Hikmetleri 6 bob
1 Balam, eger birew ushın kepil bolıp, Onın' qarızın moynın'a alsan',
2 Onda sen so'zin'nen tutılıp, O'z so'zin'nin' qarmag'ına ilingenin'.
3 Yag'nıy, sol adamnın' qolına tu'skenin'. Balam, onnan qutılıw ushın bılay qıl: Bar da, ayag'ına jıg'ıl, jalın.
4 Ko'zin'e uyqı berme, Kirpik ilme.
5 An'shıdan qashqan jeyran kibi, Qus awlawshıdan qashqan qus kibi, o'zin'di qutqar.
6 Ha'y erinshek, qumırısqanın' janına bar, Onın' islerine qarap, danalıq u'yren.
7 Onın' baslıg'ı da, qadag'alawshısı da, Hu'kimdarı da joq.
8 Biraq ol jazda o'z azıg'ın tayarlaydı, Jıyın-terim waqtında awqatın jıynaydı.
9 Ha'y erinshek! Qashang'a deyin jatpaqshısan'? Qashan uyqın'nan oyanasan'?
10 Biraz uyıqlap, az-maz mu'lgip otırsan', Geyde qol qawsırıp, jatıp ta alsan',
11 Tonawshıday bolıp joqshılıq jetip keler, Qaraqshıday bolıp mu'ta'jlik bas salar.
12 On'bag'an ha'm zalım adam jalg'an so'ylep ju'rer,
13 Ko'zlerin qıpılıqlatar, Ayaqları menen belgi berip, Barmaqları menen isharat qılar,
14 Ju'regindegi hiyle menen jawız niyet qılıp, Ba'rqulla ja'njel tuwdırar.
15 Sonlıqtan apat og'an tosattan keler, Ku'tilmegende, sharasız shıl-pa'rshe bolar.
16 Jaratqan İye jek ko'retug'ın altı na'rse, Ha'tte, Ol jerkenetug'ın jeti na'rse bar:
17 Menmen ko'z, jalg'an so'ylewshi til, Ayıpsız qan to'getug'ın qollar,
18 Jawız niyetli ju'rek, Jawızlıqqa asıg'atug'ın ayaqlar,
19 O'tirik so'yleytug'ın jalg'an gu'wa, Tuwısqanlar arasına ot salıwshı adam.
20 Balam, a'ken'nin' buyrıg'ın este saqla, Anan' bergen ta'rbiyadan bas tartpa!
21 Olardı ba'rqulla ju'regin'e tu'yip, Moynın'a baylap ju'r.
22 Ju'rgenin'de, olar seni jeteler, Uyıqlag'anın'da, olar seni qorg'ap turar, Oyang'anın'da, olar sag'an ken'es berer.
23 Bul buyrıqlar – shıra, na'siyatlar – nur. Du'zetiwshi ta'rbiya – o'mirge jol.
24 Olar seni ju'wensiz hayaldan, Buzıq hayaldın' maylı tilinen qorg'aydı.
25 Onın' sulıwlıg'ın ju'regin' qumartpasın, Ko'zin su'zip seni aylandırıp almasın.
26 Jezo'kshe sebepli nang'a zar bolasan', Al ku'yewi bar hayal sebepli o'mirin'nen ayırılasan'.
27 Adam qoyıng'a ot salar da, Kiyimin o'rtemes pe?
28 Shoq u'stinde ju'rer de, Ayag'ın ku'ydirmes pe?
29 Basqanın' hayalı menen jatqang'a da solay boladı, Og'an jaqınlag'an jazasız qalmaydı.
30 Ashlıq sebepli tek qarnın toydırıw ushın urlıq qılg'andı, Adamlar onı jek ko'rmeydi.
31 Biraq ol qolg'a tu'sip qalsa, urlag'an na'rsesin jeti ese qılıp to'leydi, Ha'tte, u'yindegi barlıq mal-mu'lkin beriwi mu'mkin.
32 Buzıqshılıq qılg'an – esiwas, Solay islegen o'z janın nabıt qılar.
33 Ol tayaq jep, masqara bolar, Shermendelikten ma'n'gige tazalana almas.
34 Qızg'anıshtan ku'yewin ashıw kerner, O'sh alg'anda ayawdı bilmes.
35 Hesh qanday to'lemdi qabıl etpes, Ne bersen' de, alıwdı qa'lemes.
