1 Jiyi eskertiwdi tın'lamay qasarısqan adam, Ku'tilmegende, shıpasız o'lip keter.
2 A'diller biylik etse, xalıq quwanar, Zalımlar biylik etse, xalıq dad salar.
3 Danalıqtı su'ygen a'kesine quwanısh keltirer, Buzıqlar menen dos bolg'an baylıg'ın shashar.
4 Patsha a'dalatlıq penen eldi bekkemler, Para alg'an onın' qutın qashırar.
5 Jaqınına jag'ımpazlang'an, Onın' ayag'ı astına aw qurg'an bolar.
6 Zalımnın' gu'nası o'zine duzaq bolar, A'dil qosıq aytar ha'm shadlanar.
7 A'dil jarlılardın' huqıqın qorg'ar, Zalımnın' bug'an bilimi jetpes.
8 Surbetler qalanı ko'teriliske tu'rtkiler, Danalar ashıw-ızanı basar.
9 Dana adam aqmaq penen qazıxanada dawlassa, Aqmaq ashıwlanıp ta, ku'lip te maza bermes.
10 Qanxor adamlar minsizdi jek ko'rer, Haq adamlar onın' o'mirine g'amxorlıq eter.
11 Aqmaq bar ashıwın to'ger, Dana o'zin o'zi biyler.
12 Eger hu'kimdar jalg'an so'zge qulaq salsa, Onın' barlıq ha'meldarları jawızg'a aylanar.
13 Jarlı menen eziwshige ortaq na'rse mınaw: Ekewinin' de ko'zine Jaratqan İye nur bergen.
14 Patsha jarlılarg'a a'dalatlı hu'kim shıg'arsa, Onın' taxtı ha'rdayım bekkem bolar.
15 Tayaq ha'm eskertiw danalıq berer, Qarawsız qalg'an bala anasın uyatqa qaldırar.
16 Zalımlar ko'beyse, nızamsızlıq ko'beyer, A'diller bolsa, olardın' qulag'anın ko'rer.
17 Balan'dı ta'rbiyala, ol sag'an ra'ha't berer, Janın'dı quwanıshqa bo'ler.
18 Ko'kten ayan bolmasa, xalıq ju'wensiz bolar, Nızamg'a a'mel qılg'an baxıtlı bolar.
19 Quldı tek so'z benen ta'rbiyalap bolmas, Ol tu'sinedi, biraq qulaq salmas.
20 Oylanbay so'yleytug'ın adamdı ko'rdin' be? Sonday adamg'a qarag'anda, aqmaqtan ko'birek u'mit bar.
21 Qul balalıg'ınan erkeletip o'sirilse, Aqırında basın'a ba'le bolar.
22 G'a'zepli adam ja'njel shıg'arar, Qızba adam ko'p gu'na qılar.
23 Menmenlik adamdı jer qılar, Kishipeyil hu'rmetke iye bolar.
24 Urıg'a sherik bolg'an o'z janın jaman ko'rer, G'arg'ısqa qalsa da, bilgenin aytıwg'a batılı jetpes.
25 Adamnan qorqıw duzaqqa tu'sirer, Jaratqan İyege u'mit artqan qa'wipsiz bolar.
26 Ko'pler hu'kimdardın' ko'zine tu'siwdi qa'ler, Biraq a'dalat Jaratqan İyeden beriler.
27 A'diller ushın nahaqlar jerkenishli, Zalımlar ushın haq ju'rgenler jerkenishli.
