Shıg'ıw 7 bob
1 Biraq Jaratqan İye Muwsag'a bılay dedi: – Minekey, Men seni faraon ushın Quday sıyaqlı qıldım, al a'jag'an' Xaron senin' payg'ambarın' boladı.
2 Sag'an buyırg'anlarımnın' ha'mmesin a'jag'an'a ayt. Ol faraon menen so'ylesip: «İzraillılardın' Mısır jerinen ketiwine ruxsat ber», – dep aytsın.
3 Degen menen, Men faraonnın' ju'regin qatal qılaman. Mısırda ko'p belgilerimdi ha'm ka'ramatlarımdı ko'rsetsem de,
4 faraon sizlerdi tın'lamaydı. Men qolımdı Mısırg'a sozıp, olardı qatan' jazalayman ha'm xalqım İzraildı top-tobı menen Mısır jerinen alıp shıg'aman.
5 Mısırg'a qarsı qolımdı ko'terip, izraillılardı olardın' arasınan alıp shıqqanımda, mısırlılar Menin' Jaratqan İye ekenimdi bilip aladı.
6 Muwsa menen Xaron Jaratqan İyenin' buyırg'anınday isledi.
7 Faraon menen so'yleskende, Muwsa seksen, al Xaron seksen u'sh jasta edi.
8 Jaratqan İye Muwsa menen Xarong'a bılay dedi:
9 – Faraon sizlerge: «Meni isendiriw ushın bir ka'ramat ko'rsetin'ler», – degende, sen Xarong'a: «Tayag'ın'dı faraonnın' aldına tasla», – dep ayt. Sonda tayaq jılang'a aylanadı.
10 Solay etip, Muwsa menen Xaron faraong'a barıp, Jaratqan İyenin' buyırg'anınday isledi. Xaron tayag'ın faraonnın' ha'm onın' xızmetkerlerinin' aldına tasladı. Tayaq jılang'a aylandı.
11 Sonda faraon o'z danıshpanların ha'm sıyqırshıların shaqırdı. Olar da o'z sıyqırshılıg'ı menen anıq solay isledi.
12 Olardın' ha'r biri tayag'ın taslap jibergende, tayaqlar jılang'a aylandı. Biraq Xaronnın' tayag'ı olardın' tayaqların jutıp jiberdi.
13 Jaratqan İyenin' aytqanınday, faraonnın' ju'regi qatal bolıp, Muwsa menen Xarondı tın'lamadı.
14 Son'ınan Jaratqan İye Muwsag'a bılay dedi: – Faraonnın' ju'regi qatal bolıp tur. Ol xalıqtı jiberiwden bas tartıp atır.
15 Erten'ine azanda bar da, faraon Nil da'ryasına qaray shıqqanda, jılang'a aylang'an tayag'ın'dı alıp, da'rya jag'asında onın' jolın tosıp tur.
16 Keyin faraong'a bılay de: «„Sho'lde Mag'an sıyınıwı ushın, xalqımdı jiber“, – dep aytıwım ushın, evreylerdin' Qudayı Jaratqan İye meni sag'an jiberdi. Biraq sen usı waqıtqa shekem qulaq aspadın'.
17 Sonlıqtan Jaratqan İye bılay deydi: „Menin' Jaratqan İye ekenimdi mınadan bilip alasan': minekey, qolımdag'ı tayaq penen da'ryanın' suwına ursam, suw qang'a aylanadı.
18 Da'ryadag'ı balıqlar o'lip, da'rya sasıp ketedi ha'm mısırlılar da'ryanın' suwın ishe almay qaladı“».
19 Keyin Jaratqan İye Muwsag'a bılay dedi: – Xarong'a ayt, ol tayag'ın alıp, onı Mısırdın' suwları u'stine – da'ryaları, o'zekleri, ko'lleri ha'm barlıq ha'wizleri u'stine sozsın. Olardag'ı, ha'tte, pu'tkil Mısırdag'ı ag'ash ha'm tas ıdıslardag'ı suwlar da qang'a aylanadı.
20 Muwsa menen Xaron Jaratqan İyenin' buyırg'anınday isledi. Xaron faraon ha'm onın' xızmetshilerinin' ko'z aldında tayaqtı ko'terip, Nil da'ryasının' suwına urıp jibergende, ondag'ı barlıq suwlar qang'a aylandı.
21 Da'ryadag'ı balıqlar o'lip, da'rya sasıy basladı. Mısırlılar da'ryanın' suwın ishe almay qaldı. Mısırdın' ha'mme jerin qan jaylap ketti.
22 Biraq mısırlı sıyqırshılar da o'z sıyqırshılıg'ı menen anıq usılay isledi. Jaratqan İyenin' aytqanınday, faraonnın' ju'regi qatal bolıp, Muwsa menen Xarondı tın'lamadı.
23 Faraon artına burılıp, sarayına qaytıp ketti. Bul waqıya da og'an ta'sir etpedi.
24 Pu'tkil mısırlılar ishetug'ın suw tabıw ushın, da'rya boyın qazıwg'a kiristi. O'ytkeni olar da'ryanın' suwın ishe almaytug'ın edi.
25 Jaratqan İye Nil da'ryasının' suwın qang'a aylandırg'annan keyin, aradan jeti ku'n o'tti.
