Hikmetleri 2 bob
1 Balam! Eger sen so'zlerimdi qabıl qılıp, Buyrıqlarımdı ishin'de saqlasan',
2 Danalıqqa qulaq tu'rip, Tu'sinikke ju'regin'di ashsan',
3 Eger aqıl-parasattı shaqırıp, Tu'sinikke dawıslap jalbarınsan',
4 Onı gu'mis kibi izlep, Ko'milgen g'a'ziyne kibi aqtarsan',
5 Sonda sen Jaratqan İyeden qorqıwdın' ne ekenin tu'sinip, Qudaydın' kim ekenin bilesen'.
6 Danalıqtı Jaratqan İye berer, Bilim ha'm tu'sinik Onın' awzınan shıg'ar.
7 Ol haqlar ushın tabıs sıylap, Minsizler ushın qalqan bolar.
8 Ol a'dalatlıq jolların qorıp, O'zine sadıqlardın' jolların qorg'ar.
9 Sonda sen a'dillik ha'm a'dalatlıqtı ug'ıp, Hadal ha'm tuwrı joldın' ne ekenin tu'sinersen'.
10 Ju'regin' danalıqqa tolıp, Kewlin' bilimnen zawıq alar
11 Aqıl-parasat seni aman saqlap, Durıs tu'sinik seni qorg'ar.
12 Danalıq seni jawızlardın' jolınan, Jalg'an so'ylewshilerden,
13 Qaran'g'ılıq jolınan ju'riw ushın, Tuwrı joldı taslap ketkenlerden,
14 Jamanlıq islep quwanıp, Jawızlıqtın' buzg'ınlıg'ınan la'zzet alatug'ınlardan,
15 Teris jolg'a tu'sip, O'z jollarınan adasqanlardan saqlar.
16 Danalıq seni buzıq hayaldan, Jezo'kshe hayaldın' maylı tilinen saqlar.
17 Ol jaslay qosılg'an ku'yewin taslap ketken, Ha'm Qudaydın' aldında du'zgen kelisimin umıtqan.
18 Onın' u'yi o'limge, Jolları o'liler aldına alıp baradı.
19 Og'an barg'anlar qaytıp kelmes, O'mir jolına qayta tu'spes.
20 Sonlıqtan jaqsılardın' jolınan ju'r, A'dillerdin' jolın bekkem tut.
21 Haqlar jer betin ma'kan qılar, Minsizler sol jerde qalar.
22 Jamanlar jer betinen qırıp taslanar, Opasızlar tu'p-tamırı menen joq qılınar.
