1 Jalg'an tilli aqmaqtan, Minsiz ju'rgen jarlı jaqsı.
2 Bilimsiz umtılıs jaqsı emes, Asıqqan joldan jan'ılısar.
3 O'z aqmaqlıg'ı adamnın' jolın buzar, Al onın' ju'regi Jaratqang'a narazı bolar.
4 Baylıq doslardı ko'beyter, Jarlını dostı da taslap keter.
5 Jalg'an gu'wa jazasız qalmas, O'tirik so'ylegen qutıla almas.
6 Ko'pler jomart adamnın' miyrimine tu'siwdi qa'ler, Qolı ashıqqa ha'mme dos bolar.
7 Jarlını tuwısqanları da jek ko'rer, Dosları da onnan sonshelli bezip keter, So'ylesiw ushın izlese de, olardı taba almas.
8 Danalıqqa erisken o'z janın su'yer, Aqıl-parasatqa kewil qoyg'an jaqsılıq tabar.
9 Jalg'an gu'wa jazasız qalmas, O'tirikshi tiri qalmas.
10 Saltanatlı o'mir aqmaqqa jaraspag'anı sıyaqlı, Baslıqlarg'a biylik etiw qulg'a sira' da' jaraspas.
11 Aqıl adamnın' g'a'zebin tıyar, Qa'teni keshiriw og'an hu'rmet keltirer.
12 Patshanın' g'a'zebi arıslannın' aqırıwına uqsar, Al onın' miyrimi sho'pke tu'sken shıqqa uqsar.
13 Aqılsız bala a'kesinin' basına ba'le bolar, Urısqaq hayal toqtamay tamatug'ın suwg'a uqsar.
14 U'y ha'm baylıq – ata-anadan miyras, Aqıllı hayal – Jaratqan İyeden sıy.
15 Qosjaqpaslıq adamdı qattı uyqıshı qılar, Erinshek ash qalar.
16 Buyrıqlardı orınlag'an o'mirin saqlar, O'z jolına itibar bermegen nabıt bolar.
17 Jarlıg'a miyrim ko'rsetiw – Jaratqan İyege qarız bergendey bolar, İslegen jaqsılıg'ının' esesin Jaratqan İye qaytarar.
18 U'mit barda balan'dı jo'nge sal, Onın' o'liwine ayıplı bolma.
19 Ashıwshaq jazasın alsın, Eger qutqarsan', onı ja'ne de jazalawg'a tuwrı keledi.
20 Keleshekte dana bolıwın' ushın, Ken'esti tın'lap, na'siyattı qabıl et.
21 Adam ju'reginde niyet ko'p, Biraq tek Jaratqan İyenin' maqseti a'melge asar.
22 Adamnın' qa'lewi – sadıqlıq, Jarlı bolıw o'tirikshi bolıwdan jaqsıraq.
23 Jaratqan İyeden qorqıw o'mirge jeteler, Ol tınısh ha'm mashqalasız jasar.
24 Erinshek tabaqqa qol salar, Biraq awzına aparıwg'a eriner.
25 Surbetti jazalasan', sadalar aqılg'a kirer, Eger aqıllını a'shkaralasan', ol sonnan sabaq alar.
26 A'kesin tonap, anasın quwg'an bala, Shermendelik ha'm isnat keltirer.
27 Balam, na'siyattı tın'lawdı toqtatqanın', Bul bilimli so'zlerden bas tartqanın'
28 Jaramas gu'wa a'dalatlıq u'stinen ku'ler, Zalımlardın' awzı jamanlıqtı jalmap jutar.
29 Surbetler ushın hu'kim tayar, Aqmaqtın' arqasına du'rre tayar.
