Hikmetleri 3 bob
1 Balam, u'yretkenlerimdi umıtpa, Buyrıqlarımdı ju'regin'de saqla!
2 Olar o'mir jasın'dı uzaytıp, Mol tınıshlıq sıylaydı.
3 Su'yispenshilik ha'm sadıqlıq hasla seni ta'rk etpesin, Olardı moynın'a tag'ıp, Ju'regin'e oyıp jazıp qoy.
4 Sonda Qudaydın' ha'm adamlardın' na'zerinde, Miyrim ha'm abırayg'a iye bolasan'.
5 Shın ju'rekten Jaratqan İyege u'mit bayla, O'z aqıl-parasatın'a su'yenip ju'rme.
6 İslegen ha'r bir isin'de Jaratqan İyeni tanıp bil, Ol senin' jolların'dı tuwrılap turar.
7 O'zin'di danıshpanman dep sanama, Jaratqan İyeden qorq, jamanlıqtan awlaq ju'r.
8 Bul denen'e salamatlıq, Su'yeklerin'e azıq boladı.
9 Mal-mu'lkin'nen ha'm ha'mme zu'ra'a'tin'nin' da'slepki o'niminen berip, Jaratqan İyege hu'rmet ko'rset.
10 Sonda teleklerin' da'nge tolıp-tasar, İskenjelerin' taza sharapqa tolar.
11 Balam, Jaratqan İyenin' ta'rbiyasına itibarsız qarama, Ol a'shkaralag'anda awır alma.
12 A'ke jaqsı ko'rgen ulın jazalag'anı sıyaqlı, Jaratqan İye de kimdi su'yse, sonı a'shkaralaydı.
13 Danalıqtı tapqan, Tu'sinikke iye bolg'an adam qanday baxıtlı!
14 O'ytkeni danalıq gu'misten qunlıraq, Onın' paydası altınnan da joqarı.
15 Danalıq hasıl tastan da qımbat, Qumartqan hesh bir na'rsen' og'an ten' kelmes.
16 Uzaq o'mir onın' on' qolında, Baylıq ha'm dan'q sol qolında.
17 Danalıqtın' jolları jag'ımlı jollar, Onın' barlıq soqpaqları tınıshlıqqa aparar.
18 Onı iyelegen adam ushın danalıq o'mir teregi, Onı bekkem uslag'an qanday baxıtlı!
19 Jaratqan İye danalıq penen jerdin' tiykarın saldı, Tu'sinik penen ko'klerdi bekkem ornattı.
20 Onın' bilimi menen tun'g'ıyıqtın' ko'zleri ashıldı, Bultlar shıq tu'sirdi.
21 Balam! Saw pikir ha'm durıs tu'sinikti saqla, Olardı na'zerin'nen qashırma.
22 Olar janın'a o'mir, Moynın'a a'jayıp monshaq boladı.
23 Sonda o'mir jolın'da qa'wipsiz ju'rersen', Ayaqların' da su'rnikpes.
24 Jatqanın'da qorqpassan', Uyıqlag'anın'da uyqın' tınısh bolar.
25 Tosattan bolatug'ın apattan, Nahaqlardın' basına tu'setug'ın ba'leden qorqpassan'.
26 Jaratqan İye senin' su'yenishin' bolıp, Ayaqların'dı duzaqqa tu'siwden saqlaydı.
27 Qolın'nan keletug'ın waqıtta, Mu'ta'jlerden ja'rdemin'di ayama.
28 Qolın'da bar bola tura jaqının'a: «Erten' kel, sonda beremen», – deme.
29 Biyg'am janın'da jasap atırg'an qon'sın'a, Jamanlıq oylama.
30 O'zin'e jamanlıq qılmag'an adam menen, Sebepsiz ja'njellespe.
31 Zorlıq islewshige ha'wes qılma, Onın' jollarının' birde birewin tan'lama.
32 Jaratqan İye azg'ırıwshılardan jerkenedi, Haq adamg'a jaqın boladı.
33 Jaratqan İye zalımnın' u'yin na'letleydi, A'dillerdin' ma'kanın jarılqaydı.
34 Ol surbetlerdin' o'zlerin mazaq qıladı, Kishipeyillerge miyrim ko'rsetedi.
35 Danalar dan'q-ataqtı, Aqılsızlar shermendelikti miyras etip aladı.
