Hikmetleri 24 bob
1 Zalım adamlarg'a ha'wes qılma, Olar menen birge bolıwdı ku'seme.
2 Olardın' oyı zorlıq etiwdi oylar, Awzı mashqala keltiriw tuwralı so'z eter.
3 Danalıq penen u'y salınar, Aqıl menen berik bolar.
4 Bilim menen u'ydin' ishi, Qımbatbaha ha'm a'jayıp baylıqqa tolar.
5 Dana adam ku'shli bolar, Bilimli adam ku'shke tolıp barar.
6 Sonlıqtan urıstı aqıl-ken'es penen alıp bar, Ma'sla'ha'tshi ko'p jerde jen'is bar.
7 Aqmaq ushın danalıq qol jetpes bolar, Ma'jiliste ol awzın da ashpas.
8 Jamanlıq islewdi niyet etken adam, Niyeti buzıq dep atalar.
9 Aqmaqtın' haram oyı – gu'na, Surbet – adamlar ushın jerkenishli.
10 Eger sen apatqa ushırag'anda ha'lsizlik etsen', Onda senin' ku'shin'nin' az bolg'anı.
11 Ayıpsız o'limge kesilgendi qutqar, Soymaqshı bolg'andı izine qaytar.
12 «Biz bunı bilmedik», – desen' de, Ju'rekti sınaytug'ın Quday shınlıqtı bilmey me? Janın'dı qorg'aytug'ın bunı an'lamay ma? Ol ha'r bir adamg'a isine jarasa qaytarmay ma?
13 Balam, pal je, ol jaqsı, Pal uyanın' palı tan'layın'a tatlı.
14 Sol sıyaqlı, danalıq ta janın'a tatlı, Eger onı tapsan', keleshegin' bolar, U'mitin' de u'zilmes.
15 Ha'y zalım, a'dildin' u'yine jawızlıq oylama, Onın' ma'kanın wayranlama.
16 A'dil jeti ret jıg'ılsa da, turıp keter, Zalım apatshılıqtan nabıt bolar.
17 Dushpanın' jıg'ılsa, quwanba, Su'rnikse, shadlanba.
18 So'ytsen', Jaratqan İye bunı ko'rip, narazı bolar, Dushpanın'a degen g'a'zebinen qaytar.
19 So'ytsen', Jaratqan İye bunı ko'rip, narazı bolar, Dushpanın'a degen g'a'zebinen qaytar.
20 Jawızlıq qılıwshılardın' keleshegi joq, Zalımlardın' shırag'ı o'ship qalar.
21 Balam, Jaratqan İyeden ha'm patshadan qorq, Qozg'alan'shı menen sherik bolma.
22 Jaratqan İye ha'm patsha tosattan ba'le jiberer, Olar ekewinin' qanday ba'le jiberetug'ının kim biler?
23 Mınalar da danalardın' aytqanları: Hu'kimde adamdı alalaw jaqsı emes.
24 Ayıplıg'a; «Sen ayıpsızsan'», – degendi xalıqlar na'letler, Milletler onı jek ko'rer.
25 Ayıplını jazalag'an tabısqa eriser, Og'an jarılqawlar jawar.
26 Tuwrı juwap, Haqıyqıy doslıqtın' belgisi.
27 Sırttag'ı islerin'di pitker, Egislik jerin'di ta'rtipke sal, Son'ınan u'yin'di qur.
28 Sebepsiz jaqının'a qarsı jalg'an gu'walıq berme, Awzın' menen o'tirik so'yleme.
29 «Mag'an ne qılg'an bolsa, o'zine de sonı isleymen, Ol ne qılsa, o'zine sonı qaytaraman», – deme.
30 Men erinshektin' atızınan, Essizdin' ju'zimzarınan o'ttim.
31 Qarasam, ha'mmesine tikenler o'sken, Jerinin' betin jabayı sho'p basqan, Tas diywalı da qulag'an.
32 Qarap, oylanıp qaldım, Ko'rip, sabaq aldım:
33 «Biraz uyıqlap, az-maz mu'lgip otırsan', Geyde qol qawsırıp, jatıp alsan',
34 Tonawshıday bolıp, joqshılıq jetip keler, Qaraqshıday bolıp, mu'ta'jlik bas salar».
