1 Patshanın' ju'regi Jaratqan İyenin' qolındag'ı suw ag'ısına uqsar, Ol patsha qa'legen jag'ına bag'ıtlar.
2 O'z jolının' ha'mmesi adamg'a tuwrı bolıp ko'riner, Biraq Jaratqan İye ju'rekti tekserer.
3 A'dillik ha'm a'dalatlıqtı saqlaw, Jaratqan İye ushın qurbanlıq bergennen unamlıraq.
4 Ta'kabbir na'zer ha'm menmen ju'rek, Zalımlardın' shırag'ı ha'm gu'nası.
5 Miynetkesh adamnın' oy-niyeti molshılıq alıp keler, Asıg'ıslardın' ba'ri joqshılıqqa ushırar.
6 Jalg'an til menen jıynalg'an baylıq, Joq bolıp ketetug'ın puw ha'm o'lim duzag'ı.
7 Zalımlardın' zulımlıg'ı o'zin joq qılar, Olar a'dalatlı is tutıwdan bas tartar.
8 Ayıplının' jolı qıysıq, Ayıpsızdın' is-ha'reketi tuwrı.
9 Urısqaq hayal menen bir u'yde jasag'annan, U'shektin' bir mu'yeshinde jasag'an jaqsı.
10 Zalımnın' kewli jawızlıqqa qumar, Jaqını da onnan rehim tappas.
11 Surbetke jaza berilse, sadag'a aqıl kirer, Dana ta'lim alsa, bilimi artar.
12 A'dil Quday zalımnın' u'yin baqlar, Zalımlardı nabıt qılar.
13 Jarlının' pa'riyadına qulaq salmag'an, O'zi pa'riyad qılg'anda juwap ala almas.
14 Jasırın berilgen sawg'a g'a'zepti, Qoyıng'a tıg'ıp berilgen para ku'shli qa'ha'rdi basar.
15 A'dalat ju'zege assa, a'diller quwanar, Al jawızlıq qılıwshılardı qorqınısh biyler.
16 Aqıllılıq jolınan uzaqlasqan, O'liler jıyınına ornalasar.
17 Zawqı-sapanı su'ygen jarlılanar, Sharaptı ha'm za'ytu'n mayın su'ygen bayımas.
18 Zalım a'dildin', Biyopa haqtın' to'lemi bolar.
19 Urısqaq ha'm kekshil hayal menen jasag'annan, Sho'lde jasag'an jaqsıraq.
20 Dananın' u'yi qımbatbaha g'a'ziyne ha'm za'ytu'n mayına tolar, Aqılsız barın shashar.
21 A'dillik ha'm miyrim izlegen adam, O'mir, a'dalat ha'm hu'rmetke iye bolar.
22 Dana adam ku'shlilerdin' qalasına kirer, Olar isengen qorg'andı tas-talqan qılar+.
23 Awzına ha'm tiline bek bolg'an, Janın apattan saqlar.
24 O'rko'kirek ha'm ta'kabbirdi surbet dep atar, Ol asa menmenlik penen ha'reket eter.
25 Erinshekti qumarlıg'ı o'ltirer, Qolları jumıstan bas tartar.
26 Ol ku'n boyı ashko'zlik penen alıwdı go'zler, Biraq a'dil ayamay berer.
27 Zalımnın' qurbanlıg'ı – jerkenishli, A'sirese, jawız oy menen berse, onnan da jaman.
28 Jalg'an gu'wa nabıt bolar, Ha'mmesin esitkennin' gu'walıg'ı o'ter.
29 Zalım ju'zin isenimli qılıp ko'rseter, Haq adam o'z jolında bekkem turar.
30 Jaratqan İyege qarsı turatug'ın, Danalıq ta, tu'sinik te, ken'es te joq.
31 At sawash ku'ni ushın tayınlanar, Biraq jen'is Jaratqan İyeden beriler.
