Shıg'ıw 38 bob
1 Akatsiya ag'ashınan jandırılatug'ın qurbanlıq ushın orın du'zetti. Ol to'rt mu'yeshli bolıp, onın' uzınlıg'ı da, eni de bes shıg'anaq, al biyikligi u'sh shıg'anaq edi.
2 Onın' to'rt mu'yeshine o'zinen shıg'ıp turg'an shaqlar islep, orındı ha'm shaqlardı qola menen qapladı.
3 Qurbanlıq orınnın' barlıq buyımların: ku'lge arnalg'an ıdıslar menen belsheler, qan sebetug'ın tabaqlar, shanıshqılar ha'm shoq salınatug'ın ıdıslardı qoladan isledi.
4 Orıng'a qoladan tor sıyaqlı nag'ıs isledi. Tor nag'ıs qurbanlıq orınnın' ortasına jetetug'ınday qılıp, jiyeginin' astınan islendi.
5 Qola tordın' to'rt mu'yeshine sırıqlardı o'tkeriw ushın, to'rt halqa quydı.
6 Sırıqlardı akatsiya ag'ashınan islep, qola menen qapladı.
7 Qurbanlıq orındı ko'terip ju'riw ushın, orınnın' qaptalındag'ı halqalardan usı sırıqlardı o'tkizdi. Orındı ag'ashtan, ishin bos qılıp isledi.
8 Ushırasıw shatırının' aldında xızmet etetug'ın hayallar bergen aynalardan u'lken qola la'gen ha'm onın' tuyaqların isledi.
9 Muxaddes shatırdın' ha'wlisin isledi. Ha'wlinin' qubla ta'repine uzınlıg'ı ju'z shıg'anaq bolg'an, sheber toqılg'an hasıl zıg'ır perdeler taqtı.
10 Perdeler ushın qoladan islengen jigirma ultang'a jigirma baqan ornattı. Baqannın' ayrı ildirgishleri menen karnizlerin gu'misten isledi.
11 Al arqa ta'repi ushın uzınlıg'ı ju'z shıg'anaq bolg'an perdeler, jigirma baqan, baqanlar ushın qoladan jigirma ultan isledi. Baqanlardın' ayrı ildirgishleri menen karnizleri gu'misten edi.
12 Ha'wlinin' batıs ta'repi ushın uzınlıg'ı eliw shıg'anaq bolg'an perde, on baqan ha'm on ultan isledi. Baqanlardın' ayrı ildirgishleri menen karnizleri gu'misten edi.
13 Ha'wlinin' shıg'ısqa qarag'an aldıng'ı ta'repinin' ken'ligi eliw shıg'anaq edi.
14 Usı kirer awızdın' bir ta'repinde uzınlıg'ı on bes shıg'anaq perde, u'sh baqan ha'm u'sh ultan bar edi.
15 Onın' ekinshi ta'repinde de uzınlıg'ı on bes shıg'anaq perde, u'sh baqan ha'm u'sh ultan bar edi.
16 Ha'wlinin' ha'mme ta'repindegi barlıq perdeler hasıl zıg'ırdan edi.
17 Baqanlardın' ultanları qoladan, al ayrı ildirgishleri menen karnizleri gu'misten islengen edi. Baqanlardın' joqarısı da gu'mis penen qaplang'an edi. Ha'wlinin' barlıq baqanları gu'mis karnizler menen biriktirildi.
18 Ha'wlinin' kirer awzındag'ı perde qızg'ısh ko'k, shım qızıl, qırmızı jip ha'm hasıl zıg'ırdan nag'ıslanıp toqılg'an edi. Onın' uzınlıg'ı jigirma shıg'anaq, biyikligi ha'wlinin' perdeleri sıyaqlı bes shıg'anaq edi.
19 Bul perde ushın to'rt qola ultang'a ornatılg'an baqan islendi. Baqanlardın' ayrı ildirgishleri ha'm karnizleri gu'misten islenip, joqarısı gu'mis penen qaplandı.
20 Shatırdın' ha'm shatırdı qorshag'an ha'wlinin' barlıq qazıqları qoladan islendi.
21 Muxaddes shatırdın', yag'nıy buyrıqlar jazılg'an taslar turg'an shatırdın' qurılısı ushın qollanılg'an na'rselerdin' tolıq esabı to'mende berilgen. Esaptı Muwsanın' buyrıg'ı menen, ruwxaniy Xaronnın' ulı İtamardın' baqlawı astında Lebiy urıwı alıp bardı.
22 Jaratqan İyenin' Muwsag'a buyırg'an ha'mme islerin Yahuda urıwınan bolg'an Xurdın' aqlıg'ı, Uriydin' ulı Besalel isledi.
23 Onın' menen birge Dan urıwınan bolg'an Axisamax ulı Oholiab jumıs isledi. Ol usta, bezewshi, ju'nnen iyirilgen qızg'ısh ko'k, shım qızıl, qırmızı jip ha'm hasıl zıg'ır jipten nag'ıslap toqıwshı edi.
24 Muxaddes shatırdın' barlıq islerine qollanılg'an altınnın', xalıq bag'ıshlap alıp kelgen altınnın' mug'darı Muxaddes orın o'lshemi menen 29 talant 730 shekel edi.
25 Esaptan o'tken xalıqtan jıynalg'an gu'mis Muxaddes orın o'lshemi menen 100 talant 1775 shekel edi.
26 Bul esaptan o'tken jigirma ha'm onnan joqarı jastag'ı 603 550 adamnın' ha'r birine bir beqadan*, yag'nıy Muxaddes orın o'lshemi menen yarım shekelden tuwrı keletug'ın edi.
27 Muxaddes shatırdın' ha'm En' muxaddes bo'lmeni bo'lip turg'an perdenin' ultanların quyıw ushın 100 talant gu'mis qollanıldı. Ha'r bir ultang'a 1 talant, 100 ultang'a 100 talant gu'mis sarplandı.
28 Baqanlardın' joqarısın qaplawg'a, ayrı ildirgishlerin ha'm karnizlerin sog'ıwg'a 1775 shekel gu'mis sarplandı.
29 Xalıq bergen qola 70 talant 2400 shekel edi.
30 Onnan Ushırasıw shatırının' kirer awzındag'ı baqanlar ushın ultanlar, qurbanlıq orın, onın' torı menen ha'mme buyımları,
31 ha'wlidegi barlıq baqanlar ushın ultanlar, ha'wlinin' da'rwazasının' baqanları ushın ultanlar, shatırdın' qazıqları menen ha'wli a'tirapındag'ı barlıq qazıqlar islendi.
