'repi ushın jigirma taxtay isledi.
24 Usı jigirma taxtaydın' astına qoyılatug'ın qırıq gu'mis ultan isledi. Ha'r bir taxtaydın' tuyag'ının' astında bir ultannan bolıwı ushın, ha'r bir taxtayg'a eki ultannan isledi.
25 Shatırdın' arqa ta'repi ushın jigirma taxtay
26 ha'm ha'r bir taxtaydın' astına eki ultannan qoyıw ushın, qırıq gu'mis ultan isledi.
27 Al shatırdın' batısqa qarag'an art jag'ı ushın altı taxtay
28 ha'm shatırdın' artındag'ı mu'yeshler ushın eki taxtay isledi.
29 Bul mu'yeshlerdegi taxtaylardın' aldıng'ı ta'repi bo'lek qalıp, joqarg'ı ta'repi juplasıp, bir halqa menen biriktirildi. Eki mu'yesh te usılay islendi.
30 Solay etip, segiz taxtay ha'm ha'r bir taxtaydın' astına eki ultannan qoyıw ushın, on altı gu'mis ultan islendi.
31 Akatsiya ag'ashınan shatırdın' bir ta'repindegi taxtaylar ushın bes qada,
32 ekinshi ta'repindegi taxtaylar ushın bes qada ha'm artındag'ı, yag'nıy batıs ta'repindegi taxtaylar ushın bes qada isledi.
33 Ja'ne de, taxtaylardın' orta belinen o'tetug'ın qadalardı shatırdın' bir shetinen ekinshi shetine jetetug'ın qılıp isledi.
34 Taxtaylardı ha'm qadalardı altın menen qaplap, qadalar o'tkeriletug'ın halqalardı altınnan isledi.
35 u'nnen iyirilgen qızg'ısh ko'k, shım qızıl, qırmızı jiplerden ha'm hasıl zıg'ır jipten bir perde isledi. Onın' u'stine kerublardın' su'wretlerin sheberlik penen kesteledi.
36 Perde ushın akatsiya ag'ashınan to'rt baqan islep, olardı altın menen qapladı. Olardın' ayrı ildirgishleri de altın edi. Baqanlar ushın to'rt gu'mis ultan quydı.
37 Shatırdın' kirer awzına ju'nnen iyirilgen qızg'ısh ko'k, shım qızıl, qırmızı jiplerden ha'm hasıl zıg'ır jipten nag'ıslı perde toqıdı.
38 Perdeni tag'ıw ushın ayrı ildirgishi bar bes baqan islep, olardın' joqarısın ha'm karnizlerin altın menen qapladı. Al baqanlar ushın qoladan bes ultan isledi.
