Shıg'ıw 37 bob

Kelisim sandıg'ının' isleniwi(1-9),Usınılg'an nanlar qoyılatug'ın stol(10-16),Shıra qoyg'ıshtın' isleniwi(17-24),Tu'tetki tu'tetiletug'ın orın qurıw(25-29).

¹ Besalel akatsiya ag'ashınan Kelisim sandıg'ın isledi. Onın' uzınlıg'ı eki yarım shıg'anaq, eni bir yarım shıg'anaq ha'm biyikligi bir yarım shıg'anaq edi.

² Sandıqtın' ishi-sırtın altın menen qapladı. Al ernegine altınnan jiyek saldı.

³ Sandıq ushın to'rt altın halqa quyıp, olardı to'rt tuyag'ına ornattı: ekewin bir jag'ına, qalg'an ekewin ekinshi jag'ına ornattı.

⁴ Akatsiya ag'ashınan sırıqlar islep, olardı altın menen qapladı.

⁵ Sandıqtı ko'terip ju'riw ushın, bul sırıqlardı eki ta'repindegi halqalardan o'tkerdi.

⁶ Sandıqtın' qaqpag'ın sap altınnan isledi. Qaqpaqtın' uzınlıg'ı eki yarım shıg'anaq, eni bir yarım shıg'anaq edi.

⁷ Qaqpaqtın' eki shetine altınnan eki kerubtı sho'kkishlep soqtı.

⁸ 8Kerublardın' birewi qaqpaqtın' bir shetinde, al ekinshisi ekinshi shetinde bolıp, olardı qaqpaq penen bir tutas qılıp isledi.

⁹ Kerublardın' joqarıg'a jayılg'an qanatları qaqpaqtı jawıp, ju'zleri bir-birine qarama-qarsı tu'rde qaqpaqqa qarap turg'an edi.

¹⁰ Keyin akatsiya ag'ashınan uzınlıg'ı eki shıg'anaq, eni bir shıg'anaq, al biyikligi bir yarım shıg'anaq bolg'an bir stol isledi.

¹¹ Stoldı sap altın menen qaplap, ernegine altın jiyek saldı.

¹² Stoldın' a'tirapına to'rt eli bolg'an qaptal islep, onı altın jiyek penen qapladı.

¹³ Stol ushın to'rt altın halqa quyıp, olardı stoldın' to'rt mu'yeshindegi to'rt tuyag'ına bekkemledi.

¹⁴ Stoldı ko'terip alıp ju'riwge arnalg'an sırıqlar o'tkiziletug'ın halqalar stoldın' qaptallarına jaqın edi.

¹⁵ Sırıqlardı akatsiya ag'ashınan islep, altın menen qapladı.

¹⁶ Stol ushın kerekli buyımlardı – tabaqlar, tu'tetki salatug'ın tostag'anlar, ishimlik sadaqaları ushın keseler ha'm gu'zelerdi sap altınnan isledi.

¹⁷ Olar sap altınnan shıra qoyg'ısh isledi. Onın' ultanın, baldag'ın, shaqaların, shanaqların, gu'llerin ha'm onın' gu'lkeseleri menen gu'ltajların o'zi menen bir tutas etip sho'kkishlep isledi.

¹⁸ Shıra qoyg'ıshtın' eki qaptalınan u'sh-u'shten, altı shaqa shıg'ıp turdı.

¹⁹ Shıg'ıp turg'an ha'r bir shaqada badam gu'line uqsas u'sh gu'l ha'm onın' gu'lkeseleri menen gu'ltajları bar edi.

²⁰ Al shıra qoyg'ıshtın' baldag'ında badam gu'line uqsas to'rt gu'l ha'm onın' gu'lkeseleri menen gu'ltajları bar edi.

²¹ Shıra qoyg'ıshtan shıg'ıp turg'an altı shaqanın' ha'r bir jubının' astında u'sh gu'lkese izli-izinen dizilip turatug'ın edi.

²² Shıra qoyg'ıshtı gu'lkeseleri ha'm shaqaları menen bir tutas etip, sap altınnan sho'kkishlep isledi.

²³ Shıra qoyg'ısh ushın jeti shıra isledi. Piliklerdi tazalaytug'ın qısqıshlar menen ıdıslardı sap altınnan isledi.

²⁴ Shıra qoyg'ısh ha'm onın' barlıq buyımları bir talant sap altınnan islendi.

²⁵ Akatsiya ag'ashınan to'rt mu'yeshli, uzınlıg'ı bir shıg'anaq, eni bir shıg'anaq ha'm biyikligi eki shıg'anaq bolg'an tu'tetki tu'tetiletug'ın orın qurdı. Orınnın' shaqları o'zi menen bir tutas islenip, o'zinen shıg'ıp turatug'ın edi.

²⁶ Orınnın' u'stin, qaptalların ha'm shaqların sap altın menen qaplap, a'tirapına altın jiyek isledi.

²⁷ Eki qaptalındag'ı jiyektin' astına eki altın halqa ornattı. Orındı ko'terip ju'riw ushın, usı halqalardan sırıqlar o'tkizildi.

²⁸ Sırıqlardı akatsiya ag'ashınan islep, altın menen qapladı.

²⁹ Tag'ı da, olar maylaw ra'simi ushın muxaddes maydı ha'm taza, xosh iyisli tu'tetkini sheberlik penen aralastırıp, tayarladı.