Wazshı 11 bob
1 Nanın'dı basqalarg'a bergende, qıynalmay ber, Sonda ku'nler o'tip, ol o'zin'e qaytıp keler.
2 Barın'nan jeti yamasa segiz adamg'a pay ber, Jer betinde qanday apatshılıq bolajag'ın bilmeysen'.
3 Bultlar toyıng'anda, Jer betine jawın jawdıradı. Terek qublag'a qaray qulasa da, arqag'a qaray qulasa da, Ol qulag'an jerinde qaladı.
4 Samal qattı esse, tuqım seppes, Bult qoyıw bolsa, zu'ra'a'tin ormas.
5 Samaldın' qay jaqtan esetug'ının ha'm qursaqtag'ı balanın' su'yeginin' qalay payda bolatug'ının bilmeytug'ının' sıyaqlı, Ha'mme na'rseni isleytug'ın Qudaydın' islerin de bile almaysan'.
6 Azanda tuqım sep, Keshte de qolın' bos turmasın. Olardın' qaysısının' o'nimli bolatug'ının bilmeysen'. Anawsı ma, mınawsı ma? Ba'lkim ekewi de jaqsı o'nim berer.
7 Jaqtılıq tatlı, Quyashtı ko'riw ko'zge jag'ımlı.
8 Adam qansha ko'p jasasa da, Ba'rqulla quwanıp jasasın. Biraq qaran'g'ı ku'nlerdin' bar ekenin de umıtpasın. Olar da az emes. Ne ju'z bermesin, ba'ri de biyhuda.
9 Ha'y, o'spirim! Jaslıq shaqta kewil ko'ter. Jaslıq shag'ın'da ju'regin' seni shadlıqqa bo'lesin. Kewlin' ku'segen, ko'zin' qa'legen na'rseni isle.Biraq bulardın' barlıg'ı ushın, Qudaydın' seni hu'kim qılatug'ının bilip qoy.
10 Sonlıqtan ju'rekten qayg'ını quwıp, Denen'nen azaptı alıp tasla. Balalıq ta, jaslıq ta tez o'tip ketedi.
