Shıg'ıw 40 bob
1 Jaratqan İye Muwsag'a bılay dedi:
2 – Muxaddes shatırdı, yag'nıy Ushırasıw shatırın birinshi aydın' birinshi ku'ni qur.
3 Kelisim sandıg'ın shatırdın' ishine kirgizip, onı perde menen tasalap qoy.
4 Stoldı ishke a'kelip, og'an tiyisli ha'mme na'rseni onın' u'stine qoy. Shıra qoyg'ıshtı da a'kelip, shıraların u'stine qoy.
5 Altınnan islengen tu'tetki tu'tetiletug'ın orındı Kelisim sandıg'ının' aldına qoyıp, shatırdın' kirer awzına perde taq.
6 Qurbanlıq jandırılatug'ın orındı Muxaddes shatırdın', yag'nıy Ushırasıw shatırının' kirer awzının' aldına qoy.
7 U'lken la'gendi shatır menen qurbanlıq orınnın' arasına qoyıp, ishine suw quy.
8 Shatırdın' a'tirapın aylandırıp, ha'wli isle ha'm ha'wlinin' kirer awzına perde taq.
9 Son'ınan maylawg'a arnalg'an za'ytu'n mayın alıp, shatırdı ha'm onın' ishindegi barlıq buyımlardı maylap, muxaddes qıl.
10 Qurbanlıq jandırılatug'ın orındı ha'm onın' barlıq buyımların maylap, orındı muxaddes qıl. Sonda orın ju'da' muxaddes boladı.
11 U'lken la'gendi ha'm onın' tuyaqların maylap, muxaddes qıl.
12 Xarondı ha'm onın' ulların Ushırasıw shatırının' kirer awzının' aldına a'kelip, olardı suw menen juwındır.
13 Xarong'a muxaddes kiyimlerdi kiygiz ha'm ruwxaniy bolıp, xızmet etiwi ushın, onın' basına may quyıp, Mag'an bag'ıshla.
14 Onın' ulların alıp kelip, olarg'a uzın ko'ylek kiygiz.
15 Ruwxaniy bolıp, Mag'an xızmet etiwi ushın, olardı da a'kesi sıyaqlı mayla. Bul maylaw olardın' a'wladlar boyı ma'n'gige ruwxaniy bolıwın ta'miyinleydi.
16 Muwsa ha'mme na'rseni Jaratqan İyenin' buyırg'anınday qılıp isledi.
17 Solay etip, ekinshi jıldın' birinshi ayının' birinshi ku'ni Muxaddes shatır qurıldı.
18 Muwsa shatırdı qurdı: ultanların qoydı, taxtayların ornattı, qadaların kirgizip, baqanların ko'tertti.
19 Keyin shatırdın' u'stine ishki ha'm sırtqı jabıwların japtı. Muwsa bulardın' ha'mmesin Jaratqan İyenin' o'zine buyırg'anınday etip isledi.
20 Keyin buyrıqlar jazılg'an eki tastı alıp, sandıqqa saldı. Sandıqtın' sırıqların kiygizdi ha'm sandıqtın' qaqpag'ın sandıqtın' u'stine qoydı.
21 Kelisim sandıg'ın shatırg'a kirgizdi de, perde tutıp, sandıqtı ko'zden tasalap qoydı. Muwsa ha'mmesin Jaratqan İyenin' o'zine buyırg'anınday etip isledi.
22 Nanlar turatug'ın stoldı Ushırasıw shatırının' ishine, yag'nıy shatırdın' arqag'a qarag'an ta'repine, ishki perdenin' sırtına qoydı.
23 Jaratqan İyenin' aldına, stoldın' u'stine nanlardı dizip qoydı. Muwsa bulardı Jaratqan İyenin' o'zine buyırg'anınday etip isledi.
24 Shıra qoyg'ıshtı Ushırasıw shatırına, stoldın' qarsısına, shatırdın' qubla ta'repine qoydı.
25 Jaratqan İyenin' o'zine buyırg'anınday, ol Jaratqan İyenin' aldına shıralardı qoydı.
26 Altınnan islengen tu'tetki tu'tetiletug'ın orındı Ushırasıw shatırına, perdenin' aldına qoydı.
27 Orınnın' u'stinde xosh iyisli tu'tetki tu'tetti. Muwsa bulardı da Jaratqan İyenin' o'zine buyırg'anınday etip isledi.
28 Shatırdın' kirer awzına perde taqtı.
29 Qurbanlıq jandırılatug'ın orındı Muxaddes shatırdın', yag'nıy Ushırasıw shatırının' kirer awzının' aldına qoydı. Orınnın' u'stinde jandırılatug'ın qurbanlıq ha'm g'a'lle sadaqasın usındı. Muwsa ha'mmesin Jaratqan İyenin' o'zine buyırg'anınday etip isledi.
30 U'lken la'gendi Ushırasıw shatırı menen qurbanlıq orınnın' arasına qoydı ha'm juwınıw ushın, ishine suw quydı.
31 Muwsa, Xaron ha'm Xaronnın' ulları ayaq-qolların sol jerde juwatug'ın boldı.
32 Olar Ushırasıw shatırına kiretug'ın yaki qurbanlıq orıng'a jaqınlasatug'ın waqıtta, Jaratqan İyenin' buyırg'anınday, sol jerde juwınatug'ın edi.
33 Shatırdın' ha'm qurbanlıq orınnın' a'tirapındag'ı ha'wlini perde menen qorshadı ha'm ha'wlinin' kirer awzına da perde taqtı. Solay etip, Muwsa jumıstı tamamladı.
34 Sonnan keyin, Ushırasıw shatırın bult qaplap, Jaratqan İyenin' saltanatı shatırdı toltırdı.
35 Sonın' ushın, Muwsa Ushırasıw shatırına kire almadı.
36 Pu'tkil saparları dawamında izraillılar bult shatırdın' u'stinen ko'terilgennen keyin g'ana jıynalıp, jolın dawam etetug'ın edi.
37 Biraq olar bult joqarı ko'terilmegenshe, jolg'a shıqpaytug'ın edi.
38 Solay etip, olardın' pu'tkil saparı dawamında, barlıq İzrail xalqının' ko'z aldında Jaratqan İyenin' bultı ku'ndiz shatırdın' u'stinde turdı, al tu'nde bult ishinde ot bolıp janıp turdı.
