Hikmetleri 31 bob
1 Patsha Lemueldin' hikmetli so'zleri, Anasının' og'an u'yretkenleri:
2 «Balam, qursag'ımnan shıqqan balam! Balam, wa'de berip, tilep alg'anım!
3 Ku'shin'di hayallarg'a jumsama, Patshalardı nabıt qılatug'ınlarg'a jaslıg'ın'dı sarp qılma.
4 Lemuel, patshalarg'a sharap ishiw jaraspas, Hu'kimdarlarg'a o'tkir ishimlikti an'saw jaraspas.
5 İshkende, olar nızamdı umıtar, Ezilgenlerden huqıqın tartıp alar.
6 O'tkir ishimlikti o'lip baratırg'ang'a, Sharaptı ruwxı qıynalg'ang'a ber.
7 Ol iship, jarlılıg'ın umıtsın, Qayg'ı-ha'siretin artıq eske almasın.
8 Awzın'dı o'z huqıqın qorg'ay almaytug'ınlar ushın, Ezilgenlerdi qorg'aw ushın ash.
9 Awzın'dı a'dil hu'kim shıg'arıw ushın, Jarlı ha'm mu'ta'jdin' isin qorg'aw ushın ash».
10 Jaqsı hayaldı kim taba alar? Ol qımbatbaha taslardan da qımbat.
11 Ku'yewi og'an shın ju'rekten isener, Hesh na'rseden mu'ta'jlik ko'rmes.
12 Ol ku'yewine jamanlıq emes, Bir o'mir jaqsılıq qılar.
13 Ol ju'n ha'm zıg'ır tabar, Ha'wes etip, o'z qolları menen isler.
14 Ol sawdagerdin' kemesine uqsar, Nanın uzaqtan alıp keler.
15 Ol tan' atpay turıp, Xojalıg'ı ushın awqat tayarlar, Shorılarına da tapsırma berer.
16 Atızdı ko'zden keshirip, satıp alar, En'beginin' tu'siminen ju'zim otırg'ızar.
17 Belin bekkem buwıp, Qollarına ku'shin jıynar.
18 Ol isinin' paydalı ekenin biler, Shırası tu'nde de o'shpes.
19 Qolların sharıqqa qoyar, Barmaqları menen urshıq iyirer.
20 Jarlılarg'a qolın sozar, Mu'ta'jlerge qol berer.
21 U'y-ishin oylap, qardan qorqpas, U'yindegiler qırmızı kiyim kiygen.
22 Ol o'zi ushın to'sek tiger, Kiyimleri shım qızıl hasıl zıg'ırdan.
23 Ku'yewinin' atag'ı ken' jayılıp, El aqsaqalları menen ken'es qurar.
24 Hayal zıg'ırdan kiyim tigip satar,Sawdagerlerdi qayıs penen ta'miyinler.
25 Ku'sh ha'm abıray onın' kiyimi, Shad bolıp bag'adı erten'gi ku'nge.
26 Ol danalıq penen so'yler, Mehir menen na'siyat qılar.
27 Xojalıq islerin baqlap barar, Miynetsiz nan jemes.
28 Balaları turıp, raxmet aytar, Ku'yewi de bılay dep onı maqtar:
29 «Jaqsı hayallar ko'p, Biraq sen ha'mmesinen artıqsan'».
30 Su'ykimlilik aldamshı, sulıwlıq o'tkinshi, Biraq Jaratqan İyeden qorqatug'ın hayal maqtawg'a ılayıq.
31 Og'an miynetine jarasa sıy berin'ler, İsleri da'rwaza aldındag'ı ken'este ta'riyiplensin!
