1 Dana hayal u'yin jaynatar, Aqılsız hayal onı o'z qolı menen buzar.
2 Tuwrı joldan ju'retug'ın Jaratqan İyeden qorqatug'ın, Joldan shıqqan Onı mensinbeytug'ın adam.
3 Aqmaqtın' so'zi arqasına qamshı bolar, Dananın' so'zi onı qorg'ar.
4 O'giz bolmasa, aqır bos turar, O'gizdin' ku'shinen mol payda alınar.
5 İsenimli gu'wa o'tirik so'ylemes, Jalg'an gu'wanın' o'tirigi tawısılmas.
6 Surbet danalıq izler, biraq taba almas, Aqıllıg'a bilim an'sat tabılar.
7 Aqmaqtan awlaq ju'r, Bilimli so'z shıqpas onın' awzınan.
8 Parasatlı adamnın' danalıg'ı – o'z jolın tu'siniwi, Aqılsızdın' aqmaqlıg'ı – aldamshılıq.
9 Aqmaqlar ayıp qurbanlıg'ı u'stinen ku'ler, Haq adamlar Qudaydın' miyrimine sazıwar bolar.
10 Ha'r kimnin' qayg'ısı o'zine ayan, Quwanıshın da hesh kim bo'lise almas.
11 Zalımnın' u'yi buzılar, Haq adamnın' shatırı gu'llene berer.
12 Sonday jol bar, adamg'a durıs bolıp ko'riner, Biraq aqıbeti, o'limge alıp barar.
13 Geyde ku'lgende de ju'regin' sızlar, Quwanısh ta geyde qayg'ı menen juwmaqlanar.
14 Azg'ın adam tutqan jolının', Jaqsı adam islegen isinin' sıyın alar.
15 Sada ha'mme so'zge isene berer, Aqıllı adımın oylap basar.
16 Dana qorqıp, jamanlıqtan awlaq bolar, Aqılsız o'zin basqara almas ha'm o'zine isener.
17 Ashıwshaq aqılsızlıq qılar, Niyeti buzıqtı ha'mme jek ko'rer.
18 Sadanın' nesiybesine aqmaqlıq tiyer, Aqıllı bilimdi taj qılar.
19 Jawızlar jaqsılar aldında, Zalımlar a'dillerdin' da'rwazası aldında ta'jim eter.
20 Ka'mbag'aldı qon'sıları da jaqsı ko'rmes, Baylardın' dostı ko'p bolar.
21 Jaqının kemsitken gu'na qılar, Jarlıg'a miyrim ko'rsetken baxıtlı bolar.
22 Niyeti buzıqlar joldan adaspay ma?Biraq jaqsı niyetliler su'yispenshilik ha'm sadıqlıqqa iye bolar.
23 Ha'r qanday miynettin' paydası bar, Bos so'z tek joqshılıq keltirer.
24 Danalardın' tajı – olardın' baylıg'ı, Aqılsızlardın' tajı – aqmaqlıg'ı.
25 A'dil gu'wa jandı qutqarar, Jalg'an gu'wa satqınlıq qılar.
26 Jaratqan İyeden qorqıw – bekkem qorg'an, Onın' balalarına da pana bolar.
27 Jaratqan İyeden qorqıw – o'mirdin' bulag'ı, Ol o'lim duzag'ınan qutqarar.
28 Xalıqtın' ko'pligi – patshanın' ullılıg'ı, Xalıqtın' azlıg'ı – hu'kimdardın' apatı.
29 Sabır-taqatlı adamda ullı aqıl bar, Ashıwshaq o'z aqmaqlıg'ın ma'lim qılar.
30 Tınısh ju'rek denege o'mir berer, Qızg'anshaqlıq su'yeklerdi shiriter.
31 Jarlını ezgen Jaratqang'a til tiygizgen bolar, Mu'ta'jge ja'rdem bergen Jaratqandı hu'rmet etken bolar.
32 Zalım o'z jawızlıg'ı sebepli joq bolar, A'dillerge o'lerinde de pana tabılar.
33 Danalıq aqıllının' ju'regine ornalasar, Ha'tte, aqmaqlardın' ju'regi de onı tanıydı.
34 A'dillik xalıqtın' da'rejesin ko'terer, Nızamsızlıq xalıqtı masqara eter.
35 Patshag'a aqıllı xızmetshi unar, Shermende is qılg'ang'a onın' g'a'zebi jawar.
