Hikmetleri 22 bob
1 Jaqsı ataq u'lken baylıqtan jaqsı, Jaqsı at-abıray gu'mis ha'm altınnan jaqsı
2 Bay ha'm jarlının' ortaqlıg'ı mınada: Olar ekewin de Jaratqan İye jaratqan.
3 Aqıllı qa'wip-qa'terdi ko'rip, bas sawg'alar, Sada alg'a basıp bara berip, za'lel ko'rer.
4 Kishipeyillik ha'm Jaratqan İyeden qorqıw ushın beriletug'ın sıy – Baylıq, dan'q ha'm o'mir.
5 Azg'ınnın' jolı tiken ha'm duzaqqa tolı, Janın saqlamaqshı bolg'an onnan awlaq ju'rsin.
6 Balanı jastan tuwrı jolg'a sal, Ol qartayg'anda da onnan taymaydı.
7 Baylar jarlılarg'a u'stemlik qılar, Qarızdar qarız bergenge qul bolar.
8 Nahaqlıq qılg'an apat orar, Onın' g'a'zep qamshısı sınar.
9 Saqıy adam bereket tabar, O'z nanın jarlılar menen bo'liser.
10 Surbetti quwsan', ja'njel de keter, Daw ha'm keyis te toqtar.
11 Ju'rek pa'kligin su'yetug'ın ha'm jag'ımlı so'yleytug'ın adamg'a, Patsha dos bolar.
12 Jaratqan İyenin' na'zeri bilimdi qorg'ar, Opasızdın' so'zlerin Ol joqqa shıg'arar.
13 Erinshek: «Dalada arıslan bar! Maydan ortasında meni o'ltiredi!» – der.
14 uzıq hayaldın' awzı tu'psiz shuqırg'a megzer, Jaratqan İye kimge g'a'zeplense, ol sol shuqırg'a qular.
15 Aqılsızlıq o'spirimnin' ju'reginde bar, Ta'rbiyalawshı qamshı onı sonnan arıltar.
16 Bayıw ushın jarlıg'a ja'bir ko'rsetetug'ın, Bayg'a sıy beretug'ın adam ka'mbag'allasadı.
17 Danalardın' so'zlerin qulaq tu'rip tın'la, Beretug'ın bilimime ju'regin'di ash.
18 Olardı ju'regin'de saqlasan', Ha'm olar senin' tillerin'de bolsa, jaqsı boladı.
19 İsenimin'di Jaratqan İyege artıwın' ushın, Bu'gin bulardı sag'an, awa, sag'an u'yretip atırman.
20 Ma'sla'ha't ha'm bilim menen, Sag'an otız na'siyat jazbag'an ba edim?
21 Bul isenimli haqıyqat so'zlerin u'yreniwin', Seni jibergenge durıs juwap bere alıwın' ushın jazılg'an emes pe edi?
22 Jarlını jarlılıg'ı sebepli tonama, Baxıtsızdı da'rwaza aldında hu'kim qılg'anda qıynama.
23 Olardın' isin Jaratqan İye jaqlar, Olardı tonag'anlardın' janın alar.
24 Ashıwshaq adam menen dos bolma, Qızba adam menen joldas bolma.
25 Bolmasa, sen de og'an eliklersen', Janın'dı duzaqqa tu'sirersen'.
26 Qol berip, Basqanın' qarızına kepil bolatug'ınlardın' biri bolma.
27 To'lew ushın hesh na'rsen' bolmasa, To'segin'di de astın'nan tartıp alar.
28 Ata-babaların' qoyıp ketken, Eski shegara belgisin jıljıtpa.
29 O'z ka'sibinin' mamanı bolg'an adamdı ko'rdin' be? Ol patshalarg'a xızmet eter, A'piwayı adamlarg'a xızmet etpes.
