1 Sayaq adam qara basın oylar, Barlıq saw pikirge qarsı shıg'ar.
2 Aqmaq tu'siniwdi jek ko'rer, Ol o'z oyın bildiriwdi xosh ko'rer.
3 Zalım o'zi menen kemsitiwshilik, Biyabıraylıq o'zi menen masqarashılıq alıp keler.
4 Adamnın' awzınan shıqqan so'zler teren' suwlarg'a, Danalıq bulag'ı ag'ın suwg'a megzer.
5 Hu'kimde zalımdı jaqlap, Ayıpsızdı nahaqqa shıg'arıw jaqsı emes.
6 Aqmaqtın' tili ja'njel tuwdırar, Awzı menen du'rreni shaqırar.
7 Aqılsızdın' awzı o'zine a'jel, Onın' tili bolsa, janına duzaq bolar.
8 O'sekshinin' so'zi sonday tatlı, Olar adamnın' jan du'nyasına kirip alar.
9 O'z jumısına nemquraydı bolıw – Buzg'ınshının' tuwısqanı.
10 Jaratqan İyenin' atı – bekkem minara, A'dil og'an qashıp, bas sawg'alar.
11 Baylardın' baylıg'ı olardın' bekkem qalası, O'z qıyalına biyik diywalday ko'riner.
12 Qular aldınan adamnın' ju'regi ta'kabbirlener, Hu'rmetten aldın kishipeyillik keler.
13 Tın'lamay juwap beriw, Aqmaqlıq ha'm uyatsızlıq.
14 Adamnın' da'rtine ruwxı to'zim berer, Biraq ezilgen ruwxqa kim shıdam berer?
15 Aqıllının' ju'regi bilimdi iyeler, Dananın' qulag'ı bilimdi izler.
16 Sıy beriw adamg'a jol ashar, Hu'rmetli adamlar aldına deyin aparar.
17 Qarsılası kelip, og'an soraw qoyıp teksermegenshe, Birinshi bolıp dawlasqan haq bolıp ko'riner.
18 Shek taslaw dawdı toqtatar, Ku'shli qarsılaslardın' dawın shesher.
19 O'kpeli tuwısqan bekitilgen qalag'a, Arasındag'ı daw bolsa, qorg'an qala da'rwazasının' ta'mbisine uqsar.
20 Adam awzının' jemisinen qarnın, Tilinin' o'niminen o'zin toydırar.
21 O'lim ha'm o'mir tildin' ıqtıyarında, Til ne so'ylese, sonın' jemisinen da'm tatar.
22 U'ylengen bereket tabar, Jaratqan İyenin' miyrimine eriser.
23 Jarlı jalınıp so'yler, Bay turpayı juwap berer.
24 Doslar bar, o'zin dos qılıp ko'rsetken, Biraq shın dos ta bar, tuwısqannan da jaqın.
