1 Jazg'a qar, orım-jıyın waqtına jawın jaraspag'anı sıyaqlı, Aqmaqqa dan'q jaraspas.
2 Shımshıqtın' pırıldap ushqanınday, Qarlıg'ashtın' ushıp ketkenindey, Jo'nsiz g'arg'ıs ta adamg'a tiymes.
3 Atqa qamshı, eshekke ju'wen, Aqmaqtın' arqasına tayaq kerek.
4 Aqmaqqa aqmaqlıq penen juwap berme, Bolmasa, o'zin' de og'an uqsap qalasan'.
5 Eger aqmaqqa aqmaqlıg'ına say juwap bermesen', Onda ol o'zin aqıllı sanar.
6 Aqmaq arqalı xabar jibergen, Ayag'ına balta urg'anday yamasa zorlıqqa shıdag'anday bolar.
7 Aqmaq aytqan hikmetler, Aqsaqtın' ayag'ınday nategis bolar.
8 Aqılsızdı hu'rmetlew, Saqpang'a tastı baylap atqanday paydasız.
9 Aqmaq aytqan hikmetler, Ma'sku'nemnin' qolındag'ı tikenli shaqag'a uqsar.
10 Aqmaqtı yaki dus kelgen adamdı jallawshı, Bet aldına qaramay jaraqat salatug'ın sadaqshıg'a uqsar.
11 O'z aqmaqlıg'ın ta'kirarlag'an aqmaq, O'z qusıg'ına qaytıp kelgen iytke uqsar.
12 O'zin dana dep sanaytug'ın adamdı ko'rdin' be? Sonday adamg'a qarag'anda, aqmaqtan ko'birek u'mit bar.
13 Jalqaw: «Jolda arıslan bar. Maydanlarda arıslan ju'r», – deydi.
14 Esiktin' topsada aylana bergeni sıyaqlı, Erinshek to'seginde awnap jata berer.
15 Erinshek tabaqqa qol salar, Biraq awzına aparıwg'a eriner.
16 Erinshek o'zin, Oylanıp juwap beretug'ın jeti adamnan da aqıllıraq sanar.
17 Basqanın' ja'njeline aralasqan, Joldag'ı iyttin' qulag'ınan tartqang'a uqsar.
18 Telbe adamdı o'ltiretug'ın otlı oqlar atadı.
19 Jaqının aldap, zıyan keltirgennen keyin: «Men ha'zillesip edim», – deytug'ın adam da sonday.
20 Otın tawısılsa, ot o'sher, O'sekshi bolmasa, daw so'ner.
21 Ko'mir qızıw ushın, otın ot ushın, Urısqaq adam ja'njeldi tutandırıw ushın.
22 O'sekshinin' so'zi sonday tatlı, Olar adamnın' jan du'nyasına kirip alar.
23 Shiyrin so'zli jawız niyetli adam, Gu'mis jalatılg'an ılay ıdısqa megzer.
24 Dushpan o'z kegin tili artına jasırar, Ju'reginde bolsa, hiyle saqlar.
25 Onın' mu'la'yim so'ylegenine isenbe, Ju'reginde jeti sumlıq bar onın'.
26 O'shpenligin hiyle menen jasırsa da, Jawızlıg'ı xalıq jıyınında ju'zege shıg'ar.
27 Kim go'r qazsa, sog'an o'zi tu'ser, Kim joqarıg'a tas domalatsa, o'zi astında qalar.
28 Jalg'an til o'zi jaralag'anlardı jek ko'rer, Jag'ımpaz awız apat keltirer.
